Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. ʻOku ʻoatu heni ha fakakaukau ʻe ua.

“Ko e Hoko ko ha Faifekau Malangaʻaki ʻEku Ongoongoleleí,” peesi 46: Fakakaukau ke mou aleaʻi mo e fāmilí ha ʻulungaanga ʻe nima ʻo e kau faifekaú ʻi he Malangaʻaki ʻEku Ongoongoleleí. Pea feinga leva ke ʻahiʻahi fakahoko e ngaahi tefitoʻi moʻoní. ʻE lava ke mou vakaiʻi nounou ha konga ʻo e Malangaʻaki ʻEku Ongoongoleleí pea tuku ke taufetongi e kau mēmipa ʻo e fāmilí ʻi he konga ki hono akoʻi e ngaahi lēsoni ngāue fakafaifekaú, kae hangē pē toenga ʻo e fāmilí ko ha kau fiefanongó. ʻE lava ke mou aleaʻi e ngaahi faingataʻa ʻo e ngāue fakafaifekaú pea mou fevahevaheʻaki ha ngaahi founga ke fakatupulaki ʻaki e ngaahi ʻulungaanga ne fakamatalaʻi ʻe ʻEletā Tēvita A. Petinaá.

“Ke ke Toʻa, Ke ke Moʻui Lelei, Ke ke Poto,” peesi 52: Hili hoʻo vakaiʻi e fakamatala ʻa ʻEletā ʻŌkoá, fakakaukau ke palani ha ʻekitivitī ʻe lava ai e kau mēmipa ʻo e fāmilí ʻo fakamālohisino fakataha. Te mou lava ʻo fai ha vaʻinga pe luelue. Fakapapauʻi ke fokotuʻutuʻu e ʻekitivitií fakatatau mo e taʻú mo e meʻa ʻe lava ʻe he kau mēmipa ʻo e fāmilí (hangē ko ʻení, te ke lava ʻo kole ke tokoni e fānau lalahi angé ʻi hono fakahoko e ʻekitivitií ʻe he fānau iiki angé). Hili hoʻomou ʻekitivitií, aleaʻi fakafāmili ʻa e ʻaonga ʻo e moʻui longomoʻui fakaesinó. Te mou lava foki ke palani ha ngaahi founga ke mou kei ngāue fakafāmili ai ke muimui ʻi he faleʻi hotau kau palōfita moʻuí ke tokangaʻi hotau sinó.

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.

Tā fakatātā ʻo e ʻatá ʻe Craig Dimond