Te Reirei mairoun te Burabeti ae Iotebwa
Sue Barrett, Church Magazines
Teuana mai ibuakon ara bootaki n utu n te tairiki ae mamaten nanora bon te takakaro ni karaoan karakin Iotebwa Timiti ao te Moan Kaotioti. I karaki, imwiina ao tibutoru a karaoia bwa te kaotioti, n ana aia mwakoro taan kabwarabwara ao Iotebwa Timiti. I korei tamnein kaai aika beeba n tei n onea mwin te buakonikai ao ni kanimwi nakon te oo ni koonan te ruu, ao ni karaoi kanikina tabeua are a taekina “Te Tia Kabwarabwara” ibukiia taan kabwarabwara, ao n iai te kaintekateka ao te Bwaibwara ibukin “Iotebwa” ni kamwatebwai maiai.
Taan kabwarabwara n tatabemania nako a taku nakon Iotebwa, “Au ekaretia bon ngaia ae eti. Kaaina au ekaretia, Iotebwa.” Ao e kaeka Iotebwa, “I aki ataia,” ke, “I tangiria n iagoia.” Ao n tokina a taetae taan kabwarabwara ni kabane nakoina, e tekateka Iotebwa n te kaintekateka ao e wareka Iakobo 1:5 ni kabaibati. Rimwi e nakon te “buakonikai” ao ni katorobubua n tataro. Akea ae karaoa aia mwakoro Tamara are i Karawa ke Iesu Kristo, ao ti bane n neboarake are ngkana temanna “Iotebwa” e nakon te buakonikai n tataro. Temanna te ataei iai ana tai n riki bwa te tia kabwarabwara ao n riki bwa Iotebwa.
Ti taekinna rimwi bwa tera ae e reiakinna Iotebwa Timiti n te Moan Kaotioti, ti kanga ni karekei kaekan ara tataro e ngae ngke ti aki nori kaotioti, ao a kanga booki aika tabu ni kona ni kairiira.