O Mea Na Aoao Mai e Iosefa

Faaaliga ma le Perofeta Soifua

Na silafia e Iosefa Samita le taua o faaaliga i le Ekalesia.

E amata i le Uluai Faaaliga, o Iosefa Samita o se perofeta filifilia a le Atua e faaalia mai Lana afioga ma [Lona] finagalo i le lalolagi. A o tuputupu ae o ia i lenei tiute, na maua e Iosefa se malamalamaaga manino i le faatulagaga o faaaliga i le Ekalesia. O nisi nei o aoaoga a Iosefa Samita e uiga i faaaliga ma le tiute o le perofeta soifua.

E ALAGATATAU FAAALIGA

“O le mataupu faavae o faaaliga ua sili atu le taua i lo le mataupu faavae o le leai o ni faaaliga; aua o le mea moni e tasi e faaalia mai le lagi e sili le taua i lo manatu faaalia uma o vaega tau lotu o i ai nei.”

“O le faaolataga e le mafai ona oo mai e aunoa ma faaaliga; o se taumafaiga faivavale mo se tasi e galue e aunoa ma faaaliga… . E le mafai e se tasi ona galue mo Iesu Keriso sei vagana ua i ai sana molimau ia Iesu; ma o le agaga lenei o valoaga [tagai Faaaliga 19:10].”

O LE FAATULAGAGA O FAAALIGA

“Ma aua e te poloaiina le o loo ulu ia te oe, ma o loo ulu foi i le ekalesia; aua ua ou tuuina ia te ia ki o mea lilo, atoa ma faaaliga ua faamaufaailogaina, seia ou tofia mo i latou se tasi e sui ia te ia” (MFF 28:6–7).

“O Peresitene po o le [Au] Peresitene Sili o loo vaaia le Ekalesia; ma o faaaliga o le mafaufau ma le finagalo o le Atua mo le Ekalesia, e auala mai i le Au Peresitene. O le faatulagaga lenei a le lagi, ma le mana ma avanoa o le Perisitua [Mekisateko]. O le avanoa foi lea o soo se tofi i lenei Ekalesia e mauaina ai faaaliga, e uiga i lona lava valaauga patino ma ona tiute i totonu o le Ekalesia.”

MULIMULI I LE PEROFETA A LE ATUA

“E toatele alii sili ma le atamamai faapea foi ma tamaitai o loo i lo tatou lotolotoi ua atamamai tele mo le toe aoaoina; o le mea lea e tatau ona oti ai i latou ma lo latou valea, ma i le toetutu o le a latou iloa a latou mea sese.”

Mai Aoaoga a Peresitene o le Ekalesia: Iosefa Samita Kosi aoaoina a le Perisitua Mekisateko ma le Aualofa, 2007), 207, 209, 215.