ការបង្រៀនតាមមាគ៌ារបស់ព្រះអង្គសង្គ្រោះ
ការយល់ចិត្ត យុវវ័យដែលអ្នកបង្រៀន
ការខិតខំរៀនពីយុវវ័យដែលអ្នកបង្រៀនអាចចាក់សោបើកទ្វារឆ្ពោះទៅរកការប្រែចិត្តជឿរបស់ពួកគេ ។
សមាជិកវ័យក្មេងជាច្រើនមានការរំភើប និង ចិត្តស្វាហាប់ ដែលអាចធ្វើឲ្យការបង្រៀន និង ការប្រឹក្សាដល់ពួកគេជាទីរីករាយចិត្ត ។ ប៉ុន្តែមនុស្សមួយចំនួនក៏អាចប្រឈមមុខនឹងឧបសគ្គនានានៅពេលពួកគេធំឡើង និង មានភាពចាស់ទុំ — គឺអ្វីៗគ្រប់យ៉ាងមកពីការសម្របសម្រួលទៅរកការផ្លាស់ប្តូររាងកាយរបស់ពួកគេ ភាពតានតឹងចិត្តនៅឯសាលារៀន ការគាបសង្កត់នៃវប្បធម៌ដែលព្យាយាមបញ្ចុះបញ្ចូលពួកគេកុំឲ្យរស់នៅតាមដំណឹងល្អ ។ យុវវ័យត្រូវការគ្រូបង្រៀនដែលយល់ចិត្តពួកគេ ហើយខ្វាយខ្វល់ពីពួកគេ ។ ពួកគេត្រូវការអ្នកប្រឹក្សាដែលជំរុញឲ្យមានបរិយាកាសសុវត្ថិភាពមួយសម្រាប់ពួកគេ ដើម្បីរៀន និង អនុវត្តតាមអ្វីដែលពួកគេបានរៀន ។
នេះជាចំណុចមួយចំនួនដែលអាចជាប្រយោជន៍ដើម្បីដឹងអំពីយុវវ័យ នៅពេលអ្នកដាក់ផែនការ រៀបចំ និង បង្រៀនពួកគេតាមរបៀបរបស់ព្រះអម្ចាស់ ៖
១. យុវវ័យមានចិត្តចង់ ហើយត្រូវការរៀនគោលលទ្ធិ ។ នៅក្នុងពិភពលោកដែលងាកចេញបន្តិចម្តងៗពីបទដ្ឋាននៃដំណឹងល្អនេះ យុវវ័យកំពុងស្រែកឃ្លាននូវសេចក្តីពិតអស់កល្បជានិច្ច ។ ពួកគេចង់រៀនពី « រឿងទាំងឡាយ តាមដែលមាននៅពេលនេះ ហើយអំពីរឿងទាំងឡាយតាមដែលមាននៅពេលខាងមុខ » ( យ៉ាកុប ៤:១៣ ) ។ រឿងទាំងនោះគឺមាននៅក្នុងគោលលទ្ធិនៃដំណឹងល្អ ។ នៅពេលអ្នកបង្រៀន សូមផ្តោតទៅលើគោលលទ្ធិដែលមាននៅក្នុងព្រះគម្ពីរ ការបង្រៀនរបស់ពួកព្យាការី និងពួកសាវកនៅរស់ ព្រមទាំងឯកសារជាផ្លូវការដទៃផ្សេងទៀតរបស់សាសនាចក្រ ។ សូមលើកទឹកចិត្តយុវវ័យឲ្យសិក្សាធនធានទាំងនេះដោយខ្លួនឯង ។ គោលលទ្ធិមានប្រសិទ្ធិភាពយ៉ាងខ្លាំងក្លា ( សូមមើល អាលម៉ា ៣១:៥ ) ។
២. យុវវ័យកំពុងស្ថាបនាអត្តសញ្ញាណរបស់ខ្លួន ។ ពួកគេកំពុងតែស្វែងយល់ថាពួកគេគឺជានរណា ហើយថាពួកគេចង់ប្រែក្លាយទៅជានរណា ។ នៅពេលពួកគេរៀបចំខ្លួនសម្រាប់តួនាទីនាពេលអនាគត នោះពួកគេអាចងឿងឆ្ងល់ពីអ្វីដែលព្រះអម្ចាស់បានមានផែនការសម្រាប់ពួកគេ ហើយថាតើពួកគេអាចនឹងធ្វើនូវកិច្ចការទាំងអស់ដែលបានរពឹងទុកពីពួកគេដែរឬទេ ។ ក្នុងនាមជាឪពុកម្តាយ ឬ គ្រូបង្រៀន អ្នកអាចបំផុសឲ្យមានទំនុកចិត្តអំពីអនាគត និង ផ្តល់ការណែនាំក្នុងការរៀបចំខ្លួនសម្រាប់វា ។ ជួយពួកគេឲ្យកាន់តែខិតជិតព្រះ ហើយស្ថាបនាជីវិតរបស់ពួកគេលើបទដ្ឋាននៃដំណឹងល្អ ។ បង្រៀនពួកគេពីសារៈសំខាន់នៃព្រះវិហារបរិសុទ្ធ និងតួនាទីរបស់ពួកគេក្នុងការស្ថាបនានគរព្រះ ។
