Maʻá e Fānau Īkí
Ko Ha Konga ʻo e Kilisimasí he ʻAho Kotoa Pē
ʻOku nofo e tokotaha naʻá ne faʻú ʻi ʻIutā, USA.
Naʻe tuku takai kotoa e ngaahi meʻaʻofá ʻi he lalo ʻakaú. Pe ʻikai?
“Maʻu ha Kilisimasi fiefia ʻaupito! Tufaki e fiefiá ʻi he feituʻu kotoa! (Childrenʻs Songbook, 51).
Naʻe ofi ʻaupito e Kilisimasí. Naʻe fiefia ʻa ʻAmelia. ʻE taimi siʻi pē peá ne lava ke hae e ngaahi meʻaʻofa ʻi he lalo ʻakaú!
Naʻe hokosia e taimi ke fai ai ʻe he Fineʻeikí ʻa e lēsoní ʻi he efiafi fakafāmili ʻi ʻapí.
Naʻe fehuʻi ʻe he Fineʻeikí, “Ko e hā ʻoku tau foaki ai ha ngaahi meʻaʻofa ʻi he Kilisimasí?”
Naʻe pehē ʻe ʻAmelia, ʻKoeʻuhí ko e ʻaho ʻaloʻi ia ʻo Sīsuú!”
Naʻe pehē ʻe he Fineʻeikí, “Pea ʻikai ʻoku totonu ke tau foaki ha meʻaʻofa kiate Ia?”
Naʻe tokoniʻi ʻe he tangataʻeikí e tuongaʻane ʻo ʻAmelia ko Noá ke ne lau ha potufolofola. Naʻe pehē ai ko e taimi ʻoku tau tokoni ai ki he kakai kehé, ʻoku tau tauhi ai ki he ʻOtuá (vakai, Mosaia 2:17).
Naʻe pehē ʻe he Fineʻeikí, “Ko ha meʻaʻofa nai ia maʻa Sīsū ʻa e tokoni ki he niʻihi kehé?”
Naʻe kamo ʻa Noa.
“Toe ʻi ai mo ha meʻa?”
Naʻe pehē ʻe ʻAmelia, “Ko hono tauhi e ngaahi fekaú.”
Naʻe pehē ange ʻe Noa, “Ke angalelei.”
Naʻe pehē ʻe he Fineʻeikí, “Ko e ngaahi fakakaukau lelei ia! Te tau fai leva ha kiʻi vaʻinga. Te u talaatu ha meʻaʻofa naʻe foaki ʻe ha taha kia Sīsū. Fakahā mai kiate au kapau te ke ʻiloʻi pe ko e meʻaʻofa ʻa hai. Tau kamata! Naʻe tufa ʻe he tokotaha ko ʻení ha ngaahi kaati Kilisimasi ʻi he senitā tauhiʻanga mahakí.”
Naʻe hikinima ʻa Noa. “Ko ʻAmelia naʻá ne fai iá!”
“Naʻe ʻalu e tokotaha ko ʻení ʻo fakahoko e faiako fakaʻapí.”
Naʻe pehē ʻe ʻAmelia, “Ko e Tangataʻeikí ia.”
Ne taimi nounou pē kuo nau fakahā ha ngaahi meʻaʻofa lahi kuo ʻosi foaki ki he Fakamoʻuí.
Naʻe pehē ʻe he Fineʻeikí, “Te tau lava ʻo foaki ha ngaahi meʻaʻofa ʻi he ʻaho kotoa pē.”
ʻI he pongipongi hono hokó kuo taimi ke fakamaʻa e falé. Naʻe laulau ʻa ʻAmelia ʻo pehē, “ʻOiauē ʻikai.” Ka naʻá ne manatuʻi. Ko ha meʻaʻofa e tokoni ki he niʻihi kehé! Kapau naʻá ne tokoni ki he Fineʻeikí, ʻe tatau pē ia mo e tokoni kia Sīsuú. Naʻá ne maʻu ha konga tupenu pea holoholoʻi ʻa e ngaahi funga kānitá kae ʻoua kuo nau ngingila.
ʻI he ʻaho hono hokó naʻe maʻu ʻe ʻAmelia ha paʻanga.
Ne pehē ʻe he Fineʻeikí, “ʻOku seniti ʻe valu hoʻo vahehongofulú.”
Naʻe toe manatuʻi ʻe ʻAmelia. Ko e vahehongofulú ko ha fekau, ko ia ko ha meʻaʻofa hono totongi iá. Naʻá ne faʻo e seniti ʻe valú ʻi heʻene siā vahehongofulú.
ʻI he konga kimui ʻo e uike ko iá naʻe tokoni ʻa ʻAmelia ke tānaki e ngaahi piló. Naʻe tolo kinautolu ʻe hono kiʻi tuongaʻane valevalé mei he seá. Naʻá ne pehē, “Ko ha meʻaʻofa ʻe taha maʻa Sīsū.”
ʻI he Efiafi kimuʻa he Kilisimasí, naʻe fakahā ange ʻe he Fineʻeikí mo e Tangataʻeikí naʻá na laukau ʻaki ia. Naʻe pehē ʻe he Tangataʻeikí, “Kuó ke foaki ha ngaahi meʻaʻofa kia Sīsū ʻi he uiké kotoa. ʻOku hangē ia ko e ʻi ai ʻo ha kiʻi konga ʻo e Kilisimasí ʻi he ʻaho kotoa peé.”