Naʻá Ne ʻEke Mai Ia Kiate Au?
Naʻá ku tangutu pē ʻo sio fakamamaʻu ʻi heʻeku taʻetuí kae tatali ʻa Misa Sāmani, ko e mēmipa ʻo e kau palesitenisī fakakoló, ki heʻeku tali ʻe faí.
Mahalo pē naʻe ʻuhingá ke ne talamai ko e faiako pe tokoni. Ka naʻe ʻikai. Naʻe tonu pē meʻa ne u fanongo ki aí; naʻá ne ui au ko e palesiteni Fineʻofa ʻi homau kiʻi koló.
Naʻá ku tangutu fakalongolongo ʻo fakakaukau ki he tuʻunga naʻá ku ʻi aí. Naʻá ku taʻu 27 pea teʻeki ai ke u mali. Naʻá ku toki hiki mai pē ki he feituʻú pea kamata he ngāue foʻou ko ha taha faiongoongo. Naʻe ʻikai ke fuʻu lahi ʻeku ʻilo fakatakimuʻá. Ne u ʻosi fua ha ngaahi fatongia he ngaahi taʻu lahi kae teʻeki pē ha fatongia peheni.
Ne u fehuʻi pē kiate au pe ne u matuʻotuʻa pe taukei feʻunga nai pe lava ke fai e ngāué. Ko e hā ha meʻa te u lava ʻo fai maʻá e kakai fefine ʻo e koló?
Ne u foki ki ʻapi he pō ko iá, tūʻulutui ʻo lotu, pea kole ha fakahinohino mei he Tamai Hēvaní. Hili ʻeku lotú, naʻe ongo mālohi ke u sio ki hoku tāpuaki fakapēteliaké. Naʻá ku lau e foʻi sētesi ko ʻení: “ʻOkú fie maʻu ke ke fai e ngāue naʻe vahe atu kiate koé, neongo hoʻo kei talavoú.”
ʻI heʻeku lau e ngaahi lea ko iá, naʻe mahino ʻoku ʻikai kau ia ki haku tuʻunga fakamali, taʻu motuʻá, pe meʻa te u lavá. Ka ʻoku fekauʻaki ia mo e meʻa naʻe fie maʻu ʻe he ʻEikí ke u faí. Naʻá ku tali leva ʻa e fatongiá.
Naʻá ku lava ke tokoni ki he kakaí ʻi hoku uiuiʻí neongo e kehekehe homau puipuituʻá. Ko e taha e kau fefine ko ia naʻe tataki au ʻe he ʻOtuá ke tokoniʻí ko ha fefine naʻe taʻu uofulu tupu lahi, ko ha faʻē teʻeki ke mali mo e fānau ʻe toko ua. Naʻe ʻikai ke fuoloa kuó u ʻiloʻi ʻa e kehekehe ʻema sīpinga moʻuí. Naʻe ʻikai ke u fakapapauʻi pe ko e hā e founga te u hoko ai ko hono kaungāmeʻá, ka naʻe ʻalu pē taimí mo ʻema hoko ko ha kaungāmeʻá.
Ne u feʻiloaki mo ha fefine naʻe māmālohi. ʻOku ou manatuʻi e fuofua taimi ne mau hūfia ai hono ʻapí mo e ongo faifekaú ʻo ʻiloʻi ʻoku ʻi ai ʻene fakamoʻoni; naʻá ne fie maʻu pē ke kiʻi “tafunaki” kae lava ʻo toe ulo lahi ange. ʻI heʻemau tangutu he loki talanoá ʻo fanongo kiate iá, naʻe mālohi e ueʻi ʻa e Laumālié ke mau fakamoʻoni ki he Fakalelei ʻa Sīsū Kalaisí.
ʻI he ngaahi māhina hono hokó naʻe fetōʻaki pē ʻene maʻulotú. Ka naʻe hokohoko atu hono tataki au ʻe he Laumālié ke fai ʻeku fakamoʻoní. ʻI he ʻahó ni ʻokú ne ngāue mālohi pea tokoni ʻi he koló.
Ko e niʻihi ia e ngaahi meʻa mahuʻinga ʻi he fatongiá, ka naʻe lahi ʻaupito hono ngaahi polé. Ko ha fefaʻuhi ke ongoʻi pe ʻoku feʻunga e meʻa ʻoku ou faí, ke potupotutatau e lotú mo e ngāué, peá ke ikunaʻi e ongoʻi taʻefeʻungá.
Ne u toki fakatokangaʻi ko e lahi e meʻa ne u malava ke faí naʻe fou ia he Laumālié. Kuo ʻosi tukuange au mei he fatongiá peá u hiki mei he kolo ko iá. Ka ʻoku ou fakakaukau maʻu pē ki he anga hono tākiekina au mo e kau fafiné ʻe he fatongia ko iá—pea mo aú. Pea ne fakafou mai he ʻilo ko iá kiate au, ko ha fefine tāutaha kei talavou, ʻoku ʻi ai ha meʻa te u lava ke fai maʻá e niʻihi kehé ʻo mau tupulaki fakataha ai ʻi he ongoongoleleí. Neongo naʻá ku ongoʻi taʻefeʻunga mo e fatongiá, ka naʻá ku ngāue mālohi ke fakahoko hoku uiuiʻí. Pea ʻi heʻeku fai iá, ne u ongoʻi e ala mai e toʻukupu ʻo e ʻOtuá ʻo tataki au pea fakafeʻungaʻi au ki Heʻene ngāué.
Neongo ʻetau fakafehuʻia pē te tau malava ke fua ha fatongia ʻi he Siasí, ʻoku ʻafioʻi kitautolu ʻe he ʻEikí. Kapau ʻoku tau fie ngāue, te Ne fakafeʻungaʻi kitautolu ki Heʻene ngāué.
Ngaahi tā fakatātā ʻa Bryan Beach
ʻI heʻetau tali ʻa e faingamālie ke ngāué, te tau ʻilo ai, hangē ko e talaʻofa naʻe fai ʻe Palesiteni Monisoní, ʻe “tokoni ʻa langi kiate kinautolu ʻoku fekumi ʻi he loto fakatōkilaló.”