៣. យុវវ័យដឹងនៅពេលអ្នកខ្វល់ខ្វាយពីពួកគេ ។ ដើម្បីឲ្យយុវវ័យពិតជាចុះប្រឡូកយ៉ាងសកម្មក្នុងការរៀនសូត្រដំណឹងល្អ នោះពួកគេត្រូវតែដឹងថាអ្នកស្រឡាញ់ពួកគេ ហើយអ្នកចាប់អារម្មណ៍ពីពួកគេម្នាក់ៗ ។ ស្តាប់ពួកគេ ។ រកមើលលក្ខណៈវិជ្ជមានដែលពួកគេមាន ហើយស្ថាបនាពួកគេចេញពីចំណុចនោះមក ។ បង្ហាញទំនុកចិត្តរបស់អ្នកលើពួកគេ ហើយផ្តល់ការធានាអះអាងថាពួកគេមានតម្លៃ និង មានគេត្រូវការ ។
៤. យុវវ័យមានចំណាប់អារម្មណ៍ជាច្រើន ។ យុវវ័យម្នាក់ៗមាននូវលក្ខណៈពិសេសរៀងៗខ្លួន ។ ព្យាយាមស្គាល់ពីចំណាប់អារម្មណ៍ តម្រូវការ និង ឧបសគ្គផ្ទាល់ខ្លួនរបស់ពួកគេ ។ ចំណុចនេះអាចតម្រូវឲ្យជួយដល់ពួកគេ លើសពីកាលវិភាគប្រជុំ ថ្នាក់រៀន និង សកម្មភាពទៀងទាត់នានាទៅទៀត ។ តាមរយៈការព្យាយាមស្គាល់ពួកគេ នោះអ្នកអាចទទួលបានការយល់ដឹង និង បំផុសគំនិតតាមរយៈព្រះវិញ្ញាណបរិសុទ្ធអំពីតម្រូវការរបស់ពួកគេ ដែលអាចជះឥទ្ធិពលលើរបៀបដែលអ្នកបង្រៀនពួកគេ ។ នៅពេលយុវវ័យដឹងពីចំណាប់អារម្មណ៍ដ៏ស្មោះសររបស់អ្នកនៅក្នុងជីវិតរបស់ពួកគេ នោះដួងចិត្តរបស់ពួកគេនឹងបើកទទួលយកការបង្រៀន និង ទីបន្ទាល់របស់អ្នក ។
៥. យុវវ័យអាចរកឃើញចម្លើយចំពោះសំណួររបស់ខ្លួន ។ អ្នករៀនគ្រប់វ័យទាំងអស់រីករាយនឹងស្វែងយល់ពីចំណេះដឹងនៃដំណឹងល្អ ប៉ុន្តែវាសំខាន់ជាពិសេសចំពោះមនុស្សវ័យជំទង់ នៅពេលពួកគេអភិវឌ្ឍគុណតម្លៃ និង ជំនឿរបស់ពួកគេ ។ មេរៀនដំណឹងល្អដែលមានឥទ្ធិពលយូរអង្វែង នៅពេលពួកគេរៀនដោយខ្លួនឯងផ្ទាល់ — ហើយរស់នៅតាមមេរៀននោះ ។ ជំនួសឲ្យការផ្តល់ចម្លើយដល់យុវវ័យ អ្នកអាចប្រើវិធីសាស្ត្របង្រៀន ដែលអញ្ជើញ និង បំផុសគំនិតពួកគេឲ្យស្វែងរកចម្លើយចំពោះសំណួរផ្ទាល់ខ្លួន ។ ការណ៍នេះនឹងនាំទៅរកការផ្លាស់ប្រែចិត្តជឿកាន់តែជ្រាលជ្រៅ — ដែលជាគោលដៅចម្បងបំផុតនៃការណែនាំទាំងអស់នៃដំណឹងល្អ ។
