Mauaina o se Molimau
Faamatalaga
Ou te matuai faafetai lava mo le i ai o le Liahona i lo matou fale. O le tele o fesili o loo taliina ai. O se tusiga na tusia e Elder David A. Bednar, “Saili e Aoao e Ala i le Faatuatua” (Sete. 2007), na fesoasoani tele ia te au. Sa ou lagonaina le Agaga a o ou faitauina, ma na oo mai le tali ia te au e faapea, ina ia mafai ona maua sau molimau i le Tusi a Mamona, e tatau i se tagata ona faailoa atu lena molimau, ma o le a fesoasoani le Agaga ia te oe e te iloa ai e moni le Tusi a Mamona.
Genes L. Nallonar, Filipaina
E Tolu Savali mo Tagata Uma
O aso uma e faateleina ai lava lou agaga faafetai mo le mekasini a le Ekalesia, o le Liahona. E taua tele lona sao i lou olaga. Ua tele taimi ua fesoasoani ai le Liahona ia te au e fai ia filifiliga sao. I le tusiga ia Aperila 2007 “O Savali e Tolu i le Autalavou Matutua,” na uunaia ai e Elder Earl C. Tingey le autalavou ina ia avea o ni tagata malolosi o le Ekalesia. Sa ia fautuaina i latou ina ia saunia mo a taeao e ala i le faia o filifiliga poto i le taimi nei, aua afai latou te oo i se tulaga leaga, o le a latou le popole vale i le le iloa o le mea e ao ona fai, ae o le a saunia e taulimaina. O lenei tusiga sa faatatauina i le autalavou matutua o le Ekalesia. Ua 55 ou tausaga, ae ina ua ou faitauina, na ou iloa ai sa tusia foi mo au.
Olga Khripko, Iukureini
Na Faapefea Mai le Mekasini?
Sa masani ona avea lou toalua ma le tagata na nafa ma le tufatufaina o le Liahona i masina taitasi i Peru atoa. O ana malaga latou te feiloai ai ma tagata e le auai i le Ekalesia, e galulue i fale o leoleo faitotoa o ni sikulati. Pe a latou fesili ane [ia te ia], “O a na mea o loo feaveai i lau veni?” o lana tali faaaloalo e faapea, “O Mekasini a le Ekalesia a Iesu Keriso o le Au Paia o Aso e Gata Ai—o mekasini e ta’ua o le Liahona.”
E tele lava ina latou fia iloa ma mananao ai e iloa atili, ma e masani lava ona ave e lou toalua ni kopi faaopoopo na te foaiina atu. O taimi uma lava e alu atu ai i nei nofoaga masani, ma pe a toe foi atu o ia, e fesili atu ai ia te i latou, “Na faapefea mai le mekasini?” Ma afai latou te fai mai na latou faitauina, na te tusia o latou igoa ina ia oo atu i ai faifeautalai i o latou fale ma aoao i latou e uiga i le Ekalesia.
I se tasi aso, i ni tausaga mulimuli ane, na ma tuua ai le malumalu. O se mea na tei ai lou toalua ina ua ia iloaina le tagata sa i totonu o le fale o sikulati. Na papatisoina o ia, ma o lenei ua saunia o ia ma lona aiga pele e avea o se aiga e faavavau.
Faafetai lava uso ma tuagane pele, mo le tusia o tusiga mananaia. Ua fesoasoani ia i tatou uma ina ia agai ai i luma, ma o mea uma tatou te faitauina i mekasini e faagaeetia ai o tatou loto.
Ana Meza de Eulogio, Peru
O Le Taua o le Salamo
Na valaauina au e auauna atu o se faiaoga mo le Aso Sa lona fa i le Aualofa. O se tasi o lesona na ou faia na faatatau i le lauga na faaautuina “Salamo ma le Liuaina” na saunia e Elder Russell M. Nelson i le Liahona o Me 2007. A o tapena lau lesona, na ou aoao ai ma lagonaina le taua o le salamo.
Ou te tulimatai lava i le faitauina o le Liahona. E tele ni mea e mafai ona ou aoaoina ma lagonaina e ala i le Liahona.
E le mailoa, Iapani
O Le Liahona o lo Matou Taiala
Ua silia i le 34 tausaga o ou faitauina le Liahona. E masani lava ona maligi ou loimata pe a ou faitau e uiga i ou uso ma tuafafine ma lo latou taumafai ma le faamaoni e ola i le talalelei. Ou te fiafia i mea uma lava o le Liahona, ae e faapitoa ona ou faafetai mo le tusiga “Fesoasoani ia i Latou o Loo Tauivi ma le Tosina Atu i Itupa Tutusa” na saunia e Elder Jeffrey R. Holland (Oke. 2007). Faatasi ai ma tusitusiga paia, o le Liahona o se taiala mo lo matou aiga.
Ua taofia le igoa