Anene ao Karaki
Ngke ti weteaki Ngai ma kainnabau, Sandra, bwa ti na beku n te South Africa Durban Mition, ti moana ukoukoran te mwakuri ae e baireaki ibukin te bootaki n anganano. I a tia n riki bwa kain te Moomon Tabaenako Kuaea n te maan ae raka iaon 20 te ririki, ao kainnabau, te tia ibuobuoki n te tabo n tango-boki, e a tia ni kaira tain te karaki n aia reirei ataei. Ngke e baireia ara beretitenti n te mition bwa e na kauka te mwakuri ni mitinare n te kawa ae tuakarako ni kaan irarikira, ti ataia bwa aei ai bon reken angara.
Ti kawara te kawa ae tuakarako aei ao ni kunea bwa akea aia taabo n tango-boki n taian reirei, ti te tabo n tango-boki ae uarereke ibukiia kaina n te kawa. Unimwaane aika ataei a kaotiira bwa ti na kinaki nakon te tarekita n te tabo n tango-boki. Ti kabwarabwara nakoina bwa ti tangiria ni karaoia ni katoa wiki tain te karaki ibukiia ataei. E bon nanououa, ma imwin tabeua iangoana e kariaia ni katanoata te waaki ao ti na kona ni kataia.
N te moan bong niman ataei aika a airi. Inanon tain wakinana a mwaiti riki aika a roko. Imwin tabeua namwakaina ti karekea ana ibuobuoki te kairake n aine, ae e a tibwa rairaki, are e raoiroi ana taetae ni Ingriti ao n Zulu. Taan roko n tain te karaki e rikirake, ao te tarekita ao karo a rangi ni kukurei ni baike a riki.
A tangira te kan anene te botannaomata ae te Zulu, ai ngaia are ti ikoti anene aika bebete ao katangakia nakon ara tai ni karaki. Nakoni banen ara mitinare, ti a karaoa uoua ke teniua taian tetere ibukin te anene ao tain te karaki n te wiki ni karekei nneia ataei aika a raka iaon 100 ake a iri. Ai te kakabwaia tera ngkana ti na kona n noriia ataei n taabo tabeua ao a na moana aneneakin ara anene ao n takaruai katangakiia nakoira.
Iai te kakabwaia teuana ae reke man ara mwakuri n te aono aei. Ngke e rikirake kaainakin te Ekaretia irouia kaain te aono ao ti a kainnanoa te tabo ibukin moanakin karaoan ara bobootaki n te Tabati, ma te tarekita n te tabo n tango-boki e imanonoira bwa ti na kabongana te tabo n tango-boki n akea boona.
Ti a rangi ni karabwarabwa bwa e a tia te Uea ni buokira ni karekea te kawai ni kabongana ara tarena, ni beku ibukin te botannaomata, ao ni buoka kaukan te aono ibukin te mitinare.