ʻOku Mau Lea ʻia Kalaisi

Ko hono Fakamolemoleʻi Hoku Husepāniti-Kimuʻá

ʻIkai fakahā e hingoá

Naʻe tokoniʻi au ʻe heʻeku ako ʻa e sīpinga ʻo e ʻofa mo e fakamolemole ʻa Kalaisí ke u ikunaʻi ʻa e mamahi ne u ongoʻi hili ʻeku vete-malí.

Adult woman holding scriptures as she studies. The background is black.

ʻI he taimi ne u fekuki ai mo ha tuʻunga naʻe ʻikai ke u maheni mo iá, ʻi heʻeku fehangahangai mo ha vete-mali ne ʻikai ke u loto ki aí, naʻá ku aʻusia ha mamahi mo ha ongoʻi liʻekina ne teʻeki ke u ongoʻi kimuʻa. Naʻá ku kei taʻu 40 tupu, ʻo fuesia tokotaha pē hono ohi hake ʻeku fānaú ne nau taʻu hongofulu tupu, ngāue taimi kakato, mo totongi e mōkesí. Naʻá ku ongoʻi lōmekina, helaʻia, mo hohaʻa, kae hulu atu ʻa hono fakafonu au e he mamahi taulōfuʻu ne teʻeki ke u ongoʻi kimuʻa.

Koeʻuhí ko hoku fakavaʻe ʻi he ongoongoleleí mo ʻeku holi ke moʻui angatonú, ne u ʻilo kuo pau ke u fakamolemoleʻi hoku husepāniti kimuʻá. Naʻá ku ʻiloʻi ʻoku mahuʻinga ke ʻoua te u fakaangaʻi ia ʻi muʻa ʻi heʻeku fānaú, ka ʻe founga fēfē nai haʻaku tukuange ʻa e ngaahi ongoʻi liʻekina naʻá ne ngaohi au ke u tangi laulau ʻi he mamahí?

Ne u tafoki ki he folofolá ʻi he ngaahi ʻaho kotoa pē hoku mamahí, ʻo fekumi ki ha fakahinohino mei he Laumālié. Naʻá ku fekumi faivelenga he ʻaho mo e pō. Naʻá ku fie ʻilo pe ko e hā e meʻa te u lava fakatāutaha ʻo faí ʻi he taimi mohu fili ko ʻeni ʻo ʻeku moʻuí ke muimui ai ki he sīpinga ʻa e Fakamoʻuí, ʻo tokanga ki Heʻene ui ke u muimui ange kiate Iá.

ʻI heʻeku ako ʻa e ngaahi folofolá, naʻá ku hiki ʻa e ʻulungaanga takitaha ʻo Sīsū Kalaisi ne u fie maʻu vivili ke fakatupulaki ʻi heʻeku moʻuí. Naʻá ku hiki ʻa e ngaahi akonaki mei he ngaahi talanoa mo e ngaahi talanoa fakatātā naʻá Ne vahevahe lolotonga ʻene ngāue fakafaifekau ʻi he māmaní. Naʻá ku tohi ʻa e ngaahi meʻa kau ki he fakamolemolé naʻe ongo ki hoku lotó. Naʻá ku hiki fakalautelau ʻi heʻeku kiʻi tohí ʻa e ngaahi faingataʻa mo e ngaahi ʻahiʻahi naʻe fehangahangai mo e ʻEikí mo e founga naʻá Ne ikunaʻi ai kinautolú.

Hili ha ngaahi taimi naʻá ku ʻiloʻi naʻe toe kovi ange ʻEne mamahí ʻi hoku mamahí, ka naʻá Ne fakamolemoleʻi ʻa kinautolu naʻa nau fakamamahiʻi Iá. Naʻá Ne hoko ko ha sīpinga haohaoa. Naʻe hoko ʻa e kiʻi tohi ko ia ne fonu ʻi he ngaahi lēsoni mei he moʻui ʻa e Fakamoʻuí, ko ha maʻuʻanga ivi lahi kiate au. Ne hoko ko hoku fakaakeakeʻangá. ʻI heʻeku muimui ki Heʻene sīpingá, naʻá ku fakapapauʻi te u kātekina hoku faingataʻá ʻi he lelei taha te u ala lavá. Naʻá ku loto ke kītaki atu ki muʻa ʻi hoku mamahí.

