Ko e Fuofua Kilisimasí
ʻOku nofo ʻa e tokotaha naʻá ne faʻú ʻi ʻIutā, USA.
ʻE lava ke ke fakahoko e tulama ko ʻení mo ho fāmilí, kaungāmeʻá, pe kalasi Palaimelí. Lau e Luke 2:1–16 ke tokoniʻi koe ke ke teuteu.
Hivá: “Fononga ʻa Siosefa ki Pētelihemá,” veesi ʻuluakí (Tohi Hiva ʻa e Fānaú, 22).
Mele: ʻOku ou fakaʻamu ʻe vavé ni pē hano maʻu ha feituʻu ke ta nofo ai. Kuo fuoloa fau ʻeta fonongá.
Siosefa: ʻOku ʻi ai ha fale tali-fononga ʻi muʻa. Tatali mo mālōlō heni ka u ʻalu ʻo vakai pe ʻoku ʻatā ha loki maʻataua.
[ʻOku tokoni ʻa Siosefa kia Mele ke tangutu ki lalo pea tukituki leva ʻi he “matapaá.” ʻOku tali mai ʻe he tauhi fale tali-fonongá.]
Tauhi fale tali-fonongá: Ko e hā ʻokú ke fie maʻú?
Siosefa: ʻOku ou fekumi ki ha feituʻu ke nofo ai. Kuó ma fononga mamaʻo mai mo hoku uaifí, pea ʻokú ma fie maʻu ha feituʻu ke ma mohe ai.
Tauhi fale tali-fonongá: Kātaki fakamolemole, ka ʻoku fonu e fale tali-fonongá.
Siosefa: Kātaki, he ʻikai lava nai ke ke fai ha meʻa ke tokoni mai kiate kimaua? ʻOku ʻamanaki ʻe vavé ni pē ke fāʻeleʻi ʻe hoku uaifí ha pēpē.
Tauhi fale tali-fonongá: Mahalo pē te mo lava ʻo mohe ʻi he ʻaiʻangakai ʻo e manú. Ko e feituʻu pē ia ʻoku ou maʻú.
Siosefa: Mālō ʻaupito. ʻOku lelei ʻaupito ia.
[ʻOku ʻalu ʻa Siosefa ʻo tokoniʻi ʻa Mele ke tuʻu ki ʻolunga.]
Siosefa: ʻOku ʻikai ha loki ʻi he fale tali-fonongá, ka naʻe pehē ʻe he tauhi fale tali-fonongá te ta lava ʻo mohe ʻi he ʻaiʻangakai ʻo e manú.
Mele: ʻOi, ʻoku ou fiefia ʻaupito ʻoku maʻu ha feituʻu ke ta mohe ai he poó ni.
[ʻOkú na lue ki he ʻaiʻangakai ʻo e manú. ʻOku tangutu hifo ʻa Mele mo Siosefa ki lalo, pea ʻoku ʻosi ʻa e konga ko iá.]
Hiva: “Fononga ʻa Siosefa ki Pētelihemá,” veesi uá mo e tolú (Tohi Hiva ʻa e Fānaú, 22).
[ʻOku tokangaʻi ʻe he kau tauhisipí ʻenau fanga sipí. ʻOku haʻu ʻa e ʻāngeló, pea ʻoku tō tūʻulutui ʻa e kau tauhisipí.]
Tauhisipi 1: Ko hai koe?
Tauhisipi 2: Kātaki ʻoua te ke fakamamahiʻi kimautolú.
ʻĀngelo: ʻOua te mou manavasiʻi. ʻOku ou ʻomi ʻa e ongoongo fakafiefia! Naʻe ʻaloʻi he pooni ʻa e ʻAlo ʻo e ʻOtuá ʻi Pētelihema. Te mou ʻilo ʻa e pēpeé ʻokú ne tokoto ʻi ha ʻaiʻangakai ʻo e manú.
Tauhisipi 1: Tau ʻalu he taimí ni ʻo mamata ki he valevale ko ʻení.
ʻĀngelo: Fakafetaʻi ki he ʻOtua ʻi ʻolungá, pea ʻi māmani ʻa e melinó, ko e ʻofa ki he kakaí.
Hiva: “Ngaahi Fetuʻu Ne Uló” (Tohi Hiva ʻa e Fānaú, 24).
[ʻOku ʻalu e kau tauhisipí ki he fale tali-fonongá pea tukituki ʻi he “matapaá.” ʻOku tali mai ʻe he tauhi fale talifonongá.]
Tauhisipi 2: Kuo mau omi ke mamata ki he valevale ko Kalaisí.
Tauhisipi 1: Naʻe fakahā mai ʻe ha ʻāngelo te Ne tokoto ʻi ha ʻaiʻangakai ʻo e manú.
Tauhisipi 2: ʻOkú ke ʻilo nai e feituʻu ʻokú Ne ʻi aí?
Tauhi fale tali-fonongá: Naʻe fanauʻi ha valevale he pooni ʻi heʻeku ʻaiʻangakai ʻo e manú. Te u fakahā kiate kimoutolu e halá.
[ʻOku muimui e kau tauhisipí ʻi he tauhi fale tali-fonongá ki he ʻaiʻangakai ʻo e manú, ʻa ia ʻoku tangutu ofi ai ʻa Siosefa mo Mele ki he ʻaiʻangakai ʻo e manú mo e valevale ko Sīsuú ʻi loto.]
Tauhisipi 1: ʻOku moʻoni ia! ʻOku ʻi ai moʻoni ha pēpē ʻoku tokoto ʻi ha ʻaiʻangakai ʻo e manú, ʻo hangē pē ko hono talamai ʻe he kau ʻāngeló.
Tauhisipi 2: Ko e Fakamoʻuí moʻoni ʻeni, ko Kalaisi ko e ʻEikí.
[ʻOku tūʻulutui takatakai e kau tauhisipí mo e tauhi fale tali-fonongá ʻi he ʻaiʻangakai ʻo e manú.]
Hiva: “Pō Mālū” (Ngaahi Himí, fika 113).