Te Bwaintangira ibukin te Konabwai ni Wareware ao ni Koroboki
E tangira aia reirei ataei natira te mwaane ae te ikawai ao e tara n ae e nakoraoi n te reirei. E ngae n anne, n te moan atu, e mataata iroura bwa e aki kona ni wareware. E kona ni wareki taeka tabeua ma e mengaua ma ngaia n aron naba wareware ibukiia aika tibwa moan kataneiai ni wareware. A waki nako namwakaina, ao rabwakaun natira ni wareware e karaurau n rikirake. E rikirake te tabeaianga Irou ma Kainnabau.
N te bong teuana I uringa te bwai are e a tia au beretitenti n te mition n reirei iai n ririki ake mai mwaina. I a tia ni weteaki nakon te mitinare n te taetae n ianena. Reiakinan te taetae n Rutia bon te kakaewenako ni karinan aika kakaokoro ibukin temanna te mitinare, ma e reireinira ara beretitenti n te mition bwa ti na wareka ana Boki Moomon n te taetae n Rutia ni katoa bong. E berita nakoira bwa mwaakan ana Boki Moomon e na buokira n ara konabwai ni kona te taetae n Rutia. E bon eti. Ngke e waakinako te tai ao e rikirake n tamaroa au taetae ao ootau n te taetae, ao au koaua e rikirake.
N ririki ake imwin au mitinare, I a iango i bon irou, “Ngkana e mwakuri ibukiu n te taetae n Rutia, e aera bwa e naki mwakuri ibukin natiu n te taetae n Ingiriti?” Imwin tuangakin natira taekan au konamaki n reiakina te taetae n Rutia ao ana reirei au beretitenti n te mition, kainnabau ao Ngai ti a kakaewenakoa bwa e na wareware i bon irouna man ana Boki Moomon ni katoa bong. E na kabanea ana tai ni mwaaken taian taeka aika te Atua ao te Uea ni baan te boki. Rimwi e na manga nakon Iesu. Imwin anne e na anai taian taeka are e a tia n noori ao n titiraki bwa baikara taeka akekei. E bon rangi n nanona ana wareware ni katoa bong, ao n tokin te ririki ana rinan n te wareware e a riaon ara kantaninga.
E a mena ngkai natira n te kaonoua n atu. Bon te tia wareware ae kamimi ao e buokiia n reiakiniia tarina ma mwanena ake niman aika ataei riki taekan te bwaintangira are e karekea rinanon warekan ana Boki Moomon. Ara ataei n tatabemania nako a tia ni karikirakea te rabwakau ni wareware ae korakora ao e a reke bwa ai kateia te wareware n ana Boki Moomon. A moanna n namakina mwaakan tamnien te koaua ngkai e rikirake aia koaua.