របៀបដែលខ្ញុំដឹង
ការរៀនធ្វើជា ពន្លឺដល់ពិភពលោកនេះ
អ្នកនិពន្ធរស់នៅក្នុង សាធារណរដ្ឋ ដូមីនីក ។
ខ្ញុំបានកើតនៅក្នុង សាធារណរដ្ឋ ដូមីនីក ហើយត្រូវបានចិញ្ចឹមឲ្យធំឡើងនៅក្នុងសាសនាចក្រ ។ អ្នកដឹកនាំដ៏អស្ចារ្យជាច្រើនបានព្យាយាមជួយខ្ញុំឲ្យដើរតាមផ្លូវត្រូវអំឡុងពេលចម្រើនវ័យធំឡើង ។ ខ្ញុំមានក្តីស្រមៃពីការបម្រើបេសកកម្ម និង ការជួយមនុស្សទូទៅ ។
ដោយសារឪពុករបស់ខ្ញុំបានប្តូរទៅនៅសហរដ្ឋ ដើម្បីព្យាយាមស្វែងរកជីវិតកាន់តែប្រសើរសម្រាប់ពួកយើង នោះម្តាយរបស់ខ្ញុំបានចិញ្ចឹមបងស្រីៗ និង ខ្ញុំតែម្នាក់ឯង ។ ជួនកាលខ្ញុំមានអារម្មណ៍ឯកោ ប៉ុន្តែខ្ញុំមិនធ្លាប់ឯកោឡើយ ដោយសារខ្ញុំអាចនិយាយអំពីការលំបាកនានានៅក្នុងជីវិតរបស់ខ្ញុំ ជាមួយថ្នាក់ដឹកនាំសាសនាចក្ររបស់ខ្ញុំ ។
ពេលយើងបានប្តូរទៅរស់នៅសហរដ្ឋ ការសាកល្បងដ៏ធំបានចាប់ផ្តើមចំពោះខ្ញុំ ។ យើងបានចូលរួមសាខាតូចមួយ ហើយខ្ញុំមានថ្នាក់ដឹកនាំដែលចង់ជួយខ្ញុំ ប៉ុន្តែមិត្តភក្តិនៅសាលារបស់ខ្ញុំ បានព្យាយាមទាញខ្ញុំឲ្យធ្លាក់ចេញពីផ្លូវនៃដំណឹងល្អ ។ ជាអកុស ខ្ញុំបានចាប់ផ្តើមនិយាយទៅកាន់ម្តាយខ្ញុំដោយច្រឡើសបើស ហើយកម្រនឹងស្តាប់តាមការទូន្មានរបស់គាត់ណាស់ ។
ខ្ញុំទៅព្រះវិហាររាល់សប្តាហ៍ ប៉ុន្តែខ្ញុំពិតជាគ្មានបំណងទៅឡើយ ហើយខ្ញុំពុំដឹងឡើយថា តើខ្ញុំចង់ទៅបម្រើបេសកកម្មទៀតឬអត់នោះទេ ។
នាព្រឹកមួយខ្ញុំបានបើកព្រះគម្ពីរមរមន ហើយវាបើកចំទំព័រនៃខគម្ពីរដែលខ្ញុំពេញចិត្ត នីហ្វៃទី ៣ ១២:១៤–១៦៖
« ប្រាកដមែន យើងប្រាប់អ្នករាល់គ្នាជាប្រាកដថា យើងឲ្យអ្នករាល់គ្នាធ្វើជាពន្លឺនៃប្រជាជននេះ ។ ឯទីក្រុងណាដែលនៅលើភ្នំនោះលាក់មិនកំបាំងទេ ។
មើលចុះ តើមនុស្សអុជទៀន ហើយដាក់នៅក្រោមថាំងឬ ? ទេ ប៉ុន្តែដាក់នៅលើជើងទៀនវិញ នោះទើបនឹងឲ្យពន្លឺដល់អ្នកដែលនៅក្នុងផ្ទះទាំងអស់គ្នា
ដូច្នេះ ចូរឲ្យពន្លឺរបស់អ្នករាល់គ្នា បានភ្លឺនៅមុខប្រជាជននេះ ដើម្បីឲ្យគេអាចឃើញការល្អរបស់អ្នករាល់គ្នា ហើយសរសើរតម្កើងដល់ព្រះវរបិតានៃអ្នករាល់គ្នា ដែលគង់នៅលើស្ថានសួគ៌ » ។
ខ្ញុំមានក្តីអំណរជាខ្លាំងដើម្បីអានខគម្ពីរនេះ ដោយសារវាជួយខ្ញុំឲ្យចងចាំពីអ្វីដែលខ្ញុំបានរៀននៅក្នុងថ្នាក់សិក្ខាសាលា និង ផែនការដ៏មហិមារបស់ព្រះវរបិតាយើង ។ ដូច្នេះខ្ញុំបានសម្រេចចិត្តព្យាយាមធ្វើជាពន្លឺដល់ពិភពលោក ។
ខ្ញុំបានអញ្ជើញបងប្អូនជីដូនមួយរបស់ខ្ញុំពីរនាក់មកព្រះវិហារ ។ ម្នាក់មិនសូវសកម្ម ហើយគាត់បានសកម្មវិញ ។ ម្នាក់ទៀតពុំមែនជាសមាជិកឡើយ ហើយខ្ញុំបានជ្រមុជទឹកឲ្យគាត់ ។
មួយឆ្នាំក្រោយមក ខ្ញុំបានទទួលការហៅបម្រើបេសកកម្មទៅ កាលីហ្វូញ៉ា ស.រ.អា. ។ នៅពេលខ្ញុំបានបម្រើ ខ្ញុំបានឃើញដោយឥតសង្ស័យថា នេះគឺដំណឹងល្អដ៏ពិតរបស់ព្រះយេស៊ូវគ្រីស្ទ ។ នៅពេលខ្ញុំបានជួយមនុស្ស ទីបន្ទាល់របស់ខ្ញុំបានកើនកាន់តែច្រើនឡើង ហើយគ្រប់ពេលដែលខ្ញុំអានព្រះគម្ពីរ ខ្ញុំសូត្រខគម្ពីរនៅក្នុងនីហ្វៃទី ៣ នោះជានិច្ច ដើម្បីធ្វើជាពន្លឺដល់ពិភពលោកនេះ ។