រៀបចំខ្លួន — ហើយធ្វើកិច្ចការ
អែលឌើរ ហ៊ូហ្គូ អ៊ី ម៉ាទីណេ
នៃពួកចិតសិបនាក់
ការរៀបចំខ្លួនរបស់អ្នក ហើយធ្វើកិច្ចការរបស់ព្រះអម្ចាស់នឹងផ្លាស់ប្តូរជីវិតរបស់អ្នក ។
ខ្ញុំជាគ្រូបង្រៀនថ្នាក់សិក្ខាសាលារយៈពេលប្រាំមួយឆ្នាំ ។ យើងជួបគ្នារៀងរាល់ថ្ងៃនៅម៉ោង ៦ ព្រឹកនៅក្នុងផ្ទះរបស់យើងនៅក្នុងទីក្រុង ព័រតូ រីកូ ។ វាជាកិច្ចការដែលត្រូវរៀបចំមេរៀនជាច្រើនរៀងរាល់ថ្ងៃ ពីថ្ងៃច័ន្ទដល់ថ្ងៃសុក្រ ។ ប៉ុន្តែខ្ញុំរីករាយនឹងធ្វើកិច្ចការនេះណាស់ ហើយវាបានជួយខ្ញុំឲ្យអភិវឌ្ឍនូវសេចក្តីស្រឡាញ់កាន់តែច្រើនឡើងចំពោះពួកយុវវ័យនៃសាសនាចក្រ ។
ខ្ញុំកត់សម្គាល់ឃើញថា ភាគច្រើនអ្វីដែលកូនសិស្សបានទទួលមកពីថ្នាក់សិក្ខាសាលានោះ គឺអាស្រ័យនឹងការរៀបចំខ្លួនរបស់ពួកគេ ។ ដូច្នោះប្រសិនបើអ្នកចង់ចេះកាន់តែច្រើនពីមេរៀនថ្នាក់សិក្ខាសាលា នោះខ្ញុំសូមអញ្ជើញអ្នកឲ្យសិក្សាមេរៀននោះជាមុន ហើយពិចារណាពីវា ។ មកថ្នាក់រៀនដោយមានអារម្មណ៍ស្រែកឃ្លាននូវចំណេះដឹង ។ ចូរមកដូចជាកូនតូច ដែលមានចិត្តចង់រៀនសូត្រជានិច្ច ។ ចូររៀបចំខ្លួនដើម្បីចូលរួម ប្រយោជន៍ឲ្យអ្នកអាចបង្រៀនគ្នាទៅវិញទៅមក ។ ហើយយើងមករៀនដោយមានសំណួរ ។ មួយទៀតយុវជនអើយ ការសិក្សាព្រះគម្ពីរ ឬ ប្រហែលជាយោបល់របស់គ្រូបង្រៀនអាចឆ្លើយនឹងសំណួររបស់អ្នកបាន ។
ការណែនាំដ៏ល្អបំផុតអំឡុងពេលរៀន ឬ ការប្រជុំនានានៅក្នុងសាសនាចក្រកើតមានឡើង នៅពេលអ្នករៀបចំខ្លួន ហើយអ្នកទទួលការបំផុសគំនិតខាងវិញ្ញាណដែលកើតឡើងជាគំនិត ។ ចូរសរសេរគំនិតទាំងនោះទុក ហើយក្រោយមកអនុវត្តវា ។ ចូររកមើលយោបល់នានាពីព្រះគម្ពីរ ឬ សុន្ទរកថាសន្និសីទទូទៅ ឬ អត្ថបទនានាមកពីទស្សនាវដ្តីសាសនាចក្រឲ្យកាន់តែច្រើនឡើង ។ ចូរពិចារណាអំពីយោបល់ទាំងនោះនៅក្នុងគំនិត និង ដួងចិត្តរបស់អ្នក ហើយត្រៀមខ្លួនរួចជាស្រេចដើម្បីបម្រើ ដោយសារនៅពេលណាអ្នកមានសេចក្តីពិតទាំងនេះនៅក្នុងខ្លួនអ្នក នោះព្រះអម្ចាស់នឹងប្រើអ្នកឲ្យជួយអ្នកដទៃ ។
ក្រោយមក កាលខ្ញុំបម្រើជាប្រធានបេសកកម្មជាមួយភរិយារបស់ខ្ញុំ ខ្ញុំបានដឹងថាថ្នាក់សិក្ខាសាលាគឺជាកន្លែងរៀបចំខ្លួនដ៏អស្ចារ្យបំផុតសម្រាប់ការបម្រើជាអ្នកផ្សព្វផ្សាយសាសនា ។ អស់ពេលជាច្រើនឆ្នាំ ខ្ញុំបានឃើញព្រះចេស្តាដ៏មហិមានៃដំណឹងល្អប្រទានពរដល់សិស្សដែលស្មោះត្រង់ចូលរៀនថ្នាក់សិក្ខាសាលា ។ ពួកគេបានអនុវត្តអ្វីដែលពួកគេបានរៀននៅក្នុងមេរៀនទាំងនោះ នៅក្នុងឧបសគ្គធំៗនៅក្នុងជីវិតរបស់ពួកគេ ហើយបានហែលឆ្លងកាត់ឧបសគ្គនានា សូម្បីតែជាការត្រឡប់មកកាន់ព្រះវិហារវិញបន្ទាប់ពីមិនសូវសកម្មមួយរយៈ ។
