Ko e Monomono Kilisimasi ʻa e Fineʻeikí
Jed Packer, ʻIutā, USA
Tā fakatātā ʻa Bradley H. Clark
Naʻe hoko ha taha ʻo e ngaahi aʻusia faingataʻa taha ʻo ʻeku moʻuí hili pē ʻa e mālōlō homa ʻofefine taʻu 10 mei he kanisā ʻutó. Naʻe toe mahino ange ʻa e kupuʻi lea “He ʻikai lava ke ke ʻalu kotoa mo ia” ʻi heʻemau vakai holo ʻi hono lokí, ʻi ha hoʻatā Tokonaki ʻe taha.
Naʻe mole atu ʻa Kālisa, ka naʻe kei maʻu pē ʻi hono lokí e ngaahi meʻa ʻilo ngofua ʻo ʻene moʻui ʻi he māmaní. Ne mau fekuki leva he taimí ni mo e fili faingataʻa ko ia pe ʻe fēfeeʻi ʻene ʻū meʻa fakatāutahá. Naʻá ku ʻiloʻi ʻoku ʻikai ko ha meʻa faingofua hono liʻaki ha meʻa ʻe taha, tautautefito ki hoku uaifí.
Ne mau femoʻuekina ʻi hono tokangaʻi e ngaahi meʻa fakafalemahakí, kimó, mo e faitoʻó pea siʻisiʻi ha taimi ke fakamaau mo fokotuʻutuʻu ai.
Ne ake e ngaahi manatú ʻi heʻemau fakamaau e ngaahi meʻa naʻá ne fokotuʻutuʻu ʻi he funga laupapá pe tukuʻanga tohí. Naʻa nau mahuʻinga kotoa—mei hono kafu ʻoku saiʻia taha aí, tohí, pe kahoá ki heʻene fanga kiʻi monumanu vaʻinga moluú, ngaahi tohi fakaakó, mo e pulu ʻakapulú. Naʻe tangi ʻa hoku uaifí ʻi heʻemau ʻeke ange pe ko e hā e meʻa ʻe fai ki he meʻá takitaha.
Ne mau tānaki fakataha e lahi taha ʻo e ngaahi tohi ʻa Kālisá pea ʻave ia ki hono ʻapiako lautohi siʻí ke fakaʻaongaʻi ʻe he fānau kehé. Naʻa mau foaki ʻene toloá ki ha kaungāʻapi. Naʻe foaki ha niʻihi ʻo hono valá ki he niʻihi naʻá ne tokoua ʻaki. Naʻe faingofua ange hono tufa ʻene ʻū meʻá ʻi heʻemau tokanga taha ki he niʻihi kehé.
Hili ha ngaahi uike lahi mei ai, ʻi he ofi mai e Kilisimasí, naʻe kole ange ʻe hoku ongo ʻofefine taʻu hongofulu tupú ki heʻena faʻeé pe te na lava ʻo fakaʻaongaʻi ha niʻihi e vala ʻo Kālisá ke ngaohi ʻaki ha meʻaʻofa Kilisimasi makehe. Naʻá na fili ʻa e vala takitaha ʻo fakatatau ki he manatu mahuʻinga ʻa e fāmilí pea kosi fakalelei leva ha ngaahi tapafā ke fakafofongaʻi e ngaahi taimi mahuʻinga ʻi heʻene moʻuí.
ʻI ha ngaahi ʻaho siʻi kimuʻa he Kilisimasí, naʻá na fakaʻaliʻali mai ha monomono naʻá na ngaohi, fakataha mo hona taki ʻi he Kau Finemuí, ʻa ia naʻá ne tokoni ke na maʻu e fakakaukaú. Naʻá ku ofo ʻi heʻeku sio ki he tapafā tupenú takitaha, ʻa ia naʻá ne fakafofongaʻi ha meʻa ne hoko ʻi he moʻui ʻa Kālisá: ko ha tapafā mei hono vala ʻakapulú, ko ha tapafā mei ha sote ne ma fakatau maʻana ʻi ha ʻeva fakafāmili, ko ha tapafā mei he talausese mohe naʻá ne tui ʻi he fale mahakí. Naʻe fakamanatu mai ʻe he konga mahuʻinga mo fakaʻofoʻofa takitaha, ʻa homau taimi mo iá. Naʻá ku talaange ki hoku ongo ʻofefiné naʻe fakaʻofoʻofa. Naʻá ku ʻiloʻi ʻe saiʻia ai ʻenau faʻeé.
Naʻá ku sio ki ha meʻaʻofa naʻe foaki ʻaki e lotó ʻi he pongipongi Kilisimasi ko iá. Te u manatuʻi maʻu pē e fofonga ʻo hoku uaifí ʻi he taimi naʻá ne fakaava hake ai ʻene meʻaʻofá ʻo sio ki he meʻa naʻe ngaohi ʻe heʻene ongo tamaiki fefiné maʻaná. Talu mei he pō ko iá mo ʻene pulupulu ʻaki pē hono monomono Kilisimasí ʻi he pō kotoa, ʻi heʻene manatu mo fakaʻānaua ki ha ʻaho ʻe toe fakataha ai homau fāmilí—ʻoku ou fakamālō ki he Fakaleleí mo e Toetuʻu ʻa Sīsū Kalaisí.