ʻE Foki Mai ʻa Mātiu?

ʻIkai fakahā e hingoá

Ne mau maʻu ha kulupu ʻo ha kau talavou mālohi ʻi homau uōtí, ka naʻe maheni ʻema tamasiʻi ko Mātiú mo ha taha naʻe ʻikai Siasi naʻe manako tatau mo ia ʻi he kaá mo ha faʻahinga meʻa fakamakēniki pē. Meʻapango, he naʻe haʻu ʻa e talavoú ni mei ha fāmili naʻe ʻikai ke nau fakamahuʻingaʻi ʻa e meʻa fakalotú. Naʻe fakangofua ia heʻene ongomātuʻá ke inu mo ifi ʻi honau ʻapí pea naʻe ʻikai ke na tui ʻoku mahuʻinga ʻa e moʻui angamaʻá.

Naʻe ʻosi ngāueʻi ʻe Mātiu ʻa e tuʻunga māʻolunga taha ʻi he Sikautí, ka naʻe ʻikai ke kau ʻi he fakataha foaki palé koeʻuhí he naʻe ʻikai ke ne toe moʻuiʻaki e ngaahi tuʻunga moʻui ʻo e Sikautí. Naʻá ku tānaki kotoa hono ngaahi fakalāngilangi ʻi he Sikautí mo faʻu ha puha ke fakaʻaliʻali ai. Hili ia peá u faʻo leva, mo ʻamanaki ʻe ʻi ai ha ʻaho ʻe mahuʻinga ai ki ai. ʻI he hoko hono taʻu 16, naʻe ifi, inu, mo ngāueʻaki ʻe Mātiu e faitoʻo kona tapú. Naʻe nofo leva mei he akó pea hiki ʻo nofo mo hono kaumeʻa fefiné. Naʻe tātātaha ke mau toe sio ki ai ʻi ha taʻu ʻe ua.

Naʻá ma lotomamahi. Naʻe ʻikai ke ma ʻilo pe ʻe toe foki mai ki hono fāmilí mo e tuí, ka naʻá ma pehē ke ma muimui he sīpinga ʻa ʻAlamaá ʻi heʻene meʻa naʻe fai ki hono foha naʻe heé. Naʻe kei ʻofa pē ʻa ʻAlamā ʻi hono fohá mo lotu ʻi he tui ke “lava nai ʻo maʻu ha ʻilo ki he moʻoní” (Mōsaia 27:14).

Naʻa mau lotu maʻu pē ke tokoni ʻa e ʻEikí ki he moʻui ʻa Mātiú, pea naʻá ma ngāueʻaki e faingamālie kotoa pē ke fakahaaʻi ai ʻi he leá mo e tōʻongá e lahi ʻema ʻofa aí. Ko e taimi naʻe haʻu ai ki ʻapí, naʻe ʻikai ke ma leaʻaki ha faʻahinga meʻa te ne ala fakaʻuhingaʻi ko ha fakaanga pe fakamāuʻi. Naʻá ma fakahaaʻi pē ʻema fiefia ke sio ki aí.

Naʻe foki mai ʻa Mātiu ʻi ha ʻaho ʻe taha ʻo talamai ʻoku fie talanoa. Naʻá ne pehē kuo fetaulaki mo ha taʻahine ʻi ha paati naʻe ʻi ai haʻane ngaahi fehuʻi fekauʻaki mo e Siasí. Kimuʻa peá ne talaange ki ai ʻoku ʻikai ke ne toe ʻilo e talí, kuo kamata ke haʻu e ngaahi leá ia mei hono ngutú. Naʻá ne fakatokangaʻi naʻá ne tali ʻene ngaahi fehuʻí ʻo vave tatau pē mo ʻene ʻeke maí. Naʻe pehē ʻe Mātiu naʻe ʻikai ke ne manatuʻi ʻe ia haʻane ako e ngaahi meʻa naʻá ne leaʻakí, ka naʻá ne ʻilo ko ʻene leá naʻe moʻoni. Naʻe fakakaukau ai pe ko e hā ʻoku moʻui pehē ai kae lolotonga iá naʻá ne kei tui ki he ongoongoleleí.

Hili ha ʻaho ʻe tolu mo ʻene fekuki mo hono lotó, naʻe fakakaukau leva ke siʻaki ʻa e faʻahinga moʻui naʻe ʻi aí. Kuo foki mai ai ki ʻapi ke kole tokoni ke toe kamata foʻou.

Naʻe telefoni leva ʻa Mātiu ki ha taha naʻá ne tokoua ʻaki ʻi ha siteiti ʻe taha ka kuó ne lavaʻi ha ngaahi faingataʻa tatau, ʻo kole pe ʻe lava ke na nofo. Naʻe loto ki ai e tokotahá ni, pea kamata ʻalu leva ʻa Mātiu ki he ngaahi houalotu ʻa e Siasí mo ia pea talanoa mo e pīsopé ke maʻu ha tokoni ʻi he fakatomalá. Naʻá ne ongoʻi ha ʻofa mo ha poupou pea naʻe mālohi leva ʻi he Siasí.

Ne aʻu ki ha taimi ne fetaulaki ai mo ha finemui hoihoifua mo angatonu. Naʻá na feʻofaʻaki pea na mali ʻi he temipalé.

Ko e taimi naʻe fāʻeleʻi ai ʻena ʻuluaki pēpeé, naʻá ku haʻu ʻo ʻaʻahi peá u ʻomai ʻa e kiʻi puha fakaʻaliʻali naʻá ku faʻu ki hono ngaahi pale he Sikautí. Naʻe fiefia peá ne tautau fiefia ia ʻi ha feituʻu naʻe ʻilongofua ʻi hono ʻapí.

Naʻe ʻikai ke hā ha ʻāngelo ki heʻema tamasiʻí, ʻo hangē ko ia naʻe hoko kia ʻAlamā ko e Siʻí. Ka ko e foki mai ʻa Mātiu ki he moʻoní naʻe fakaofo tatau pē.