Jouj im Lo̧mo̧ren Jema
Kar jema eo eaar pukōt m̧ool eo im eaar loe mijnede ro. Rekar katakin kōm gospel eo, im ejjab to, kōm—jinō im jema im ļaddik ro im ļeddik ro ļalem jeiū im jatū—kar peptaij. Naan in kam̧ool ko am raar kajoorļo̧k. Kōm ar katak elōn̄ men ko, eļaptata kōn Rilo̧mo̧o̧r eo im kōn baam̧le ko.
Ilo 1992, ke iaar jerbal āinwōt bisop an ward eo am ilo Philippines, jema eaar bōk juon nanin̄mij in metak ob. Kar m̧ōkaj kake ļo̧k n̄an aujpitōl jān opiij eo an. Ke ennaan eo eaar itōk bwe eaar do̧lool, baam̧le eo aō raar ļap aer ilbōk. Mijak ar debij mōņōņō ko am. An jema maron̄ in mour ar jab alikkar. Jinō eaar jan̄ im kajjitōk bwe kōmin aolep jar.
Iaar jaje kōn iien ālikin—eaar lōn̄ ememļo̧kjeņ ko raar jiktok. Kōn dān in kōmjaaļaļ ko turin meja, Iaar bukwelōlō im jar. Buruō eaar lukkuun in eddo, im ubō eaar pojak in rub. Iaar kōņan lam̧o̧j n̄an joļo̧k metak eo im kōm̧akūt mijak eo eaar debiji iō ilo raan eo. Ijjelo̧kūn Iaar jar, “Jouj im kōmouri jema.” Eaar juon jar eo em̧ool.
Bon̄ōn eo iaar maron̄ in deļo̧n̄ ijo jikin rido̧lool. Jema eaar pād ilo an n̄akļo̧kjān im jinō im ajri ro jeiū im jatū im n̄a kōm kar aikuj in kōkajoor kōm make jān jorrāān eo. Eaar juon en̄jaake eo ekkōmmetak n̄an baam̧le eo am. Ilju im jeklaj eo ejjab alikkar. Ke iaar jiron̄ jema io̧kwe eok ilo ejjeļo̧k ainikien, iaar keememej iien nukin eo am kein kajuon. Kōm ar aluje juōn an Kabun̄ pija, Baam̧le N̄an Indeeo.
M̧okta jān Aō kar etal n̄an peet bon̄ōn eo, jema eo ilo laļin eaar jokane ilo an jepļaak n̄an ippān Jemādwōj Ilan̄.
Mej eo an jema, ke Iaar 22 aō iiō, eaar kakōļļeik jinoin buki oktak ko ilo mour e aō. Ilo jako eo an Iaar jeļā ke eaar wōr Aō kajoor ko Iaar jab kūli. Em̧ōj Aō kar kōm̧m̧ane elōn̄ ilo mour e aō jān aō maron̄ kar einjuōn kōnke oktak im eddōklo̧k rar joon tok iō.
Ke Jema Ilan̄ eaar jab letok uwaak in jar eo aō, ekar jan̄in waļo̧k n̄an iō ke Eaar jab ron̄jake iō. Ijeļā E eaar ron̄jake. E eaar jeļā jejjetin ta eo ipād ie. E eaar jeļā jejjetin ta eo baam̧le eo am eaar aikuji ilo iien eo, im kar ta eo Eaar letok n̄an kōm—kajoor n̄an am ellā jān men ko reppen ilo mour, kajoor n̄an jelm̧ae m̧ool. Eaar katakin kōj wāween ad jelm̧ae mālijjon̄ ko kōn tōmak.
Elōn̄ ļo̧k jān 15 iiō ko em̧ōj aer kar mootlo̧k jān raan eo ekkōmetak. N̄aij ekkatak wōt, im ij eddōkļo̧k wōt ilo gospel in. N̄a kiō ewōr aō make baam̧le, im N̄aij lukkuun m̧ōņōņō bwe kōm ar liāp ilo tampel. Ijjāmin bōk meja jān iaļ eo jema eaar kakōļļeik n̄an kōm.
Kōn Pinmuur im Jerkakpeje eo an Jisōs Kraist, Ijeļā bwe juōn raan baam̧le eo am enaaj bar ippān doon. Ej aetok wōt iaļ in aō n̄an aō etal, bōtaab Ij m̧ōņōņō in ļōmņak bwe Inaaj loe jema ilo jem̧ļo̧kin iaļ in.