Itok Ron̄jake Ainikien JUŌN Rikanaan
Jepļaakļo̧k ilo Aenōm̧m̧an n̄an ippān Jemād Ilan̄
Jān Eprōļ 2007 kōnono eo ilo kweļo̧k eo elap.
Būreejtōn Uchtdorf ej katakin bwe kōn Pinmuur eo, jemaron̄ ukweļo̧k im wōr ad kōjatdikdik
Tōre eo em̧m̧an N̄an Bar Jepļaak
Ilo iien kamminene eo aō bwe in erom juon baiļet in baļuun, iaar aikuj katak kilen jōbwebweik juon baļuun ilōn̄ ilo kōtaan ko raetok. Kelo̧k ioon lom̧aļo ko rekillep, kijone ānejem̧aden ko raetok, im laļ ko rej kobaik doon aikuj kōttōbalbal eo etiļjōk n̄an jeļā ke ej juon jok eo em̧m̧an ilo jikin eo kar karōk bwe en jok ie. Jet iaan baļuun kein rejjab bōjrak maron̄ wōnm̧aanļo̧k n̄an 14 awa im kūtbuuj enan̄in 9,000 māeļ (14,500 km)
Ewōr juon tōre in kālōt eo eaorōk ilo ekkāke ko raetok eo ej tōre eo em̧m̧an n̄an bar jepļaak. N̄an tōre in waan mejatoto eo ebwe kaan n̄an bar ro̧o̧l im jepļaak ilo ejjeļo̧k jorrāān n̄an erboot eo eaar kelo̧k jāne. Ilo an le jān tōre in em̧m̧an n̄an bar jepļaak, kapen eo em̧ōj an joļo̧k kālōt eo an im aikuj wōt n̄an wōnm̧aanļo̧k wōt. En̄iin ej unin an tōre in aolep iien ekkā ba tōra eo in me ejjeļo̧k bar iien jepļaak
Ejjan̄in Kanooj Rum̧wij
Satan ekōņaan bwe jān ļōmņak ke n̄e jej jerawiwi em̧ōj ad etal jān juōn “tōre eo jejjāmin bar ro̧o̧l”—bwe erum̧wij n̄an ad ukōt kooj eo ad. Pinmuur eo an Jisōs Kraist ej menin letok eo an Anij n̄an ro nejin n̄an kajim̧we im le jān kaje ko kōn jerawiwi. Kraist eaar itok n̄an lo̧mo̧ren kōj. N̄e em̧ōj ad bōk juōn kooj eo ebōd, Pinmuur eo an Jisōs Kraist emaron̄ letok n̄an kōj kōjatdikdik bwe jerawiwi ej jab juōn tōre eo jejjāmin bar ro̧o̧l. Juon jepļaak eo em̧m̧an emaron̄ wōr n̄e jej ļoor karōk eo an Anij lo̧mo̧r eo ad.
Ewōr Kōjatdikdik Aolep Iien.
N̄e kom̧ij lo kom̧ make ioon iaļ in ilo mour in, jōkdo̧o̧n ta māllijon̄ ko kom̧ maron̄ loi, aolep iien ej wōr juon tōre eo em̧m̧an n̄an bar jepļaak; aolep iien ewōr kōjatdikdik. Kwōj juon kapen in mour eo am̧, im Anij em̧ōj an kar kepooj juon karōk n̄an bar kōro̧o̧l tok eok ilo aenem̧m̧an n̄an Ippān, n̄an ijo kwōj jipadeke ekwōjarjar.
Menin letok eo ilo Pinmuur eo an Jisōs Kraist eletok n̄an kōj ilo aolep iien ko im ilo aolep jikin kōjramman ko kōn ukweļo̧k im joļo̧k bōd. Kōn menin letok in, maron̄ in kōm̧m̧an juon jepļaak eo em̧m̧an jān iaļ eo ejerata kōn jerawiwi ej itok n̄an kōjwōj aolep. M̧ōņōņō ilo mour in im lan̄lōn̄ eo ejjeļo̧k jemļo̧kin ilo mour eo ej itok enaaj ad menin letok eļan̄n̄e jej kālōt in bōk im mour kake menin letok in an Jemādwōj Ilan̄.
Pija jān Scoot Greer