Lotu mo Salá
ʻOku nofo ʻa e tokotaha naʻá ne faʻú ʻi Kuinisilani, ʻAositelēlia.
ʻI ha ʻaho ʻafu ʻe taha ʻo e faʻahitaʻu māfaná, naʻe fakaafeʻi ai ʻe Lisi mo Saieni ʻa Sala ke nau vaʻinga. Naʻe ngaohi ʻe he Fineʻeikí ha kiʻi kai maʻamaʻa. Naʻe tangutu e tamaiki fefiné ʻi he tēpilé ke maʻu meʻatokoni.
Ne tofitofi ange ʻe he Fineʻeikí ha ngaahi foʻi mango mei heʻenau fuʻu mangó. Naʻá ne tuku ha foʻi ʻāpele kuo ʻosi tofitofi mo ha fuhinga kālepi ʻi ha peleti. Naʻe siofi ʻe Lisi ʻa e meʻatokoni ifó. Naʻá ne manatuʻi ke fai ha lotu kimuʻa pea toki maʻu ʻene meʻatokoní. Naʻá ne ʻeke ange kia Sala, “ʻOkú ke lotu ʻi homou ʻapí?”
“Ko e hā ia?” Naʻe ʻeke ange ʻe Sala.
Naʻe pehē ange ʻe Saieni, “Hangē ko ʻení.” Naʻá ne kūnima pea punou hono ʻulú. Naʻá ne kole ha tāpuaki ki he meʻakaí. ʻI he ʻosi ʻene lotú, naʻá ne pehē ange, “Sio? Pehē pē. Faingofua atu!”
“ʻOku ʻikai ke fai ha meʻa pehē ia homau ʻapí. ʻOku mau kai pē mautolu,” ko e tali ange ia ʻa Salá.
Kuo teʻeki ai ha taimi ʻe fakakaukau ai ʻa Lisi ke ʻoua ʻe lotu. Naʻá ne pehē, “Fineʻeiki, ʻe lava ke taʻofi ʻetau fai e lotú?”
Naʻe malimali ʻa e Fineʻeikí ʻi heʻene hapai ʻa e ʻū ipu vai mokomokó ki he tēpilé. “ʻOku tau saiʻia ʻi he fakamālō ki he Tamai Hēvaní koeʻuhí ko e meʻa kuó Ne foaki maí. ʻE kei hokohoko atu pē ʻetau fai e lotú. Ka ʻoku sai pē ia kapau ʻoku ʻikai ke fai ia ʻe he niʻihi kehé.”
Naʻe ʻiloʻi ʻe Lisi ʻoku moʻoni e Fineʻeikí. Naʻe fiefia ʻi he taimi ʻoku lotu ai hono fāmilí. Mahalo ʻe fiefia pē mo Sala ʻi haʻane fai ha lotú. Naʻá ne pehē ange kia Sala, “Te ke lava pē ʻo ʻahiʻahiʻi ia.” “ʻOku lelei ʻa e lotú.”
Naʻe pehē ange ʻe Saieni, “ʻOku ou saiʻia he taimi ʻoku mau lotu aí.” “ʻOku ou ongoʻi hangē ʻoku fiefia hoku lotó kotoa.”
Naʻe malimali ʻa Sala. Naʻá ne kai ha konga mango mo ne pehē ange, “Mahalo pē te u fai ia.”
Naʻe fiefia ʻa Lisi mo Saieni ʻi heʻena talanoa ki hona kaungāmeʻá kau ki he lotú. Naʻa nau ʻosiki ʻenau meʻatokoní pea nau lele ki tuʻa ʻo vaʻinga.