N na Riai ni Kaaki te Reirei ibukin te Mitinare?
I angabeba man te reirei ae rietata n 1992 ao n te tai naba anne I anga au beba ibukin te mwakuri ni mitinare ae bwanin taina. Ngke e a roko weteakiu, ao I bon karekea naba te kariaia man te kura teuana ae te kabanea n rietata ao n tamaroa i Nigeria bwa N na reirei taekan bwainaoraki.
I Nigeria te karinrin nakon te reirei ibukin bwai n aoraki bon te waki ni kaiangatoa ao e aki riai ni kabuaki. Ngke I a imanonoaki irouia raoraou tabeman ao kaain au utu bwa N na kitana te wewete nakon au mitinare, I kabwarabwara bwa iai mwiokoakiu ni beku ao ni kariaria karaoana man te tai are I kaaina iai te Ekaretia onoua te ririki imwaina. I bon koaua raoi ae N na manga karinaki nakon te reirei ibukin bwainaoraki imwin au mitinare, ma ngkana a bati iango ao N na nanokawaki ibukin au babaire.
I rangi ni karabwarabwa nakoia taan reirei n te mweenga, kaain au utu, ao raoraou n te Ekaretia ake a boutokaai n au babaire. Iriirakin te tieminari, kamwatebwaian koroboki aika tabu, ao maiuakinan te euangkerio ngaia aika a karekea nakoiu te kona n tei iaon au koaua ae matoatoa.
Ngke I mitinare I katei au kouru ao ni mwakuri korakora. Uabwi ma aua te namwakaina imwina I karekea te reta ni kamotirawaaki ae itiaki. E kakabwaiaia mitinare ake a bane aia tai te Uea ma e aki berita bwa a naki rotaki n taian kataaki. Ibukiia mitinaren Nigeria ake a bane aia tai, kataaki akanne n aron akean te mwakuri ao aki taun te mwane ibukin te reirei.
Inanon te moan tenua n ririki imwin au mitinare, I karaoi ao ni bwaati tenua ukeuke ni karinrin, ma I aki manga karinaki nakon te reirei ibukin bwainaoraki. Inanon naba te tenua n ririki akanne, I bon tuai mani karekea au mwakuri. E anaki nanou ni kakoauaa bwa raoraou tabeman ao kaain au utu tao a bon eti ao tao bon te kairua ngke I a tia ni kabua karinakiu n reirei ibukin bwainaoraki.
N au tai ni mitinare I reiakina ae N na katikui rawawatau ni kabane iroun te Uea, ao n Anganna bwa e na kaira maiu nakon Nanona. Imwiin karaoana, ao a moanna n nakoraoi bwaai ibukiu—ma tiaki n aron are I tia ni baireia.
N Tabatin te aki mamatam teuana I atia ni baireia bwa N naki mamatam ao ma n tataro ma nanou ibukin ana ibuobuoki te Uea. N te tairiki anne e karebwerebweaki te mataroa. Ngke I kauka te mataroa, I rangi ni mimi n noora te aomata are I a tia ni kaitibo ma ngaia n tain te kataneiai ibukin te tararua are iria onoua te namwakaina n nako. E tuangai bwa iai tangiran kamwakuran te tia tararua are e a tia ni kaukaki n te kambwana are e mwakuri ibukina tarina te ikawai ao te kambwana arei e rangi ni kainnanoa waekoan karekean kaaina. Bon ti ngai te aomata are e roko nakon ana iango.
Te bong are imwina e tangoai te kambana. Te waki ae moan te kamimi anne e kamatoa nakoiu bwa Tamara are i Karawa e aki kitanai ao I riai bwa N na onimakinna. Te mwakuri bon kakoauan ae ko kona ni butimaeaki nakon mwakuri riki tabeua.
Kakabwaia mai karawa a bon aki ti baireaki man katian bwaai n te aonaaba n ti ngaia. I korakai inanon ririki imwin au mitinare ni kakaea te rau n te aonaaba, ma te Uea e kakabwaiaai n te aro n tamnei. Au kakabwaia iroun te Tamanuea e kairai nakon te mareaki ao n tuangai bwa karekean te reirei are iaona riki e na bon reke. Ao e bon reke.
E ngae ngke I tuai man nako n te reirei ibukin bwainaoraki, I a tia ni karekea ae titebo karinanna n te mwakuri n te mwane ao te warebwai. E a tia te Uea ni kakabwaiaai ma bwaai aika a tau ibukin mweraoiu are I a kona iai ni mareaki.
Ngkana ti karaoa ara mitinare ma e koaua, te Uea e na bon kakabwaiaira ngkana ti ukoukori reken ara reirei nakon ake iaona riki imwiina. Akea ni maiun te kairake ni mwaane ao n aine ae e nakoraoi riki nakon ana atatai, wanawanana, ao te kakabwaia imwiin te mwakuri ni mitinare ae bwanin taina.