Ko Hono ʻOmi ʻo e Palaimelí ki ʻApí
ʻOku Tau Manatu mo Hū ki Hotau Fakamoʻui, ko Sīsū Kalaisí
ʻOku nofo ʻa e ongo faʻu tohí ʻi ʻIutā, USA.
Ako lahi ange ki he kaveinga ʻo e Palaimelí ki he māhina ní!
Ne fakahā ʻe he Tamai Hēvaní ki Heʻene kau palōfitá ʻi he kuohilí fekauʻaki mo ha meʻaʻofa maʻongoʻonga ʻa ia te Ne ʻomi ki he māmaní kotoa. Ko e meʻaʻofa ko iá ʻa Hono ʻAlo ko Sīsū Kalaisí, ʻa ia ʻe hāʻele mai ki he māmaní ke hoko ko hotau Fakamoʻuí. ʻE fakahā mai ʻe Sīsū kiate kitautolu ʻa e founga ke tau moʻui ai kae lava ke tau toe foki hake ki he Tamai Hēvaní. Naʻe ʻamanaki fiefia atu ʻa e kau palōfitá ki he taimi ʻe ʻaloʻi ai ʻa Sīsuú.
ʻI he taimi naʻe fakahā ai ʻe he kau ʻāngeló ki he kau tauhisipi ofi ki Pētelihemá, kuo ʻaloʻi ʻa e kiʻi pēpē makehe ʻa ia ko e ʻAlo ʻo e ʻOtuá, naʻa nau ongoʻi ha fiefia lahi. Ne nau fakavavevave atu ke mamata, hū kiate Ia.
Naʻe ʻiloʻi ʻe he kau Nīfaí ʻi he ongo ʻAmeliká, naʻe ʻaloʻi Ia, ʻi he taimi naʻe maama ai e langí ʻi he pō kakato ko iá neongo ne ʻosi tō e laʻaá. Ne nau fuʻu ongoʻi fiefia foki pea nau fakafetaʻi ki he Tamai Hēvaní ʻi he meʻaʻofa ʻo Hono ʻAló.
ʻOku tau manatuʻi mo fakafiefiaʻi ʻi hotau kuongá ni e ʻaloʻi ʻo Sīsū Kalaisí ʻi he taimi Kilisimasí. ʻOku tau fakahaaʻi ʻetau fiefia mo e houngaʻia he meʻaʻofa ʻa hotau Fakamoʻuí ʻi heʻetau muimui ki Heʻene sīpingá ʻaki ʻetau ʻofa ki he niʻihi kehé ʻi he ngaahi founga lahi taha te tau lavá.