៦. យុវវ័យអាចបង្រៀនគ្នាទៅវិញទៅមក ។ យុវវ័យមានចំណាប់អារម្មណ៍ក្នុងការផ្តល់យោបល់អំពីអ្វីដែលបានបង្រៀន ហើយរំភើបចែកចាយអ្វីដែលពួកគេដឹង ។ តាមរយៈគំរូ និង ការណែនាំរបស់អ្នក នោះអ្នកអាចជួយពួកគេរៀនបង្រៀនតាមរបៀបរបស់ព្រះអង្គសង្គ្រោះ ។ ដោយមានការណែនាំពីអ្នក នោះពួកគេអាចចាប់ផ្តើមដោយការបង្រៀនផ្នែកណាមួយនៃមេរៀន ឬ ដឹកនាំការពិភាក្សាខ្លីៗ ។ នៅពេលពួកគេទទួលបទពិសោធន៍ ហើយមានទំនុកចិត្ត នោះពួកគេអាចមានឱកាសយូរៗម្តងបង្រៀនមេរៀនទាំងមូល ។ នៅពេលយុវវ័យរៀនពីគ្នាទៅវិញទៅមក នោះពួកគេជួយពង្រឹងគ្នាទៅវិញទៅមកទប់ទល់នឹងសម្ពាធពីអស់អ្នកដែលពុំមានគុណតម្លៃដូចពួកគេ ។
៧. យុវវ័យកំពុងរៀនពីភាពជាអ្នកដឹកនាំ ។ គណៈប្រធានថ្នាក់ និង គណៈប្រធានកូរ៉ុមមានការហៅបម្រើដ៏ពិសិដ្ឋដើម្បីដឹកនាំក្រុមរបស់ខ្លួនដែលមានអាយុស្របាលគ្នា ។ ប៉ុន្តែ ទោះបីជាពួកគេមានបទពិសោធន៍នៃភាពជាអ្នកដឹកនាំក្តី ពួកគេនៅតែត្រូវការការណែនាំពីអ្នកស្តីអំពីរបៀបដើម្បីដឹកនាំការប្រជុំ ជួយអ្នកដទៃឲ្យរៀន និង បម្រើ ។ ឱកាសនៃភាពជាអ្នកដឹកនាំផ្សេងៗទៀតអាចកើតមាននៅក្នុងគេហដ្ឋាន នៅពេលយុវវ័យត្រូវបានផ្តល់ឲ្យនូវការទទួលខុសត្រូវនានាដ៏មានន័យ ។
៨. យុវវ័យរៀនពីឪពុកម្តាយ និង មនុស្សពេញវ័យដ៏គំរូផ្សេងៗទៀត ។ ផ្នែកមួយនៃការទទួលខុសត្រូវរបស់អ្នកក្នុងនាមជាគ្រូបង្រៀន គឺត្រូវជួយពង្រឹងទំនាក់ទំនងរវាងយុវវ័យជាមួយនឹងថ្នាក់ដឹកនាំ និង ឪពុកម្ដាយរបស់ពួកគេ ។ អ្នកអាចជួយយុវវ័យស្វែងរកចម្លើយចំពោះសំណួរជាច្រើនរបស់ពួកគេ ប៉ុន្តែសំណួរមួយចំនួនរបស់ពួកគេនឹងមានចម្លើយកាន់តែប្រសើរ ប្រសិនបើឪពុកម្តាយ ឬ ថ្នាក់ដឹកនាំរបស់ពួកគេជាអ្នកឆ្លើយ ។ សូមដឹកនាំតម្រែតម្រង់យុវវ័យឲ្យទៅរកឪពុកម្ដាយរបស់ពួកគេ ហើយលើកទឹកចិត្តពួកគេឲ្យពង្រឹងចំណងមិត្តភាពក្រុមគ្រួសារ ។ សូមនិយាយជាមួយឪពុកម្តាយឲ្យបានទៀងទាត់ អំពីអ្វីដែលអ្នកកំពុងសិក្សានៅក្នុងថ្នាក់ ហើយចែកចាយទេពកោសល្យ ការរីកចម្រើន និង ការរួមចំណែកជាវិជ្ជមានដែលអ្នកសង្កេតឃើញនៅក្នុងកូនប្រុសស្រីរបស់ពួកគេ ។ សូមសួរពួកគេពីអ្វី ដែលអ្នកអាចធ្វើបានដើម្បីជួយពួកគេ នៅពេលដែលពួកគេបង្រៀនកូនៗរបស់ខ្លួន ។
ការជួយយុវវ័យឲ្យប្រែចិត្តជឿ ត្រូវការការខិតខំប្រឹងប្រែងរួមគ្នាពីឪពុកម្ដាយ អ្នកដឹកនាំ អ្នកប្រឹក្សាយោបល់ និង គ្រូបង្រៀន រួមទាំងគ្រូបង្រៀនថ្នាក់សិក្ខាសាលាផងដែរ ។ ពេលអ្នកធ្វើការជាមួយគ្នា នោះអ្នកអាចបង្កើតបទពិសោធន៍នៃការរៀនសូត្រឲ្យកាន់តែមានឥទ្ធិពលខ្លាំងឡើង សម្រាប់យុវវ័យជាងអ្នកធ្វើវាតែឯកឯង ។