Iien Jake

Jisōs Kraist Ej Aō Rilo̧mo̧o̧r

Jān Cheryl Esplin

“Na iaļ eo, m̧ool eo, im mour eo: ejjeļo̧k armej enaaj itok n̄an ippān Jema, eļan̄n̄e jaab kōn iō” (John 14:6).

M̧okta jān an Jemād Ilan̄ kar jilkintok kōj n̄an lalin, Eaar kālōt Jisōs Kraist bwe en ad ritōl im Rilo̧mo̧o̧r. Kwar kālōt bwe kwōn ļoor Jisōs Kraist m̧okta jān am̧ kar ļotak.

Ke Jisōs eaar itok n̄an lal, Eaar katakin kōn gospel eo im kajutak Kabun̄ eo An. Eaar kejparok kallim̧ur eo bwe en ad Rilo̧mo̧o̧r. Eaar en̄taan im mej im jerkakpeje bwe jān maron̄ jerkakpeje im bar mour ippān Jemād Ilan̄ im baamļe ko ad.

Jeje ko rōkwojarjar rej katakin kōj kōn elōn̄ kōjeram̧m̧an ko kar kōmaron̄ jān Jisōs Kraist. Jej keememej ke bwebwenato in etōņak eo an Lehi? Lehi eaar loe juon wōjke. Wōjke eo ej bōk jikin io̧kwe eo an Jemād Ilan̄ im Jisōs Kraist.

Ioon wōjke eo kar men ko leen me enaaj kōm̧m̧an bwe armej ren m̧ōņōņō. Lehi eaar nemake leen wōjke eo im eaar obrak kōn lan̄lon̄. Lehi eaar kōņaan bwe aolepān baam̧le eo an ren nemak leen wōjke in. (Lale 1 Nipai 8:10–12).

Leen wōjke eo ej bōk jikin kōjram̧m̧an ko jej būki kōn Jisōs Kraist im Pinmuur eo An. Jej nemak men eo leen n̄e jej tōmak ilo Jisōs Kraist, n̄e em̧ōj ad peptaij im bōk Jetōb Kwojarjar, im n̄e jej mour kōn gospel eo im en̄jake io̧kwe eo an Rilo̧mo̧o̧r eo ad.

M̧akūtkūt

Kōm̧akūt peij J5, im kōddāpe ioon pepa eo eddo. M̧wijit jet tuwa ilo wōjke eo ioon ļain mouj ko, im mwijiti leen wōjke eo. N̄an kajjojo leen, lale eoon eo, kūle kōjeram̧m̧an eo Jemād Ilan̄ em̧ōj an letok n̄an kōj, im jeiki ņa ioon ļain eo. Likūt men ko leen wōjke eo ilo tuwa eo ioon wōjke eo.

Moronai 6:8_______________

Mosiah 16:7–8_______________

Jon 14:27_______________

Hebru 12:2_______________

2 Nipai 31:20_______________

3 Nipai 19:21_______________

Jon 8:12_______________

Moronai 8:17_______________

3 Nipai 27:13_______________

Moronai 7:41_______________

Meļeļe ko kōn Iien Jake

Ilo mour eo m̧okta, Iaar kālōt n̄an ļoor Jisōs Kraist. Kajitkin ajri ro n̄an kwaļo̧k jet iaan kālōt ko em̧ōj aer kōm̧m̧ani raan eo (ta eo n̄an kōņaki, ta eo n̄an m̧ōn̄ā, im m̧aanļo̧k wōt). Jei uwaak ko ioon boot. Kōmeļeļeik bwe Jemād Ilan̄ em̧ōj an letok n̄an kōj anemkwōj in kālōt, maron̄ in kōm̧m̧an kālōt ko. Katakin kōn Kweļo̧k eo ilo Lan̄, ke Jemād Ilan̄ eaar kwaļo̧k karōk eo An. Kōm̧eļeļeik ke kōjerbal anemkwōj in kālōt ej juon m̧ōttan eo eaorōk ilo karōk eo. Jipan̄ ajri ro m̧eļeļe bwe Satan eaar kōņaan ukōt karōk eo im bōk maron̄ ko ad n̄an kālōt. Jisōs Kraist eaar kōņaan ļoor karōk eo an Jemād Ilan̄ im eaar aje e make bwe en ad Rilo̧mo̧o̧r. Kalikkar n̄an ajri ro ke raar kālōt in ļoor Jisōs Kraist (lale Primary 6, katak 2). Je kajjitōk ko n̄an jipan̄ ajri ro ālij ta eo raar ekatak. Likūt kajjitōk ko ilowaan juon kōnno̧. Kālōt juon ajri n̄an bōk juon kajjitōk jān kōnno̧ eo im uwaake. Innām kōm̧m̧an bwe ajri eo en kālōt bar juon n̄an bōk juon kajjitōk im uwaake. Wōnm̧aanļo̧k n̄an jon̄an iien eo emaron̄. Kwaļo̧k naan in kam̧ool kōn aorōkin wōnm̧aanļo̧k ilo ad ļoor Jisōs Kraist.
Baam̧le eo aō im n̄a kōm naaj jerkakpeje. M̧okta jān im kōn weppān eo jān bisop eo ak branch būreejtōn, kūr juon uwaan eo ewōr an jeļā kōn mej an juon eo ejitōnbōro n̄an kwaļo̧k naan in kam̧ool kōn ta meļeļein Jerkakpeje eo n̄an e. Likūt pija ko jān Gospel Pija ilo juon ejouj ilo laajrak in ej waļo̧k 227 ilōn̄: 227 (Jisōj ej Jar ilo Gethsemane), 228 (Karmejjete Jisōs), 230 (Jerkakpeje), 231 (Kallūb eo an Jisōs), 233 (Mary im Irooj eo eaar Jerkakpeje), 234 (Jisōs ej Kwaļo̧k Kinej ko An), im 316 (Jisōs ej Katakin ilo Tu Iōn̄ in Amedka), Ilo tōre eo ripiaano eo ej kōjan̄jan̄, kōm̧m̧an bwe ajri ro ren letōletak juon dōkā jidikdik. Jiron̄ er ke ej kōkalen dōkā eo eaar depil ļo̧k jān mejān lōb eo lūbōn Kraist. N̄e ejem̧ļo̧k al eo, kōm̧m̧an bwe ajri ro ren jibwe dōkā eo bōk pija eo jān lōn̄tata in ejouj eo im kwaļo̧k kake ak kālōt juon n̄an jipan̄. Wōnm̧aanļo̧k n̄an kajjojo pija, bōjrak ālkin 234 n̄an riiti Luke 24:39 ilo juon wōt iien. Jipan̄ ajri ro meļeļe bwe ālkin an Jisōs kar jerkakpeje, rijilōk ro kar maron̄ en̄jake pā ko pein ejja āinwōt an ajri ro maron̄ en̄jake peier make. Wōnm̧aanļo̧k wōt ilo pija ko jet. im katakin bwe kōn Pinmuur eo an Jisōs Kraist, aolep ro em̧ōj mour ioon laļ renaaj jerkakpeje. Kōm̧m̧an bwe armej ro kar kūrtok er ren kwļo̧k aer naan in kam̧ool.

Pija jān Brad Teaare