Lotu ʻi he Loto Fakamātoato Moʻoni
Carlos Rene Romero, ʻEla Salavatoa
ʻI he 1960 naʻá ku fetaulaki ai ʻi ha paati mo ha talavou naʻá ne talamai naʻe ʻaʻahi ʻa Sīsū Kalaisi ki he Ongo ʻAmeliká hili ʻEne Toetuʻú. Naʻá ku saiʻia ʻi he fakakaukau ko iá peá u fie ʻilo lahi ange, ko ia ne u kamata fekumi ʻi he ngaahi laipelí mo fehuʻi ʻi he ngaahi tui fakalotu kehekehe ʻi homau kolo tupuʻanga ko Seni Maikolo, ʻEle Salavatoá.
Ne u fekumi ʻi ha meimei taʻu ʻe tolu ka naʻe ʻikai ke u maʻu ha meʻa. ʻI heʻeku talaange ki he kau taki fakalotú ne u fanongo ne hāʻele mai ʻa Kalaisi ki he Ongo ʻAmeliká, naʻá nau talamai kuo kākaaʻi au. Koeʻuhí he naʻe ʻikai maʻu ha fakamatala ʻi heʻeku fekumí, ne faifai peá u tui naʻa nau moʻoni.
ʻI ha ʻaho ʻe taha, ne omi ki hoku ʻapí ha ongo faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea talamai naʻe ʻi ai haʻana pōpoaki maʻa hoku fāmilí. Naʻá ku fehuʻi leva kiate kinaua, “ʻOkú ke ʻiloʻi pe naʻe haʻu ʻa Sīsū Kalaisi ki he Ongo ʻAmeliká?”
Naʻe pehē ʻe ha taha ʻo kinaua, “ʻOkú ma fakamoʻoni ki ai.”
ʻI he momeniti ko iá, naʻá ku ongoʻi ha fiefia lahi ʻi hoku ʻatamaí mo e lotó pea fehuʻi ange, “ʻOku fēfē hoʻo ʻiloʻi iá?”
Naʻá ne toʻo hake ha tohi mei heʻene kató pea pehē mai, “ʻOku mau ʻiloʻi naʻe hāʻele mai ʻa Kalaisi ki heni koeʻuhí ko e tohi ko ʻení, ʻa e Tohi ʻa Molomoná.”
Naʻá ku hohaʻa ko e meʻa ne akoʻi mai ʻe he ongo faifekaú lolotonga e lēsoni ʻuluakí, pea naʻá ku taʻe tui ki he fakamatala ʻo e mata-meʻa-hā- mai ʻa e Palōfita ko Siosefa Sāmita ki he Tamaí mo e ʻAló.
Neongo ia, ne tohoakiʻi ʻeku tokangá ʻe he Tohi ʻa Molomoná, pea naʻe hokohoko atu pē hono akoʻi au ʻe he ongo faifekaú. Naʻá na fehuʻi mai ʻi ha hoʻatā ʻe taha, “Kuó ke lotua ke ʻiloʻi pe ʻoku moʻoni e meʻa ʻokú ma akoʻi atú?”
Naʻá ku talaange kiate kinaua ne u fai ia ka naʻe teʻeki ke maʻu ha tali.
Naʻá na pehē mai, “Kuo pau ke ke lotu ʻi he loto fakamātoato moʻoni.”
Naʻá ku lau ʻa e Tohi ʻa Molomoná ʻi ha ngaahi pō lahi. Ne u lau fekauʻaki pea mo tui ki he hā ʻa Kalaisi ki he kau Nīfaí. Ka ne ʻikai pē ke u lava ʻo tali ʻa e mata-meʻa-hā-mai ʻa Siosefa Sāmitá. Naʻe faingataʻa moʻoni e meʻa ne u fefaʻuhi mo iá.
Ne u tūʻulutui tokotaha he pō ʻe taha pea fakaava hoku lotó ki he ʻOtuá. Naʻá ku talaange kiate Ia naʻá ku fie maʻu ke ʻilo pe naʻá Ne fakahaaʻi moʻoni Ia kia Siosefa Sāmita. Kapau ko ia, naʻá ku palōmesi kiate Ia te u papitaiso ki he Siasí pea tauhi kiate Ia ʻi he kotoa ʻo ʻeku moʻuí.
ʻI heʻeku ʻā hake he pongipongi hono hokó, ne u maʻu e talí ʻo fakafou ʻi he Laumālie Māʻoniʻoní. Naʻe fakaʻatā hoku ʻatamaí, pea fakafonu hoku lotó ʻi he nongá. Mei he momeniti ko iá ki he taimí ni, ne ʻikai ke u toe veiveiua ko Siosefa Sāmitá ko e palōfita moʻoni ʻa e ʻOtuá, ko e Tohi ʻa Molomoná ko ha fakamoʻoni ʻe taha ʻo Sīsū Kalaisí, pea ko Sīsū Kalaisí ko hotau Fakamoʻuí mo e Huhuʻí. ʻOku ou ʻiloʻi naʻe hāʻele mai ʻa Kalaisi ki he Ongo ʻAmeliká hili ʻEne Toetuʻú. ʻOku fiefia hoku laumālié ʻi he ʻilo fakaofo ko ʻeni naʻe akoʻi kiate au ʻi he mālohi ʻo e Laumālie Māʻoniʻoní.