Titiraki & Kaekaaia
“Aki kakaonimaki au karo n te Ekaretia. N na kanga n teimatoa n akean aia boutoka ?”
Aio bon te waki ae matoatoa ibukina bwa kaaro boni ngaia aika ti onimakiniia ibukin kairara ao kaetani kawaira. Ma bon iai bwaai aika ko kona ni karaoi bwa ko na teimatoa ni korakora, ao karaoan bwaai aikai e na buokiko ni karikiko bwa te banna ni katoto nakoia am karo.
Ngkana ko tangira kairam inanoni maium, teimatoa n tataro ao ni kamatebwaia taeka aika tabu. E ongo am tataro Tamam are i Karawa ao e na kaeka.
Nakoia am koraki ke kaain te Ekaretia ibukin taiani waaki aika ko na katooto iai ma ibuobuoki aika ko kainnanoi. Te katooto teuana, tuanga am tia reirei n te mweenga ke am bitiobi ke te beretitenti n te mwaanga ibukin te kakabwaia n te nakoanibonga ngkana akea ae iai irouna ni mweengam.
Ko kona ni kamatoai nanoia tarim ma mwanem ao am karo man am mwakuri are ko karaoia. Kam na kona ni karaoa ami kai n utu, tataro n utu, ke te kamatebwai n te utu n taeka aika tabu ma tarim ao mwaanem. A na kona naba am karo ni kan mena ibuakomi.
E rangi ni kakawaki riki bwa ko na teimatoa n tangiriia am karo. Tai bairei aroia. E raoiroi riki bwa ko na akoi man taotaonaki n nano. A boni kainnanoa am tangira ao am boutoka, n aron ae ko kainnanoa naba anne mairouia.
Tataro ibukiia Am Karo
Kaungaia am karo nakon te tataro n te utu. Kaungaia bwa ana iri ana waaki te Ekaretia. Bairea karaoan te Kai n Utu. Tataro ibukiia n taai nako ao kaotiko bwa te banna ni katooto ngkoe ae ko raoiroi. N te aro anne ao ko na kona ni kamarurungiia am karo ao ni kakorakora am koaua, man namakina te kukurei, ao te Uea e na buokiko ni kateimatoako n te Ekaretia. Karaoia ma te onimaki ao te aki bwara n nano, ao E na kaeka am tataro.
Sonia B., 20, Yucatán, Mexico
Tai Kabwara Nanom
Tamau tiaki kaain te Ekaretia, tinau ma tariu aki kakaonimaki. E karawawata nakoiu aia aki mwannano nakon au koaua. Ma au koaua e rikirake ngkai I kakaea te Tieminari, te tataro ao te bootaki ni kairake ao ngkana I tataro mani wareware ni Booki aika Tabu. Te taeka n iraorao ae rangi n tamaroa ae I kona n anga bon tai kabwara nanom.
Amanda B., 16, Nevada, USA
Aanga aika ana Kateimatoa Kakaonimakim.
I ata te teinaine ae kakateke ae rangi ni matoatoa n te Ekaretia e ngae ngke ana karo aki bati ni kakaonimaki. E riki bwa te bwai ni kaunga nakoia raona n ataeinnaine ngkai e a tia ni karekea ana metera ibukiia Ataeinaine. E taku bwa aia ibuobuoki raona n ataeinnaine, te kakaonimaki nakon te taromauri, ao te itoman raoi ma Tamana are i Karawa boni ngaia aanga aika e buoka teimatoan kakaonimakina.
Chelsea C., 17, Oklahoma, USA
Te Tabo ni Katantan ae Rau
I onimaki n te tataro ao kamatebwaian taeka aika tabu ibukin kakorakoraan au koaua, ao I kunea te tabo ni katantan ae rau n irakin te Tikauti ao aia waaki Ataeinimwaane ao kakaraoan te wewete are I mwiokoaki iai. Irirakin aia taeka n reirei burabeti ao rineakiia raou aika raoiroi e ibuobuoki naba. Uringnga n aki toki ni kakaraoa te banna ni katooto ae raoiroi ibukin am utu ni kakaotan te tangira ae kororaoi, te mwannano, ao te karinerine. Ngkana ko karaoa tabem, te Uea e na boni karaoa naba tabena.
Unimwaane Whigham, 21, California San Francisco Mission
Te Ninikoria mani Bannaia ni Katooto
Tinau e aki kakaonimaki ao kaain ara utu ake tabeman tiaki kaain te Ekaretia. Te bwai ae I karaoia I onimaki irouia au tia kairiri ao raoraou; aki toki ni buokai. A rangi ni kakawaki inanoni maiu ngkai a tia ni buoka aroni kairan maiu ma nanou ni kan nako ni karaoa te mwakuri ni mitinare. Anganai te ninikoria ae bati man aroaroia are a karaoia. Ko riai ni kakaitau n te iraorao mairouia ake a buokiko ni karikirakeko bwa kaain te Ekaretia ngkoe mani kakababanea am tai riki mangaia, bwa e na bon reke riki mairouia ae ko na ataia.
Ivana S., 20, Buenos Aires, Argentina
Kaota am Tangira nakoia am Karo
Teimatoa ni marooro ma am karo, ao kataia ni karekea aia ibuobuoki. Kaota am tangira ao am kakaitau nakoia, ao tuangiia bwa e rangi ni kakawaki iroum nakom nakon te taromauri. Tuangiia am tia kairiiri ibukin baom ni mwananga, ao tuanga am bitiobi ngkana e kona n taetae ma am karo. Tataro ao butia Tamara are i Karawa ibukin ana ibuobuoki, ao tataro bwa am karo ana noora teimatoam ni kakaonimaki bwa e bongana iroum. Ko kona naba ni karekea riki te korakora man warekan ana Boki Moomon ni katoa bong ma kawakinan taian tua.
Craig L., 16, Missouri, USA
Kawai ni Boutoka aika Uoua
I noora te aekaki aei n taai nako n au tai ni mitinare, ao kairake ake a kaitaraki n aei, a rangi n ninikoria. A kanga ni karaoia? Mani karikirakean te anga ni boutoka inanon te Ekaretia irouia raora ao taani kairiiri ao ni karekea naba te boutoka ma te Uea rinanon te tataro, te wareware ni Booki aika Tabu ni katoa bong, ao kaekaean te taromauri. Ko kona ni karekea ni karaoan baikai!
Unimwaane Jones, 21, Tahiti Papeete Mission