ប្អូនៗទាំងអស់គ្នាសំខាន់ណាស់ចំពោះព្រះអម្ចាស់ ។ ប្អូនៗពិតជាសំខាន់ខ្លាំងណាស់ ។ កិច្ចការរបស់ពួកយុវវ័យគឺត្រូវរៀបចំខ្លួនធ្វើកិច្ចការអ្នកផ្សព្វផ្សាយសាសនា ហើយបន្ទាប់មកធ្វើកិច្ចការអ្នកផ្សព្វផ្សាយសាសនា ។ ឥឡូវនេះអ្នកត្រូវតែយល់ថា នៅពេលអ្នកបន្តធ្វើកិច្ចការអ្នកផ្សព្វផ្សាយសាសនា ហើយនៅពេលអ្នកបន្តរៀបចំខ្លួន ការណ៍នេះនឹងជំរុញ ព្រមទាំងនាំឲ្យអ្នកមានការរីកចម្រើននាពេលអនាគត ក្នុងនាមជាអ្នកផ្សព្វផ្សាយសាសនារបស់ព្រះអម្ចាស់ ។ អ្នកពុំត្រូវការស្លាកឈ្មោះនៃអ្នកផ្សព្វផ្សាយសាសនាដើម្បីធ្វើកិច្ចការផ្សព្វផ្សាយសាសនានោះឡើយ ដោយសារអ្នកពាក់ព្រះនាមរបស់ព្រះយេស៊ូវគ្រីស្ទ ដែលបានចារនៅក្នុងដួងចិត្តរបស់អ្នក ដោយសារសេចក្តីសញ្ញារបស់អ្នក ។
ការណ៍នេះក៏ពិតចំពោះកិច្ចការពង្សប្រវត្តិ និងកិច្ចការព្រះវិហារបរិសុទ្ធផងដែរ ។ ឧទាហរណ៍ នៅក្នុងតំបន់ ការីប៊ៀន ជាកន្លែងដែលខ្ញុំបម្រើ ស្តេកជាច្រើនប្រើពួកយុវវ័យឲ្យធ្វើជាអ្នកផ្តល់ប្រឹក្សាខាងពង្សប្រវត្តិ បានធ្វើឲ្យមានសមាជិកដែលស្វែងរកឈ្មោះសម្រាប់កិច្ចការព្រះវិហារបរិសុទ្ធ និង ធ្វើកិច្ចការពង្សប្រវត្តិនោះកើនចំនួនឡើង ។ នៅក្នុងស្តេកមួយមានពួកយុវវ័យ ២០ នាក់ដែលត្រូវបានហៅជាអ្នកផ្តល់ប្រឹក្សាខាងពង្សប្រវត្តិ រយៈពេលមួយឆ្នាំពីមុនពួកគេមានអាយុគ្រប់ទៅបេសកកម្ម ។ នៅពេលពួកគេសួរសុខទុក្ខសមាជិកនៅតាមផ្ទះរបស់ពួកគេ ដើម្បីបង្ហាញសមាជិកពីរបៀបធ្វើពង្សប្រវត្តិរបស់ខ្លួន នោះពួកគេនិយាយជាមួយមនុស្សនៅតាមផ្លូវ ហើយប្រាប់ពួកគេអំពីពង្សប្រវត្តិ និង ព្រះវិហារបរិសុទ្ធ ។ នោះគឺជាកិច្ចការផ្សព្វផ្សាយសាសនាហើយ !
ខ្ញុំសង្ឃឹមថានៅពេលពួកគេបម្រើបេសកកម្ម នោះពួកគេមានអារម្មណ៍ពីព្រះវិញ្ញាណរួចស្រេចក្នុងរបៀបមួយដ៏មានព្រះចេស្តា — ពោរពេញដោយសេចក្តីសង្ឃឹមនៅក្នុងគេហដ្ឋានរបស់ពួកគេ ប៉ុន្តែប្រសិនបើគ្មានទេ នោះពួកគេនឹងមាននៅពេលពួកគេធ្វើកិច្ចការពង្សប្រវត្តិ និង ព្រះវិហារបរិសុទ្ធ ។ បន្ទាប់មកនៅពេលពួកគេចូលទៅក្នុងមជ្ឈមណ្ឌលបំពាក់បំប៉នអ្នកផ្សព្វផ្សាយសាសនា ខ្ញុំសង្ឃឹមថា គ្មាននរណាម្នាក់ប្រាប់ខ្ញុំថា « ខ្ញុំមានព្រះវិញ្ញាណបរិសុទ្ធខ្លាំងនៅទីនេះ ជាងពេលណាៗទាំងអស់នៅក្នុងជីវិតរបស់ខ្ញុំ » ។ ពួកគេគួរតែទទួលអារម្មណ៍នៃព្រះចេស្តារបស់ទ្រង់ដ៏ខ្លាំងនេះតាំងតែពីមុនមកម៉្លេះ ។
ព្រះអម្ចាស់ស្រឡាញ់ប្អូនៗ ។ ទស្សនវិស័យរបស់ទ្រង់គឺថា អ្នកគឺជាអ្នកធ្វើកិច្ចការពង្សប្រវត្តិ ព្រះវិហារបរិសុទ្ធ និង កិច្ចការផ្សព្វផ្សាយសាសនា ។ ប្អូនៗទាំងអស់គ្នាមានជំនាញ និង ចំណេះដឹង ។ នៅពេលប្អូនៗរៀបចំខ្លួនបានល្អ នោះប្អូនៗអាចធ្វើកិច្ចការនេះ ។ វានឹងប្រទានពរ ព្រមទាំងផ្លាស់ប្តូរជីវិតរបស់ប្អូន ។