“Ko e hā te u lea ʻaki ki he kakai teʻeki siasi ʻoku nau fehuʻi mai pe ko e hā e ʻuhinga ʻoku ʻikai ke moʻui ʻaki ai ʻe he kāingalotu ʻe niʻihi ʻo e Siasí ʻa ʻetau ngaahi tuʻunga moʻui totonú?”

ʻE lelei ka moʻui kakato ʻaki ʻe he mēmipa kotoa ʻo e Siasí e ongoongoleleí. He ʻikai ngata pē ʻi haʻanau maʻu ha ngaahi tāpuaki lahi ange ʻi heʻenau moʻuí ka te nau toe hoko foki ko ha sīpinga maʻongoʻonga kiate kinautolu ʻoku nau feohí. Ka ʻoku tau kei matelie pē, pea ʻoku tau tōnounou kotoa ʻi ha ngaahi meʻa. Ko e tefitoʻi ʻuhinga ʻoku moʻui kakato ʻaki ai ʻe ha niʻihi ʻa e ongoongoleleí ʻi he toengá he ʻoku tau ʻi ha ngaahi tuʻunga kehekehe ʻi heʻetau uluí pea ʻi he mālohi ʻo ʻetau ngaahi fakamoʻoní. ʻOku kehekehe hotau ngaahi ʻahiʻahí mo ʻetau ngaahi maʻuʻanga tokoní pea mo e kakai ke tokoni maí.

Mahalo he ʻikai mahino ki he kakai teʻeki Siasí ʻa e ngaahi foʻi lea hangē ko e “uluí” mo e “fakamoʻoní,” ka ʻe mahino kiate kinautolu ʻe lava ʻa e tangata takitaha ʻo fili e founga ke moʻui aí. Te ke lava ʻo fakamatala ange naʻe fakataumuʻa e Tamai Hēvaní ke pehē. Naʻá Ne foaki mai ʻetau tauʻatāina ke filí ke tau lava ʻo tupulaki fakalaumālie ʻi heʻetau fili e totonú. Ka naʻe toe ʻafioʻi foki ʻe he Tamai Hēvaní ko e taha kotoa pē—tuku kehe pē ʻa Sīsū Kalaisi—te ne fai ha ngaahi fehālaaki, ko ia naʻá Ne ʻomi ai ha Fakamoʻui maʻatautolu. Koeʻuhí ko e Fakaleleí, te tau lava leva ʻo fakatomala, fakamolemoleʻi, ako mei heʻetau ngaahi fehālākí, pea mo hoko atu ʻi he moʻuí.

Te ke lava foki ʻo fakamatala ʻoku ʻikai ke tau fakamāuʻi kinautolu ʻoku ʻikai ke nau muimui ki he ngaahi tuʻunga moʻui totonu ʻo e Siasí. Ka, ʻoku tau feinga ke tokoniʻi kinautolu, maʻu ha mahino kiate kinautolu, pea mo kātekina kinautolu. Neongo ʻoku ʻikai ke tau fakaoleoleʻi ʻa e angahalá, ʻoku ʻikai ke tau tukuakiʻi ʻa e taha faiangahalá (vakai, Sione 8:11). ʻOku kei ʻatā pē ʻa e fakatomalá kiate kitautolu kotoa.

Fekumi ʻi he Ngaahi Folofolá

ʻE lava ke maʻu ʻa e tali ki he fehuʻí ʻi he ngaahi potufolofolá. Ko e taimi ʻoku ʻikai tauhi ai ʻe he kakaí ʻa e ngaahi fekaú, ʻoku totonu ke tau fakaʻehiʻehi mei he loto fakamāú (vakai, Mātiu 7:1). ʻOku pehē ʻe he Loma 3:23, “He kuo faiangahala kotoa pē, pea tōmui ʻi he fakamālō mei he ʻOtuá.” Neongo ia, ʻoku moʻoni, ʻoku totonu ke feinga ʻa e kāingalotu ʻo e Siasí ke nau talangofua.

Metisoni M., taʻu 13, Tekisisi, USA

Akoʻi fekauʻaki mo e Fakaleleí

Ko e taimi ʻoku lea ʻaki ai ʻe he kakaí ha ngaahi meʻa hangē ko iá, ʻoku ʻikai ke u fakamāuʻi e mēmipa ʻoku ʻikai muimui he ngaahi tuʻutuʻuní, ka ʻoku ou fakaʻaongaʻi ia ko ha faingamālie ke akoʻi fekauʻaki mo e Fakaleleí. ʻOku ou talaange kiate kinautolu ʻoku ʻikai ʻuhinga ʻetau hoko ko e Kau Māmongá ʻoku tau haohaoa pea ʻoku tau maʻu ʻa e Fakaleleí koeʻuhí ke tau lava ʻo fakatomala mei heʻetau ngaahi angahalá mo fakaleleiʻi e ngaahi fehālaaki ko iá. ʻOku faʻa fakaava ʻe he meʻá ni ha matapā ki ha ngaahi fehuʻi lahi ange.

