Nakomai Ongora ni Bwanaan te Burabeti

Okirikaaki n Akea te Kanganga nakon Tamara are i Karawa

Mairoun Beretitenti Dieter F. Uchtdorf

Kauoman ni Kauntira n te Moan Beretitentii

Man Eberi 2007 kabwarabwara n te maungatabu ni kabuta.

E reirei Beretitenti Uchtdorf bwa ibukin te Mwakuri ni Kamaiu, ti a kona n rairi nanora ao n iai iroura te kantaninga n taai nako.

President Dieter F. Uchtdorf

Te Tabo ae Ko Mano iai

Inanon au tai ni kataneiai ni kan riki bwa te kaben n te kambana ni kibwakibwa, N na riai n reiakina aron borauakinan te wanikibwa iaon te raroa ae abwabwaki. Kiibwa iaon marawa aika bubura, riaon rereua aika a reitinako, ao ni katomai taian kontenanti e kainnanoa te babaire ae karaurau ni kakoaua raoi te roko n akea te kanganga nakon tokin te kawai are e baireaki. Tabeua kibwa n aki tokitoki aikai a kona ni kabanea ae nakon 14 te aoa ao ni katabwanina ae e kaan nakon 9,000 te maire (14,500 km).

Iai te babaire ae kakawaki inanon te aeka ni kibwa ae abwabwaki ae ataki bwa te tabo ae ko na mano iai. Nakon te tai e bon tau bwaan te wanikibwa ni manga rairaki ao n okirikaki n akea te kanganga nakon te marae ni moan mwanangana. N tia ni kitana te tabo ae ko mano iai, e kabua te rinerine aei te kaben ao e a riai n reitianako. Ai ngaia anne bukina bwa te iango aei e aki toki n taekinaki bwa te tabo ae akea te kamanoaki iai.

E Aki Kona n Iremwe

E tangiriira Tatan n iangoia bwa ngkana ti bure ti a tia n riaon “te tabo ae ti aki kamanoaki iai.—are e a iremwe ni bita kawaira. Ana Mwakuri ni Kamaiu Iesu Kristo bon ana bwaintangira te Atua nakoia Natina ni kaetii ao n tokanikai imwiin te bure. E roko Kristo ni kamaiuira. Ngkana ti a tia n toua te kawai ae kairua ana Mwakuri ni Kamaiu Iesu Kristo e kona n anganira te koaua bwa te bure bon tiaki te tabo ae ko mano iai. Te oki n akea te kanganga e na kona n reke ngkana ti rimwin ana babaire te Atua ibukin kamaiuakira.

Iai n Tai Nako te Kantaninga

Ngke ko kunea bwa ko mena ia inanon mwanangam rinanon te maiu, bwaikara kataki ae ko na kaitarai, boni iai n taai nako te tabo ae ko na mano iai boni iai; n taai nako te kantaninga. Boni ngkoe te kaben ni maium, ao e a tia te Atua ni katauroa te babaire n uotiko rikaki n akea te kanganga n oki Nakoina, nakon tokin kawaim ae mimitong.

Ana bwaintangira ana Mwakuri ni Kamaiu Iesu Kristo e karekea nakoira n taai nako ao n taabo nako ma te kakabwaia n te rairannano ao te kabwarabure. Ibukin te bwaintangira aei, karekean te oki n akea te kanganga man kawain te bure ae rangi ni buakaka e na angaraoi nakoira ni kabane. Te kukurei n te maiu aei ao te kimwareirei ae akea tiana n te maiu ae na roko boni kanuangara ngkana ti rinea butimaean ao karaoan ana bwaintangira Tamara are i Karawa.

Bwaai Aika a na Iangoaki

1. katoa tai are ko rairananom ao n ana te toa, ko a rang n itiaki kanga ai aron ae ko mena n te bong are ko bwabetioaki ao ni kamatoaki iai. Inanon tain te toa, iangoa Iesu bwa e kanga n tangiriko, ao ni kangaraoia ibukim n raira nanom ao ni kukurei.

2. Iangoa te tai are ko karaoa iai te bwai ae ko ataia ae e kairua. Tera ae e tangiriko iai Tamara are i Karawa bwa ko na karaoia ngkana e riki aei? Bukin tera e rang ni kakawaki bwa ko na rairananom n te tai naba are ko ataia ae ko a tia ni karaoa te bwai ae e kairua?

3. E kanga kawakinan tua ni buokiko n ira ana babaire Tamara are i Karawa ibukin kamaiuakim? Tera kawain te ongotaeka tabeua ae kateimatoa kawakinam man taian kanganga?

E kabwarabwaraki n te koro-tamnei iroun by Scott Greer