E Fai La’u Vaega, ae Fai e le Atua Mea o Totoe
Ua avea nei au ma se talavou matua, ae o se aafiaga na ou oo i ai a o ou laitiiti na fesoasoani ia te au i lou olaga atoa. Ou te sau mai Renaico, o se aai laitiiti i Chile. Ou te manatua lava ma le ootia le taimi na avea ai lou tina o Ruby, ma se peresitene o le Peraimeri. Sa gaogao lava si o matou paranesi i na taimi; sa na o au lava le tamaitiiti na alu [i le Peraimeri]. Na te aoaoina le vasega. Pe a matou taunuu atu i le lotu i taeao o Aso Sa, e faapea mai o ia, “Talofa, Jenny. O au o lou faiaoga o le Peraimeri.” O lenei faaupuga sa fai pea lava pea i vaiaso taitasi. E fai se ma tatalo amata ona usu lea o se pese, ona amata loa lea o lana lesona.
Sa masani ona asiasi atu o ia i tamaiti sa le toaaga mai, o e na ia taua ma le alofa o “ana pele laiti.” Sa masani ona matou tau atu o taaalo nei tamaiti i le auala, ma e faatu e Mama le taavale ma fai atu i se leo fiafia, “Ei, tatou fetaui i le lotu i le Aso Sa.” O le toatele lava o i latou e fai mai ua lelei. Ae a oo i Aso Sa, sa na o maua lava ma Mama.
O nisi taimi ou te ita ai lava pe a le o mai na tamaiti i le lotu. Ou te faapea atu, “Ua lava lena Mama. E le fia o mai i latou.” Ae, i lana ala alofa, e tali mai ai, “E tatau ona fai lou tiute ma ia onosai.”
I se tasi aso na tupu ai se mea e faigata ona talitonuina. Na sau se tamaitiiti e igoa ia Carlos i le lotu ma fai mai, “Vaai, Sister Ruby, na ou fai atu foi ou te sau.” Ia, o le mea e lelei ai ua toalua i maua. O lenei mea na susulu ai foliga o lou tina i le olioli, ma o taimi uma lava e sau ai Carlos i le vasega, e fai mai ai ia te au, “Ua e vaai la i ai, lau pele, e tatau lava ona tatou onosai, aua o le a fai e le Atua isi mea o totoe.”
I se tasi aso na amata ai ona o mai Carlos ma se tamaitiiti e igoa ia Alexis. Sa matou fiafia lava matou te taaalo toatolu, ma o loo avea pea i matou o ni uo e oo mai i le aso. Mai lava i lena aso, na amata ai ona o mai nisi tamaiti e toatele.
Na faamaloloina mai lou tina mai lona valaauga ina ua mavae ni tausaga se lua. Ina ua ia tuua le Peraimeri, e 35 tamaiti na auai mai i vaiaso taitasi. E ese le manaia o le vaaia o le toe tauia mai o le alofa o lou tina mo tamaiti. Ua silia i le 10 tausaga ua mavae talu ona faamaloloina o ia, ae ua toatele atu le Ekalesia iinei i le taimi nei, ae leai lava se tasi ua sili atu lana ausiga o le aumaia o ni tamaiti se 35 e auai [i le Peraimeri]!
Ua avea nei au ma peresitene o le Peraimeri. Ou te alofa tele i nei tamaiti laiti, o e ua matuai aoaoina au. Ou te faafetai lava mo lenei valaauga matagofie faapea ma le faataitaiga a lou tina o le faapalepale. Ou te iloa o loo soifua le Tama Faalelagi ma e moni lava le tala a lou tina: “E fai lau vaega, ae fai e le Atua mea o totoe.”