Seiti, taʻu 16, ʻOlikoni, USA

ʻOku Akoʻi Kitautolu ʻe he Siasí ke Tau Failelei

ʻOku tatau e kāingalotu ʻo e Siasí mo e taha kehe kotoa pē ʻo foua e ngaahi faingataʻá mo e ngaahi ʻahiʻahí. ʻOku tau maʻu kotoa ha ngaahi vaivaiʻanga, ka ʻoku ʻikai ʻuhinga ai ia ʻoku ʻikai moʻoni e Siasi ko ʻení. Ko e Siasi ʻeni ʻo Sīsū Kalaisí, ʻokú ne tokoniʻi ʻa e kakaí ke nau ʻilo ʻa e ongoongolelei moʻoní mo maʻu ʻa e hakeakiʻí. Ko e tangata fakakakanó ʻoku talangataʻa ki he ngaahi fekaú (vakai, Mōsaia 3:19), pea ʻoku ʻikai ko ha foʻui ia ʻo e Siasí. ʻOku akoʻi kitautolu ʻe he Siasí ke tau fai e ngaahi ngāue leleí. Ka ʻoku tau takitaha fai kotoa pē ha fili.

Lavinia S., taʻu 19, Pulakani, ʻOtu Filipainí

Ko e Ngaahi Tuʻunga Moʻuí ke Tau Lelei Ai

Naʻe ongo moʻoni kiate au e fehuʻí ni koeʻuhí he ʻoku ou ʻilo ha niʻihi ne nau fai ha ngaahi fili naʻá ne ʻave ai kinautolu mei he ongoongoleleí. ʻOku foaki mai ʻe he ʻEikí e ngaahi fekaú ke tau fiefia pea mo “fakahoko ʻa e moʻui taʻefaʻamate mo e moʻui taʻengata ʻa e tangatá” (Mōsese 1:39). ʻOku fie maʻu ʻe he ʻEikí ke tau toe foki ange kiate Ia; neongo ia, ʻoku finangalo ke tau fai ʻe kitautolu ʻa ʻetau filí. Ko e ʻuhinga ia ʻoku ʻi ai ai ha niʻihi ʻoku ʻikai ke nau moʻui ʻaki ʻetau ngaahi tuʻunga moʻui totonú. ʻOku tokoniʻi fakafoʻituitui au ʻe he ngaahi tuʻunga moʻui totonú koeʻuhí he ʻoku ou ʻilo kuo ʻosi foaki mai ʻe he Tamai Hēvaní kinautolu kiate au ke u lava ʻo toe foki ʻo nofo mo Ia mo fiefia. Ko e fakamoʻoni kinautolu ʻo ʻEne ʻofa kiate aú.

Mōkeini D., taʻu 18, Languitou-Lusiloni, Falanisē

Lotua Kinautolu mo ʻAʻahi Kiate Kinautolu

Mahalo ʻoku ʻikai ke maʻu ʻe he kāingalotu ʻoku ʻikai ke nau moʻui ʻaki ʻetau ngaahi tuʻunga moʻui totonú ha fakamoʻoni ʻoku fakatefito ʻia Sīsū Kalaisi. ʻOku totonu ke tau lotua kinautolu, mo feinga ke maʻu e fakahinohino ʻa e Laumālié pea te nau lava leva ʻo maʻu haʻanau fakamoʻoni. ʻOku totonu ke tau ʻaʻahi ki he kakai ko ʻení mo tokoniʻi kinautolu ke nau omi kia Kalaisi.

ʻOnitulei C., taʻu 13, Lima, Pelū

Hoko ko ha Faʻifaʻitakiʻanga

ʻOku mātuʻaki mahuʻinga ʻa e Siasí ni ke ne tokoniʻi ke tau fakahoko e ngaahi fekau ʻa ʻetau Tamai Hēvaní pea toe nofo fakataha mo Ia. Ka ʻoku ʻikai ʻuhinga e ʻosi kau ʻa ha taha ia ki he Siasí ʻe hoko maʻu ai pē ko ha taha lelei. Vakai ki hotau māmaní he ʻahó ni, fonu ʻi he angahalá mo e ngaahi angahala palakuú, neongo ʻoku fakafonu ʻaki e māmaní ha kakai ne nau fili ʻi he moʻui ki muʻa ʻi he māmaní ke muimui ʻia Sīsū Kalaisi. Te u pehē ko e meʻa lelei taha te tau lava ʻo faí ke tā ha sīpinga maʻa hotau ngaahi kaungāmeʻá.

Kāteni S., taʻu 15, ʻIutā, USA

Moʻuiʻaki ʻEtau Ngaahi Tuʻunga Moʻui Totonú

ʻOku ʻi ai ha kakai ʻoku līʻoa pe siʻi ange ʻenau līʻoá, ʻo tatau mo ha toe faʻahinga kautaha pe tui fakalotu kehe pē. Kuo pau pē ke tau moʻuiʻaki ʻetau ngaahi tuʻunga moʻui totonú ki he lelei taha te tau lavá pea fakaʻānaua mo lotu ʻe pehē mo e toengá.

Māleni S., taʻu 16, ʻAlesona, USA