Fetaui Lelei mo le Galuega
I le taulaga pisi maotua o Nsawam, i Ghana—ua lauiloa o le aai o falaoa ona o le tele o pisinisi e faatauina atu le falaoa i tafa ala pe mai foi i ipu mafolafola tetele e faapaleni ma le faaeteete i luga o o latou ulu—o loo nofo ai Princella Djanku, o se tamaitai talavou o le Paranesi a Djankrom, Itu a Asamankese Ghana. Na papatisoina o ia i le iva o ona tausaga, ma o Princella, ma lona tuagane masaga o Prince, faapea ma lona aiga atoa o ni tagata malolosi O Le Ekalesia a Iesu Keriso o le Au Paia o Aso e Gata Ai.
A o vaavaai Princella mo se galuega faatino o le Alualu i Luma o le Tagata Lava Ia, sa tau le saili mamao lava o ia. I totonu o lana lava paranesi sa i ai se faifeau faamisiona mo fesoasoaniga alofa o Sister Thompson, o le sa taumafai lava e aoao atu le Igilisi i tagata matutua o le nuu. Talu ai ona o le toatele o tagata i Nsawam e le iloa fenanui, ae le mafai foi e Sister Thompson ona tautala i le gagana Twi o loo faaaogaina e tagata o le nuu, sa faigata ai lava ia te ia ona fesootai atu i ana tagata aooga.
O le oo atu o Princella, o le na aoaoina le Igilisi i le aoga, ma e tautala foi i gagana e fa a lo latou risone, lea e aofia ai le gagana Twi. Sa fetaui lelei o ia mo le galuega. Sa mafai ona fesootai atu o ia i tagata uma lava.
“Na oo mai i lo’u mafaufau le galuega faatino o le fesoasoani atu lea i le vasega faitautusi ma tusitusi, ina ua ou oo atu i le tulaga faatonuina o le poto,” o le tala lea a Princella. “O le taimi muamua, sa ou manatu e faigata tele ona ou tu i luma o ou tina ma tama [o tagata matutua o lona nuu] ma aoao atu ia i latou le Igilisi. Mo le vaiaso muamua ma le lua, sa le faigofie aua na latou manatu, sa ou alu atu e aamu ia i latou, peitai, sa ou maua se avanoa e faamalamalama atu ai e uiga ia te au lava ia.” Ina ua mavae lea, na amata ona sologa lelei mea uma, ma na faapea foi ona sili atu le lelei o fesootaiga i le va o le faiaoga talavou ma au aooga matutua.
Ina ua uma ona faamaeaina lana galuega faatino, sa mafaufau Princella e tuua le vasega ae peitai na filifili o ia e le tuua le vasega. Fai mai a ia, “E ese le manaia o le vasega faitautusi ma tusitusi, ma sa ou le manao lava ou te aluese.” O loo faaauau pea ona auauna atu ma le alofa Princella, ma le manatuaina o i latou o e auauna atu i isi, ua auauna atu foi i le Atua.
Na ausia e Princella lana Faailoga o le Aloaia o le Tulaga Faatamaitai Talavou. Fai mai o ia, “Ua fesoasoani le polokalama a Tamaitai Talavou e faatupuina ai lana molimau i le Ekalesia. Ua ou iloa na valaauina Iosefa Samita e le Atua, ma e moni le Ekalesia. Ou te iloa o Peresitene Thomas S. Monson o se perofeta soifua ma o loo ia mauaina faaaliga mo le Ekalesia aoao. Ou te iloa o aoaoga faavae ma mataupu faavae o le Ekalesia e moni uma lava.”
E ui lava ina le toe i ai Princella i Tamaitai Talavou o se tamaitai talavou, ae o loo i ai pea o ia i Tamaitai Talavou. Ua valaauina o ia e auauna atu o se failautusi i le au peresitene o Tamaitai Talavou i le paranesi.
O se tasi o ana sini, ua faamoemoe Princella e alu i se misiona mo le Ekalesia pe a atoa lona 21 ina ia mafai ai ona ia faasoaina atu lana molimau ma faaauau ai lana masani o le auauna atu.