Ne ola lelei ia! Hili ʻeni ha ngaahi taʻu siʻi mei ai, kuo tāpuekina ʻaki au ha vā fetuʻutaki lelei mo hoku husepāniti kimuʻá. Neongo naʻá ne toe mali, naʻe tokamālie ʻa e meʻa hono kotoa ʻi homa vā fetuʻutaki ko e ongomātuʻa ʻo ʻema fānaú. ʻI heʻeku muimui ki he sīpinga ʻa Kalaisí ʻo ʻikai ke fakaangaʻi iá, ne u ikunaʻi ai ʻa e ongoʻi loto mamahí mo e liʻekiná. ʻOku ou lava ʻo ʻofa!

He toki lēsoni mahuʻinga ia kuó u ako lolotonga ʻa e faingataʻa lahi ko ʻení. ʻOku ou fakamālō koeʻuhí ko e sīpinga haohaoa ʻa hoku Fakamoʻuí. Ko ia ʻa hoku mālohingá mo hoku makatuʻungá. Pea ʻoku ʻikai ke u ongoʻi tuenoa. ʻOku ou maʻu ʻa ʻEne ʻofá, ʻEne Fakaleleí, ʻEne sīpinga haohaoá, mo e ʻofa mo e ngaahi tāpuaki ʻo ha Tamai Hēvani ʻofeina.

Fakamolemolé: Ko e Uho ʻo e Ongoongoleleí

“Ko e laumālie ʻo e fakamolemolé pea mo ha tōʻonga fakakaukau ʻo e ʻofá mo e manavaʻofa kiate kinautolu ʻoku nau fai hala mai kiate kitautolú ko e uho moʻoni ia ʻo e ongoongolelei ʻo Sīsū Kalaisí. ʻOku tau fie maʻu kotoa ʻa e laumālie ko ʻení. ʻOku fie maʻu ia ʻehe māmaní kotoa. Naʻe akoʻi ia ʻe he ʻEikí. Naʻá ne tā ʻa e sīpinga ko iá ʻo ʻikai tatau mo hano toe fakahoko ʻe ha taha.”

President Gordon B. Hinckley (1910–2008), “Of You It Is Required to Forgive,” Ensign, June 1991, 2.

ʻE lava fēfē ʻe he ako folofolá ʻo tokoniʻi kitautolu lolotonga ʻa e ngaahi ʻahiʻahí?

“ʻE lava ke fakafiemālieʻi ʻe he folofolá ʻa e laumālie taʻemanongá, ʻo ʻomai ʻa e melinó, ʻamanaki leleí, mo toe fakafoki ʻa e loto falalá ke malava ai ʻe ha taha ʻo ikunaʻi e ngaahi faingataʻa ʻo e moʻuí. ʻOkú na maʻu ʻa e ivi mālohi ke fakaleleiʻi e ngaahi faingataʻaʻia fakaelotó ʻi he taimi ʻoku tau tui ai ki he Fakamoʻuí” (Richard G. Scott, “Ko e Mālohi ʻo e Folofolá,” Liahona, Nōvema 2011, 7).

Fakakaukau ke fai e meʻa naʻe fai ʻe he fefiné ni ke ikunaʻi ʻa ʻene faingataʻaʻiá: ako e ngaahi folofolá ke fekumi ki he ngaahi ʻulungaanga ʻo e Fakamoʻuí mo e niʻihi faivelenga kehé. ʻE lava ʻe heʻenau ngaahi sīpingá ʻo tokoniʻi koe ʻi hoʻo ngaahi faingataʻá pe ngaahi fehuʻí. Kapau ʻokú ke ʻilo ʻa e tefito ʻokú ke loto ke akó—hangē ko ʻení, “Kātaki,” “Fakamolemole”, pe ko e “Faʻa Kātakí”—ʻe lava ʻe he Ko e Fakahinohino ki he Ngaahi Folofolá ʻo fokotuʻu atu ha ngaahi potu folofola ke ke kamata ʻaki.