Taiaoka Kamaiua Tamau
Bon tamau are e ukoukora te koaua ao e kuneia mitinare. A reireinira taekan te euangkerio, ao e aki maan imwiina, ngaira—au karo ao niman tarira ao mwanera—ti bwabetitoaki. Ara koaua e rikirake ni matoatoa. Ti reiakin bwaai aika bati, riki taekan te Tia Kamaiu ao taekan taian utu.
N 1992, ngke I mwakuri bwa te bitiobi n ara uoote i Biribin, tamau e toki burona. E ienikuriaki nakon te o n aoraki man ana aobiti. Ngke e roko te rongorongo bwa e korakora tararuakina, a nako nanoia au utu. Ti a taonakinako n te maaku. Te anga ni kamaiuan tamau e a rangi n rengerenge. E tang tinau ao e tuangira ni kabane bwa ti na tataro.
I mwaninga te tai imwin anne—au iango e a onrake n ururingakin tamau. Ma rannimata iaon moau, I katorobubua n tataro. I namakina te aki rau ao te bwarannano, ao te bwai ae koburake inanou n te aro ae na rebwetaua. I tangiria n takarua ni kabebetea te maraki ao ni kamwaawa te maaku are e taonainako n te bong anne. N onea mwina I ti tataro, “Taiaoka kamaiua tamau.” Bon te tataro ae mangori, bwa e na ongo.
N te tairiki anne I kariaiakaki n nakon te tabo are e korakora iai te tararuaki. E a rabetenako tamau nakon te maiu ke te mate, ao tinau ao tariu ao mwaneu ao Ngai ti riai ni katauraoira ibukin te bwai ae moan te kakaiaki. Bon te waki ae kammaraki ibukin ara utu. Kanoan ae na roko e tara ni kabwaranano ao ni kananououa. Ngke I karaurau n anganna au kabo, I uringa ara moan bootaki n ara kain utu. Ti a tia ni mataku n ana birim te Ekaretia, Utu Bon Akea Tokia.
Imwain matuu n te tairiki anne, tamau n te aonaaba e karaurau n aki kakarongoa n okira Tamana are i Karawa.
Maten tamau, ngke I bwakara 22, e katanea moanakin ae e na irabubua taian bitaki inanon maiu. Ni buana I reiakina ae iai irou te korakora n ae akea aatakina. I a tia ni karaoa ae bati riki ni maiu nakon ae tao N na kaman tia ni karaoia ibukina bwa te bitaki ao te rikirake a tia ni katukaki iaou.
Ngke e aki kaeka au tataro Tamara are i Karawa, e bon aki riki nakoiu aei bwa E a tia n aki ongo irou. I ataia ae E bon kakauongo. E ataia ni koaua bwa tera ae I rinanona. E ataia ni koaua ae tera ae a kainnanoia ara utu n te tai anne, ao bon anne ae E angainira—te korakora n tokanikai iaon taian kakaewenako n te maiu, te korakora ni kaitara kanoan wakin te maiu. E reireinira bwa ti na kanga ni kaitarai katakira ma te onimaki.
E raka iaon 15 te ririki ae e tia n nako man te bong ni kammaraki arei. I bon waki naba n reirei, ao I bon rikirake naba n te euangkerio. E a reke oin au utu ngkai, ao I rangi ni kukurei bwa ti a kabaeaki n te tembora. I tuai man katannakoi matau man ana babaire te euangkerio are e a tia n reireinira tamau.
N rinanon Ana Mwakuri ni Kamaiu ao Mangautin Iesu Kristo, I ataia bwa n te bong teuana ara utu a na manga ikotaki riki. E bon ananau mwanangau ae N na toua, ma I kukurei n iangoia bwa N na manga nora tamau n tokin te mwananga.