Toʻu Tupú
Ko ha Fakavaʻe ki Heʻeku Fakamoʻoní
ʻOku nofo e tokotaha ʻokú ne fai e talanoá ʻi ʻAitahō, USA.
ʻI hoku taʻu 16, ne tuʻu ange haʻaku kaungāmeʻa ki homau ʻapí mo e ongo faifekaú. ʻI loto ʻi ha māhina ʻe taha mei heʻemau fuofua akoʻí, naʻe mahino ʻaupito ʻa e tali ki heʻeku ngaahi fehuʻí kotoa. Ne u ongoʻi ʻa e fakamoʻoni ʻa e Laumālie Māʻoniʻoní ki hono moʻoni ʻo e ngaahi pōpoaki fekauʻaki mo hono Fakafoki mai ʻo e Ongoongoleleí. Naʻe taʻefakatataua ʻa e ongo ne u maʻú, pea ne u ʻilo ʻoku moʻoni kotoa ia.
Ka neongo iá, ne u aʻusia ha ngaahi fakatanga mo ha fakafepaki lahi ange ʻi ha toe taimi kimuʻa. Naʻá ku ongoʻi tuenoa, helaʻia, mo puputuʻu. Kapau ko ʻeku fai ʻeni e meʻa ʻoku totonú, ko e hā ʻoku ou fetaulaki ai mo ha ngaahi faingataʻa lahi peheé? Naʻe ʻikai ke mahino kiate au pe ʻoku kau lelei fēfē koā hoku ngaahi ʻahiʻahí kiate au. Naʻe akoʻi au ʻe he ongo faifekaú ke u ʻaukai mo lotu, pea naʻa mo e lolotonga ʻo ha ʻaho ako. ʻI he taimi naʻe ʻikai ke u kei lava ai ʻo makātakiʻi iá, naʻá ku fakahaaʻi hoku lotó pea tuaiekemo ʻeku ongoʻi ʻa e fakafiemālie ʻa e Laumālié.
Naʻe fonu faingataʻa ʻa e uike ʻo hoku papitaisó. Naʻe fakamanamanaʻi au heʻeku pule ngāué te ne tuli au ʻo kapau he ʻikai ke u ngāue ʻo fetongi ha taha kae tuku hoku papitaisó, ne u iku ai ki falemahaki koeʻuhí ko ha makamaka ʻi hoku kofuuá, pea talamai ʻe heʻeku ongomātuʻá ke u mavahe mei homau ʻapí. Naʻe lahi mo e ngaahi meʻa naʻe ʻikai ke u lava ʻo mapuleʻi, ko e meʻa pē naʻá ku lava ʻo faí ko e tafoki ki he ʻEikí.
Naʻe iku ʻo hoko ʻa e ʻahiʻahi kotoa pē ko iá ko ha lelei maʻaku. Naʻa nau tokoniʻi au ke u ako fekauʻaki mo e ngaahi tokāteline ʻo e ongoongoleleí, ʻo ne ʻomi ai kiate au ha fakavaʻe ki heʻeku fakamoʻoní.