Mōņōņō n̄an Katak
Jej aikuj bukōt jelāļo̧kjen, jān katak im barāinwōt jān tōmak (lale D&C 88:118).
Russel kar lukkuun kōjparok an āti pinjel ko an ruo im bok in jeje ko an ilo pāāk in jikuul eo an. Ekar kuumi kolan bōran im kar lale elan̄n̄e nuknuk ko an rem̧m̧an. Ālikin an atbokiji jinen, ekar ettōr n̄an jikin kabōjrak eo an baj ko waeer. Ekar lōmnak emaron̄ in edbokļo̧k elan̄n̄e baj eo eban mōkaj tok. Ekar lukkuun m̧ōņōņō in jino jikuul juōn katton ilo mour eo an.
Aolep iiō, Russel kōn kalimjek laddik ro jein im leddik ro etal n̄an jikin bōjrak eo an baj eo, ijo rej iuwe ilo baj eo im etal in jikul. Ekar kōņaan iuwe ilo baj eo ippāer. Elapļo̧k, ekar kōnaan katak menko raar kōm̧m̧ani. Ekar kōnaan katak elapļōk kōn dinosaure ko. Ekar kōņaan jelā ekōjan an tūrein ko jerbal. Ekar kōņaan jelā riit. Emōj an jelā ke ekōņaan jikuul.
Rūkaki eo an Russel, Mrs. Wilson, kar ettōn̄dikdik ke eaar delon̄ ilo kūlaajruum eo. Lieo ekar kwalok n̄an Russel tepōl eo an. Ekar barāeinwōt kwaloke ia eo enaaj kalitotoiki pāāk in jikuul eo an.
“Bōlen jenaaj katak kōn dinosaur ko mokta,” Russel kar lōmņak.
“Ruwainene n̄an jikuul,” Mrs. Wilson kar ba. “Jej itōn kwalok kadkadid im kōmelele kōn jabdewōt men ko kōn kōj.”
Russel kar kōm̧m̧ōn̄. “Ekwe, jej aikuij jelā kajjen aolep,” ekar lōmņak. “Bōlen jenaaj katak kōn dinosaure ālikin menotemjej.”
Ke ej jejjet iien an Russel kwalok kadkadin e make, ekar ba, “Eta in Russel. Elap aō m̧ōņōņō in katak kin aolep men—elaptata kin tūrein im dinosaure.”
“Elukkun em̧m̧an, Russel,” Mrs. Wilson kar ba. Russel kar ettōn̄dikdik. Ekar lukkuun kōtmene ke mōttan wōt jidik renaaj katak kōn tūrein im dinosaur.
Ak rekar jab. Rōkar kan̄i jināāk ko aer im ikkure kōn būlak ko re-dolul, tiraānkōl, im jukea.
“Mrs. Wilson, n̄aat jenaaj katak kōn dinosaur ko im tūrein? Russel kar kajitōk.
“Ejjab kiio, Russel,” kōra eo kar ba. “Kiio eien riiti juōn bwebwenato.”
“Ej ke kōn dinosaur ko?”
“Jaab, Russel.”
Ālikin bwebwenato eo rōkar katak kōn alpapet. Innam ej awa in ro̧o̧l n̄an moko.
Russel kar lukkuun matōrtōr.
Ekar kōjobolul bōran nabōjļo̧k ilo wuntō in baj eo. Ekar ettōr jān baj eo n̄an mweo im delon̄ ilo kōjam eo itumaan. Ekar ettōr ļo̧k n̄an ruum eo an im kalibubuik bōran ilo juōn būlankōt.
Jinen kar delon̄ im likit pein ioon bōran Russel. “Ekōjkan raan in jino in am?” jinen kar kajjitōk.
“Enana. Ijamin naaj katak aolep men, im ijjab bar ro̧o̧l Aolep menko kōm kar kōm̧m̧ani ej ikkure kōn būlak im riit bwebwenato.”
“Ekwe, Russel, ejkab baj raan eo jinoin in,” jinen kar ba.
Russel kar jijet im kalimjeke jinen. “Ikōnaan katak kōn dinosaur im tūrein im riit—kiiō.”
Jinen kar jijet iturin ioon beet eo. “Kwōj jab maron̄ katak kōn aolep men ilo juōn wōt iien. Katak ebōk iien. Im jon̄an eo elap kwoj katak kiiō, kwonaaj maron̄ katak elap ļo̧k iliju im jeklaj.”
“Ta eo kwoj ba? Russel kar kajjitōk.
“Ekwe, kwoj aikuij in katak kōn alpapet mokta jān am katak riit. Im kwoj aikuij in katak riit mokta jān am maron̄ riit kōn jabdrewōt men kwoj kōnaan jelā kaki,”jinen kar jiron̄ļo̧k.
Russel kar kōlmenlokijen kake. Bōlen ebar lōn men ko n̄an katak kaki ijelokin dinosaur im tūrein. “Ekwe, Ij lōmnak Inaaj bar kajjeon̄ in jikuul iliju,”laddik eo kar ba.
Jinen kar ettōn̄dikdik n̄ane.
“Ak, Mama, kwōj lōmnak jemaron̄ ke in bōk juōn bok in dinosaur jān laprāre en?”
“Ij lukkuun lōmnak jemaron̄ kōm̧m̧ane.”
Pijaiki jān Jim Madsen