Bwanaan te Tia Kawakin Tiibu ae Raoiroi
Man angiin au tai ni maiu ae 70 te ririki, are I riki iai bwa te tia kawakini man n te tawana, I rangi ni mamaten nanoa te karaki ibukin te tia kawakin tiibu ae raoiroi are koreaki n Ioane 10:1–18, bwa I a bon tia ni maiuakinna. Tabeua kataneiaia aika I a tia n rinanoi aika ana kaoti imwiin aei ana boni kamaiua te karaki aei n te aro ae korakora.
N tain ngkoa te baibwara, taani kawakin tiibu a kona ni weteia aia tiibu mai buakoia tena n tiibu ake a bane ni botaki ni kawakinaki n teuana nneia (tara vv. 3–4). N aron naba anne, ngkana I kairiia au tiibu, I ti wewete ao a irai naba.
Tabeua te ririki n nako, te aine ae Alice 96 ana ririki ni maiu ae rangi n tamwakai ao iai naba ana nanai tiibu n ana tawana ae mena irarikira, e bwaka n aoraki n aia tai tiibu ni bung, ngaia are I a karaoa au ibuobuoki nakoina n tararuai ana tiibu ake a bungiaki n auan te ro. Ngke I a rin n ana tabo are e kawakiniia iai ana tiibu ake ana bung n au moa n tai “ni mwakuri,” ana man ae kaania 100 tiibu aine atia ni kamwengaraoaki ibukin te tairiki anne. Ma ngke I rin, a namakina te aomata ae raka imarenaia. Ibukin maakuia, a kaea konan te auti are rararoa man ikoikotaki iai. (tara v. 5).
A kakaraoa aei inanon tabeua te tairiki. I kua ni babaei rangau, ma tiibu aikai a boni biriaitua naba ngkana I rin. N te kanimaua n tairiki, aikoa birinako ngkana I mwakuri ibuakoia. A kina bwanau ao a onimakinai.
Imwina, I tuanga Alice bwa N na kamwarakeia ana bun tiibu aika tao tengaun ma uoman ake a mate tinaia ke aki kona ni kammamma. I katotonga Alice ao I weteia ana tiibu tetei, “Nakomai, BaBa! Nakomai , BaBa!” I kantaningaia bwa tiibu ataei aikai bwa ana biri nakoiu ngkai a baki, ma bon akea naba temanna ae tarai. E otinako Alice man ana umwa ni kuka ao e weteia ana tiibu te tei. Ngke a ongobwanana a biri nakoina ni kuria aia miriki.
Ti mimi, ao ngai ma Alice ti karaoa ara kakatai. Ti tei inanon ooia au tiibu ao Alice e weweteia n aron au wewete ni katotongai: “Ikai, lamby, lamby! Ikai, lamby, lamby!” ma bon akea te bwai ae riki. Ma ngke I wewete n aron naba are e karaoia, a waetata au tiibu ni katobibiai.E ngae ngke te taeka are ti kabonganai ni weteia tiibu bon ti tebo, okoron tein bwanara aki mwannanoaki. Tiibu a ti ongo bwanaia aia tia kairiri (tara v. 4).
Ioane 10 e katerea okoron te tia kawakin tiibu ma te tia boobotiia tiibu. Te tia kawakin tiibu, ae bon ana man tiibu akanne, iai ana tangira ae mwamwannano ibukin kawakinaia. Ni kabotauaia, te tia boobotiia tiibu, ti te “tia mwakuri” ae “aki tabe” (v. 13). Te karaki ni kaikonaki e reirei bwa te tia mwakuri e birinako ni kitaniia ana tiibu (tara v. 12), te tia kawakin tiibu e anga maiuna ibukiia ana tiibu (tara v. 11). Aio boni moan te koaua ibukin ara Tia Kawakin Tiibu ae Raoiroi—ara Tia Kamaiu, Iesu Kristo—are anga Maiuna ma te kukurei ibukira (tara vv. 15, 17–18).
Nakoiu, taian taneiai aikai, a kamatoa teuana rongorongon te karaki ni kaikonaki ae: te kekeiaki bwa ti na bon kina ara Tia Kawakin Tiibu ae Raoiroi ao tauraoira ni kina bwanana e na totokoa irakiia taani kamwakuraki. Kakaonimakira nakoni bwanaan ara Tia Kawakin Tiibu ae Raoiroi—ao akea riki—ti na bon kairaki nakon te kakawakinaki ae akea tokina.
Te Uea bon au Tia Kawakin Tiibu, iroun Dewey, bwaintangira man Altus Fine Art, American Fork, Utah