ចម្លើយមកពីថ្នាក់ដឹកនាំនៃសាសនាចក្រ
របៀប ទទួលបាននូវពរជ័យនៃព្រះវិហារបរិសុទ្ធ
ដោយ អែលឌើ រ៉ូណល អេ រ៉ាសបាន
ក្នុងកូរ៉ុមនៃពួកសាវកដប់ពីរនាក់
ដកស្រង់ចេញពីសុន្ទរកថានៃការប្រជុំធម្មនិដ្ឋានដែលបានថ្លែងនៅ សាកលវិទ្យាល័យព្រិកហាំ យ៉ង់ ប្រព្រឹត្តិទៅនៅថ្ងៃទី ១០ ខែ កុម្ភៈ ឆ្នាំ ២០០៩ ។ សម្រាប់អត្ថបទទាំងមូលជាភាសាអង់គ្លេស សូមចូលទៅកាន់គេហទំព័រ speeches.byu.edu។
ព្រះវិហារបរិសុទ្ធគឺជាដំណាក់របស់ព្រះអម្ចាស់ ជាកន្លែងដែលការបង្រៀនរបស់ព្រះអង្គសង្គ្រោះរបស់យើងត្រូវបានបញ្ជាក់ជាថ្មីតាមរយៈពិធីបរិសុទ្ធពិសិដ្ឋនានា ដូចជាបុណ្យជ្រមុជទឹក និង អាពាហ៍ពិពាហ៍សម្រាប់មរណជន ដែលចងភ្ជាប់ក្រុមគ្រួសារអស់កល្បជានិច្ច ។
ខ្ញុំផ្តល់អនុសាសន៍ដល់អ្នកថា ការថ្វាយបង្គំនៅព្រះវិហារបរិសុទ្ធគឺជាលំនាំសំខាន់មួយដែលយើងម្នាក់ៗត្រូវដាក់គោលដៅ — ផ្ទាល់ខ្លួន និង ជាគ្រួសារ — នៅពេលអ្នកពិចារណាពីការផ្តោតចិត្ត និង ការយកចិត្តទុកដាក់លើខ្លួនអ្នក នៅពេលអ្នក ដាក់គ្រឹះយ៉ាងរឹងមាំនៅក្នុងជីវិតផ្ទាល់របស់អ្នក ។ ខ្ញុំដឹងថាអ្នកទាំងអស់គ្នាភាគច្រើនបានធ្វើកិច្ចការនេះហើយ ហើយដោយសារកិច្ចការនេះយើងមានអំណរគុណចំពោះអ្នកជាខ្លាំង ។
គណៈប្រធានទីមួយបានចេញនូវការអញ្ជើញមួយដល់សមាជិកទាំងអស់នៃសាសនាចក្រ ដែលវាពិតជាអនុវត្តចំពោះអ្នក និង រូបខ្ញុំ ៖ « នៅពេលណា និង កាលៈទេសៈណាដែលអំណោយផល សមាជិកត្រូវបានលើកទឹកចិត្តឲ្យ ធ្វើកិច្ចការបម្រើនៅក្នុងព្រះវិហារបរិសុទ្ធជាជាងទៅធ្វើសកម្មភាពកម្សាន្តមួយចំនួន » ។
យើងក៏គប្បី ពិចារណាពីពរជ័យដែលបានសន្យា ដោយព្យាការី អ្នកមើលឆុត និង អ្នកទទួលវិវរណៈនៅពេលយើងស្មោះត្រង់ក្នុងការចូលរួមព្រះវិហារបរិសុទ្ធ ។ ប្រធាន ថូម៉ាស អេស ម៉នសុនបានសន្យា ៖ « ចូរមកព្រះវិហារបរិសុទ្ធ ហើយទម្លាក់បន្ទុករបស់អ្នកនៅចំពោះព្រះភ័ក្រព្រះអម្ចាស់ ហើយអ្នកនឹង ពោរពេញដោយស្មារតី និង ទំនុកចិត្តថ្មីនាពេលអនាគត ។ ចូរទុកចិត្តលើព្រះអម្ចាស់ ហើយប្រិសនបើអ្នកធ្វើដូច្នោះ នោះទ្រង់នឹងឱបក្រសោប និង បីត្រកងអ្នក ហើយដឹកនាំអ្នកមួយជំហានម្ដងៗឲ្យដើរនៅលើផ្លូវនោះ ដែលនាំទៅរកនគរសេឡេស្ទាលនៃព្រះ » ។១
ពរជ័យនៃការលួងលោមមួយផ្សេងទៀតនៃការថ្វាយបង្គំក្នុងព្រះវិហារបរិសុទ្ធ គឺជាការធានាអះអាងនៃការការពារ និង ភាពសុខសាន្តពីព្យុះដែលបោកបក់មកលើយើងនាសម័យនេះ ។ កន្លែងសុវត្ថិភាពមួយចំនួនដែលព្រះវរបិតាសួគ៌បានបង្កើតឡើងសម្រាប់ប្រមូលផ្តុំប្រជារាស្ត្ររបស់ទ្រង់នោះគឺក្នុងព្រះវិហារបរិសុទ្ធនៃព្រះអម្ចាស់ ។
ឃ្លាមួយនៅគ្រប់ជញ្ជាំងខាងក្រៅព្រះវិហារបរិសុទ្ធទាំងអស់មានសរសេរ ៖ « បរិសុទ្ធដល់ព្រះអម្ចាស់/ដំណាក់នៃព្រះអម្ចាស់ » ។ ខ្ញុំសូមថ្លែងទីបន្ទាល់ថា ព្រះវិហារបរិសុទ្ធទាំងអស់នៃព្រះអម្ចាស់គឺជាដំណាក់ដ៏ឧដុងឧត្តមរបស់ទ្រង់នៅលើផែនដីនេះ ។ ខ្ញុំសូមអញ្ជើញអ្នកទាំងអស់គ្នាឲ្យ ចូលរួមកាន់តែញឹកញាប់ ទៅតាមកាលៈទេសៈអំណោយផលដល់អ្នក ហើយ ទទួលយកពរជ័យ និង ការការពាររបស់ខ្លួន ដែលបានសន្យាដល់អ្នកដោយព្យាការីរបស់ព្រះ ។