Vakai ki Loto!
Naʻe fakatau ʻe heʻeku ongomātuʻá ha puha fonu ʻi he ngaahi Tohi ʻa Molomona ke foaki ki he kakaí kimuʻa ʻi he Kilisimasí. Ko e taimi ia naʻá ku maʻu ai ʻa e fakakaukau ke ʻave ha niʻihi ki he akó pea foaki kinautolu ko e ngaahi meʻaʻofa ki haʻaku kau faiako ʻe toko tolu.
ʻI heʻeku aʻu atu ki he loki ako mūsiká, naʻá ku sio ki heʻeku faiako mūsiká peá u fakakaukau, “Fai ia Sōfia. ʻAve ha taha ki ai!” Naʻá ku luelue māmālie hake ki heʻeku faiakó. Ka naʻe ʻikai ke u maʻu ʻa e loto-toʻa ke foaki kiate ia e tohí.
Ne u ʻalu ki ha kiʻi tuliki ʻo e lokí ʻo lotu fakalongolongo ai. “Tamai Hēvani, ʻoku ou kole ki Hoʻo ʻAfió ke tokoni ke u foaki ʻa e tohí ni ki heʻeku faiakó.” ʻI he ʻosi ʻeku lotú, naʻá ku ongoʻi mālohi ke u foaki e tohí kiate ia. Fakafokifā kuó u maʻu ha loto-toʻa.
Ne u ʻalu atu ki ai. Naʻá ne sio mai kiate au, pea naʻá ku ʻoange kiate ia ʻa e Tohi ʻa Molomoná mo pehē ange, “Faiako, ʻoku ou ʻofa kiate koe ʻaki e kotoa hoku lotó, pea ʻoku ou fie ʻoatu e Tohi ʻa Molomona ko ʻení!”
Naʻá ne toʻo hake ia ʻo sio ki he takafí. Naʻá ku pehē ange, “Vakai ki loto!” Naʻá ne fakatokangaʻí kuó u tohi ai ha ngaahi lea siʻi.
Naʻá ne fāʻofua kiate au mo pehē mai, “ʻE Sōfia, mālō hono foaki mai ʻeni kiate aú!”
Hili ʻeku tangutu ki laló, naʻá ne pehē ki he kalasí, “Sio ki he meʻa ne foaki mai ʻe Sōfia kiate aú. Te u lau ia ʻi he ngaahi ʻaho mālōloó!”
ʻI heʻeku aʻu atu ki ʻapí, naʻá ku lele ki heʻeku faʻeé mo pehē ange, “ʻOkú ke ʻilo ha meʻa! Ne u ʻoange ha Tohi ʻa Molomona ki heʻeku faiakó.”
Naʻá ne malimali mo pehē mai, “ʻOku lelei ia! Ko ha faʻifaʻitakiʻanga lelei koe kiate au, Sōfia.”
Naʻá ma fakakaukau ke lotu ʻo fakamālō ki he Tamai Hēvaní ʻi Heʻene tuku mai ʻa e loto-toʻa ke foaki ki heʻeku faiakó e Tohi ʻa Molomoná.