Tohi ki he ʻĒtitá
Maʻu ʻe he Liahoná ʻa e Ngaahi Talí
Kuo hoko ʻa e Liahoná ko ha tāpuaki lahi kiate au, ki hoku fāmilí, mo kinautolu kotoa pē kuó u maʻu faingamālie ke talanoa mo ia ʻo kau ki he Siasí. ʻI he taimi ko ia ʻoku ou fie maʻu ai ha faleʻí, ʻoku ou ʻalu ki he Liahoná, pea ʻoku ou maʻu maʻu pē ʻa e tali ʻoku ou fie maʻú. ʻOku fakaofoʻofa foki mo e Liahoná ʻi he ʻInitanetí—ʻokú ne tokoniʻi au ke u teuteu ha ngaahi malanga mo ha lēsoni ʻaki hono fakahaofi ha taimi lahi mei he fekumí.
Maliō Palasa Sanitana, Palāsila
Ko ha Fakahinohino maʻa Nautolu ʻOku Fekumí
ʻI he taimi ʻoku ou lau ai ʻa e Liahoná ʻi he māhina takitaha, ʻokú ne ʻomi kiate au ha meʻa lahi ange ʻi he meʻa naʻá ku maʻu kimuʻá. ʻOkú ne fakamanatu mai kiate au ʻa e ʻofa ʻa e Fakamoʻuí pea tokoniʻi au ke u toe lelei ange. ʻOku ou ʻiloʻi ko e makasini ko ʻení ko ha fakahinohino ia maʻa nautolu ʻoku fekumi moʻoni ki he fakahinohinó.
ʻEnisī-Loleini Kouatiō, Koate ti ʻAivolī
Ongoʻi e Laumālie ʻo e Ngaahi Leʻo ʻo e Kāingalotu ʻi he Ngaahi ʻAho Kimui Ní
ʻOku ʻalu pē ʻa e taimí mo e toe lelei ange ʻa e Liahoná ʻi he māhina takitaha. ʻOku ou fiefia ʻi he taimi ʻoku ou maʻu ai iá, he ʻoku ou ʻiloʻi pau te u maʻu ai ha ngaahi pōpoaki fakalaumālie. ʻOku ou saiʻia makehe ʻi he Ngaahi Leʻo ʻo e Kāingalotu ʻi he Ngaahi ʻAho Kimui Ní. ʻOku ou ongoʻi ʻa e Laumālié ʻi he taimi ʻoku ou lau ai ki he niʻihi ʻoku nau ikunaʻi ʻa e ngaahi faingataʻá mo e ʻahiʻahí koeʻuhí ko e faʻifaʻitakiʻanga mo e ngaahi akonaki ʻa e Huhuʻí.
Sila ʻUamapa, Mousemipiki