O Le Uluai Faifeautalai o le Au Paia o Aso e Gata Ai, o Samuelu Samita, Na Soifua Mai i le 200 Tausaga Ua Mavae

O Samuelu Samita, o le uluai faifeautalai O Le Ekalesia a Iesu Keriso o le Au Paia o Aso e Gata Ai, ma o le uso o le uluai Peresitene o le Ekalesia, le Perofeta o Iosefa Samita, na soifua mai i le 200 tausaga ua mavae i le aso 13 o Mati, 1808.

O le susuga ia Elder M. Russell Ballard o le Korama a Aposetolo e Toasefululua, ma o se tasi e tupuga mai ia Ailama Samita, o se uso o Samuelu ma Iosefa, na saunoa i se faigalotu ia Mati i le Tapeneko i Sate Leki e uiga i le talatuu o le uluai faifeautalai.

“Talu mai le auaunaga muamua faafaifeautalai a Samuelu,” na saunoa ai Elder Ballard, “ua valaauina ai e le Ekalesia le silia i le tasi miliona o faifeautalai e auauna atu i misiona e 348. [O loo latou] aoaoina atu nei le talalelei i atunuu e 176 ma i gagana ma ituaiga gagana e 164.”

Na saunoa Elder Ballard e ui ina sa leai ni tagata fou na aumai e Samuelu Samita i totonu o le Ekalesia i le taimi o lana uluai misiona, i Egelani Fou, ae o lona tuuina atu o kopi o le Tusi a Mamona ia i latou na latou fetaui, na iu ai ina sosoo ma le liua o Polika Iaga, Heber C. Kimball, ma o laua auaiga.

O Samuelu na faafeiloaiina atu ia Oliva Kaotui i le Perofeta o Iosefa, ma na avea Oliva ma se uo vavalalata ma se tusiupu i le Peresitene muamua o le Ekalesia faapea foi ma se uso a taitai. Ina ua maea ona papatisoina ia Iosefa ma Oliva i le 1829, na avea Samuelu Samita ma tagata lona tolu na papatisoina e avea ma se tasi o le Ekalesia.

Na auauna atu foi Samuelu mo se taimi e avea ma tusiupu a o faagasolo le faaliliuga o le Tusi a Mamona. O ia lea o se tasi o uluai tagata e toaono o le Ekalesia i le taimi na faavae aloaia ai i le aso 6 o Aperila, 1830, ma o se tasi o Molimau e Toavalu o le Tusi a Mamona. O na molimau uma sa latou taua na latou vaai ma fetagofi i papatusi auro.

E ui ina sa faia e isi tagata le galuega faafaifeautalai i luma atu o misiona a Samuelu Samita, e pei o Thomas B. Marsh, Solomon Chamberlain, ma isi tagata o le aiga o Samuelu, ae o Samuelu o le tagata muamua lea na faataunuuina se tofiga aloaia faafaifeautalai ina ua uma ona faavaeina le Ekalesia. O ana malaga faafaifeautalai i le va o le tausaga 1830 ma le 1833 na oo atu i le silia ma le 4,000 maila (6,400 km).

Na maliu Samuelu i Navu, Ilinoi, i le 33 o aso talu ona mavae le fasiotia o ona uso o Iosefa ma Ailama e ni tagata leaga i Karefasi, Ilinoi. O le gasegase na maliu ai o ia na mafua ona o ana taumafaiga e solaese mai tagata leaga a o taumafai e oo atu e fesoasoani ia Iosefa ma Ailama.