Kōlea Tonga

Ne fuofua kamata e ngāue fakafaifekaú ʻi Kōlea lolotonga e Tau ʻi Kōleá ʻi he kamataʻanga ʻo e 1950, ka naʻe papitaiso ʻi he ʻIunaiteti Siteití ʻa Kimi Ho Siki, ko e taha ʻo e kau fuofua papi ului mei Kōleá. Naʻe lolotonga ako ʻa Kimi ki hono mataʻitohi toketaá he taimi naʻa ne kau ai ki he Siasí ʻi Penisilivēniá he 1951. Naʻe kau ʻene fānau ʻe toko ua he kakai ʻe toko fā ke fuofua papitaiso ʻi Kōleá, he ʻaho 3 ʻo ʻAokosi 1952. Naʻe hoko ʻa Kimi kimui ko ha taki ʻo e puleʻanga Kōleá pea tokoni lahi ʻi hono ʻoatu e kau faifekaú ki Kōlea Tongá.

ʻI he 1962 naʻe fokotuʻu ai e Misiona Kōleá, pea paaki e Tohi ʻa Molomoná ʻi Kōlea he 1967. Naʻe fokotuʻu e fuofua siteiki ʻi Kōlea Tongá, ʻa ia ko e fuofua siteiki pē foki ia ʻi ʻĒsiá, ʻi Soulu he ʻaho 8 ʻo Māʻasí 1973. ʻI he 1985, naʻe fakatapui e Temipale Soulu Kōleá, ʻa ia ko e fuofua temipale pē ia ʻi ʻĒsiá.

ʻI he 2001 naʻe foaki ai ʻe ʻEletā Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá ha tatau ʻo e “Ko e Fāmilí: Ko ha Fanongonongo ki Māmani” ki he palēmia ʻo Kōlea Tongá, ko Lī Hani-Tongi.

Ko e Siasí ʻi Kōlea Tonga
Tokolahi ʻo e Kāingalotú	81,251
Ngaahi Misioná	3
Ngaahi Siteikí	17
Ngaahi uōtí mo e koló	142
Ngaahi Temipalé	1

Toʻohemá: Kimi Ho Siki (toʻomataʻú) mo ʻEletā Hāloti B. Lī (ʻi loto mālié) ʻo e Kōlomu ʻo e Kau ʻAposetolo ʻe Toko Hongofulu Mā Uá, i haʻane ʻaʻahi ki Kōlea. ʻOlungá: Ko hono fakatapui ʻo e Temipale Soulu Kōleá ʻi he 1985.

Toʻohema ʻi ʻolungá: taá ʻi he angalelei ʻa e Musiume Hisitōlia ʻa e Siasí; tā ʻo e Temipale Soulu Kōleá naʻe fai ʻe William Floyd Holdman; tā ʻo e mapé © iStock