ប្រវត្តិរបស់យុវមជ្ឈិមវ័យ
បន្តរឹងប៉ឹងនៅក្នុង ប្រទេសបារាំង
នៅក្នុងនាមជាសមាជិកនៃសាសនាចក្រនៅក្នុងជួរកងទ័ពបារាំង ផ្ជែ ពឹងផ្អែកលើការអធិស្ឋាន និង ការសិក្សាព្រះគម្ពីរ ដើម្បីធ្វើជាគំរូនៃសេចក្តីជំនឿរបស់គាត់ ។
ការបំពាក់បំប៉នធ្វើជាអ្នកបើកឧទ្ធម្ភាគចក្រគឺជាឱកាសដ៏កម្របំផុតសម្រាប់មនុស្សទូទៅ ។ ប៉ុន្តែ នៅពេលផ្ជែ អូ អាយុ ២៤ ឆ្នាំ បានសម្រេចចិត្តទៅចុះឈ្មោះបម្រើកងទ័ពបារាំង គាត់បានទទួលឱកាសនោះ ។ ឥឡូវនេះនៅក្នុងឆ្នាំទីពីររបស់គាត់នៃការបំពាក់បំប៉នបួនឆ្នាំ ផ្ជែ កំពុងតែប្រឹងអស់ពីសមត្ថភាពរបស់ខ្លួន ដើម្បីរស់នៅធ្វើជាគំរូមួយនៃពួកអ្នកជឿ ទោះបីជាបរិយាកាសជុំវិញខ្លួនរបស់គាត់យ៉ាងណាក៏ដោយ ។
ដោយត្រូវឈរជើងនៅក្នុងស្ថានីយមួយកន្លែងដែលត្រូវចំណាយពេលប្រហែលជាមួយម៉ោងកន្លះពីទីក្រុង បរដូរ នៅភាគនិរតី ប្រទេសបារាំង ផ្ជែនៅឆ្ងាយពីមិត្តភក្តិ គ្រួសារ និង ស្រុកកំណើតខ្លួននៅ រិនណែស ។ សាលាប្រជុំដែលនៅជិតបំផុតគឺមានចម្ងាយផ្លូវមួយម៉ោង នោះមានន័យថា គាត់ពុំសូវមានទំនាក់ទំនងច្រើនឡើយជាមួយសមាជិកអំឡុងពេលនៃសប្តាហ៍ ។ ផ្ជែ និយាយថា « វាគ្មានភាពងាយស្រួលសោះដើម្បីធ្វើជាសមាជិកសាសនាចក្រនៅក្នុងជួរកងទ័ព ដោយសារមានការល្បួងជាច្រើន ហើយពិតណាស់វាគឺជាពិភពពីរផ្សេងគ្នា ។ អ្នកត្រូវបានគេវិនិច្ឆ័យជាច្រើននៅក្នុងជួរកងទ័ព ដោយមិនផ្អែកលើអ្វីដែលអ្នកធ្វើឡើយ ប៉ុន្តែផ្អែកលើបុគ្គលិកលក្ខណៈរបស់ខ្លួនអ្នក » ។ ផ្ជែចង់ឲ្យអស់អ្នកដែលនៅជុំវិញខ្លួនគាត់ឃើញថា គាត់ពុំផឹងគ្រឿងស្រវឹង ជក់ថ្នាំជក់ មើលការណ៍អាសគ្រាម ឬ ចូលរួមពិធីជប់លៀងឡើយ — ជាសកម្មភាពដែលគេធ្វើច្រើនបំផុតនៅក្នុងជួរកងទ័ព — ដោយសារគាត់គឺជា ៖ សមាជិកសាសនាចក្រ ។ អំឡុងពេលគាត់ពុះពារ ដើម្បីឲ្យអស់អ្នកដែលនៅជុំវិញគាត់គោរពដល់គាត់ នោះការអធិស្ឋាន និង ការសិក្សាព្រះគម្ពីរជួយរក្សាឲ្យទីបន្ទាល់របស់គាត់មានភាពរឹងប៉ឹង ។ គាត់បានពន្យល់ថា « ខ្ញុំមិនចូលដេកឡើយ ប្រសិនបើខ្ញុំមិនបានអានព្រះគម្ពីរជាមុនសិននោះ ហើយខ្ញុំព្យាយាមអធិស្ឋាននៅគ្រប់ពេលដែលខ្ញុំអាចអធិស្ឋានបាន » ។
ផ្ជែ ពន្យល់ថា « ការអានព្រះគម្ពីរ និង ការអធិស្ឋានបានជួយខ្ញុំយ៉ាងខ្លាំងអំឡុងពេលសិក្សារបស់ខ្ញុំ ដើម្បីដឹងថា ព្រះមានពិតមែន ថាទ្រង់គង់នៅឋានសួគ៌ — ទោះបីជាគាត់ពុំទាន់យល់អស់នូវដំណឹងល្អក្តី ។ ខ្ញុំគ្រាន់តែដឹងថាព្រះពិតជាគង់នៅទីនោះ ការណ៍នេះធ្វើឲ្យខ្ញុំបន្តដើរនៅលើផ្លូវត្រូវ » ។
មូលដ្ឋានគ្រឹះនៃការសិក្សាព្រះគម្ពីរនោះហើយដែលបានជួយ ផ្ជែឲ្យហែលឆ្លងកាត់ថ្នាក់រៀនទាំងអស់របស់គាត់ ហើយសូម្បីតែឥឡូវនេះជួយគាត់ឲ្យឆ្លងកាត់ការបំពាក់បំប៉នជាកងទ័ព ។ ពីមុនចុះឈ្មោះបម្រើកងទ័ព ផ្ជែ បានបម្រើបេសកកម្មនៅក្នុងទីក្រុង ម៉ុនត្រេល ហ្គូប៊េក ប្រទេសកាណាដា នៅទីនោះទីបន្ទាល់ និង ការយល់ដឹងរបស់គាត់អំពីដំណឹងល្អបានរឹងមាំឡើង ។
គាត់និយាយថា « ព្រះគម្ពីរគឺជាមធ្យោបាយដ៏ជាក់ស្តែងបំផុតដែលព្រះវរបិតាសួគ៌ឆ្លើយសំណួរមកកាន់យើង » ។
តាមរយៈការអធិស្ឋាន និង ការសិក្សាព្រះគម្ពីរផ្ទាល់ខ្លួន ផ្ជែមិនត្រឹមតែទទួលបានការបំផុសគំនិតប៉ុណ្ណោះទេ ប៉ុន្តែការធ្វើបែបនេះក៏ជាគំរូមួយដល់អស់អ្នកដែលនៅជុំវិញគាត់នៅក្នុងអង្គភាពកងទ័ពរបស់គាត់ផងដែរ ។ ដោយសារតែគាត់ និង មិត្តភក្តិរួមថ្នាក់របស់គាត់គ្មានអ្វីដែលដូចគ្នា ក្រៅពីពានរង្វាន់ថ្នាក់ជាតិ នោះផ្ជែដឹងថា តាមរយៈការធ្វើតាមការបង្រៀននៃព្រះគម្ពីរ នោះគាត់អាចក្លាយជាមនុស្សម្នាក់ដែលពួកគេអាចគោរពដោយសារជំនឿរបស់គាត់ ហើយពុំមែនមិនគោរពដោយសារសេចក្តីជំនឿរបស់គាត់ឡើយ ។