រឿងចេញពីព្រះគម្ពីរមរមន
ការសន្យាដ៏ពិសេសរបស់មរ៉ូណៃ
មរមនមានកូនប្រុសម្នាក់ឈ្មោះមរ៉ូណៃ ។ បន្ទាប់ពីមរមនបានស្លាប់ទៅ មរ៉ូណៃបានសរសេរលើផ្ទាំងមាស ។
មរ៉ូណៃបានសរសេរអំពីការអធិស្ឋានប្រសិទ្ធពរសាក្រាម៉ង់ ។ លោកបានសរសេរថា អ្វីៗទាំងអស់ដែលល្អគឺមកពីព្រះ ។
មរ៉ូណៃបានសរសេរថា ព្រះយេស៊ូវស្រឡាញ់កុមារទាំងអស់ ។ លោកមានប្រសាសន៍ថា យើងអាចអធិស្ឋានដើម្បីមានសេចក្តីស្រឡាញ់ក្នុងដួងចិត្តយើង ។
មរ៉ូណៃបានធ្វើការសន្យាដ៏ពិសេសមួយ ។ លោកបានសរសេរថា ប្រសិនបើយើងអានព្រះគម្ពីរមរមន ហើយទូលសួរដល់ព្រះ នោះព្រះវិញ្ញាណបរិសុទ្ធនឹងប្រាប់យើងថាគម្ពីរនេះពិត ។ ក្រោយមកមរ៉ូណៃបានកប់ផ្ទាំងនោះទុកក្នុងភ្នំគូម៉ូរ៉ា ដើម្បីរក្សាទុកវាឲ្យមានសុវត្ថិភាព ។
ច្រើនឆ្នាំក្រោយមក មរ៉ូណៃបានមកកាន់ផែនដីវិញក្នុងសភាពជាទេវតា ។ ទេវតាមរ៉ូណៃបានបង្ហាញយ៉ូសែប ស៊្មីធ នូវកន្លែងដែលបានកប់ផ្ទាំងមាសនោះ ។ ព្រះបានប្រទានពរដល់យ៉ូសែបនូវព្រះចេស្តា ដើម្បីបកប្រែពាក្យនៅលើផ្ទាំងនោះ ។ សព្វថ្ងៃនេះយើងអាចអានពាក្យរបស់មរ៉ូណៃនៅក្នុងព្រះគម្ពីរមរមនបាន !