Faia o ni Uo
O Le Auala Faapitoa a Omar mo le Fealofani
O TAMAITI I LE LALOLAGI ATOA E TATALO, USU PESE O LE PERAIMERI, MA AOAO E UIGA I LE TALALELEI— E PEI LAVA O OE! O LE MASINA LENEI, IA TATOU FEILOAI ATU IA OMAR SALGADO O VALLE DE ANGELES, HONDURAS.
O manulele ma pusi ma taifau e le o taimi uma e fealofani ai. E masani lava ona tuli e le tasi o i latou le isi.
Ae i le fale o le alii e iva tausaga o Omar Salgado i Honduras, e le o se mea e le masani ai le vaaia o ia faatasi ma le manulele tautala lanumeamata sesega a le aiga i luga o lona lima, a o tilotilo ifo i ai le pusi mai le taualuga, pe o le savalivali filemu foi o le pusi i tua o le umukuka a o nofonofo le taifau i talaane o le faitotoa. E foliga mai e fealofani meaola uma.
E ataata Omar a o ia tuuina le manulele tautala i lona pusa, ina ia mafai ona ia alu e fafaga moa. E fiafia o ia e tausi meaola a lona aiga. O le fesoasoani atu e le na o le pau lea o le mea e fiafia ai nei matua—o se tasi lea o mealilo a Omar o le fealofani ma isi.
Tausia e le Tasi o le Isi
E maua e tagata uma o le aiga o Salgado se avanoa e fesoasoani atu ai. Ae o le avea ma ulumatua, ua iloa ai e Omar ua faamoemoe atu ona matua ia fesoasoani atu i lona uso ma lona tuafafine laitiiti pe a la manaomia le fesoasoani.
O le ava i ona matua ma le faamalosia o lona aiga e taua lea ia Omar. E tatau i le auaiga o Salgados ona faalagolago le tasi i le isi aua e le toatele ni o latou tuaoi. O le fale aupito lata atu ia i latou e tu pe a ma le 10 minute e savali ai.
O lea la, e ui ina mafai ona vaai o ia i ana uo i le aoga ma le lotu i Aso Sa, ae e faaalu lava e Omar le tele o le taimi faatasi ma lona uso e ono tausaga le matua, o Arnold, ma lona tuafafine e fa tausaga o Nathaly. E pei lava o a la meaola, e tele lava ina latou fealofani.
“Matou te taumafai lava ia matou le misa,” na fai mai ai Omar, aua e sili atu le malie o le avea ma ni uo.
Faaalu Faatasi o le Taimi
Pe a faatasitasi Omar, Arnold, ma Nathaly, e tele lava ni mea e mafai ona latou faia. E fiafia le aiga e pepese faatasi i viiga. O le viiga e sili ona fiafia i ai Omar o le “Aoao Mai ia Ou Savali i le Malamalama” (Tusipese a Tamaiti, 70).
E tele ina taaalo le toatolu lenei i taaloga. O se tasi o taaloga e sili ona fiafia i ai o le ive’a, o le lafi mai le isi tagata i totonu ma faataamilo i lo latou fale ma togavao lata ane. O le isi taaloga e sili ona fiafia i ai o le tuli. E tuli e le tasi le isi i le fanua laugatasi e faataamilo i lo latou fale.
“Ou te fiafia ma te taaalo,” o le tala lea a Arnold e uiga i lona uso matua.
Nonofo i le Vanu o Agelu
E fiafia Arnold e taaalo faatasi ma Omar, ae fiafia Nathaly e tusi ata ma ia.
E fiafia Omar e tusi ata ma valivali i ana peni vali. E masani lava ona ia tusia ni togalaau, mauga, ma fale. E le o se mea e maofa ai. E tele mea mananaia e tusi i le mea o loo nofo ai i atumauga e lata i Valle de Angeles, o se nuu ua lauiloa mo ona tagata tusiata atamamai. E faapena foi le manaia o le igoa, o lona uiga o le “Vanu o Agelu.”
O vanu ma mauga o loo siomia ai le fale o Omar e tumu i laau ma laauiti mananaia. O le mea moni, e nonofo le aiga o Omar i se faatoaga o fugalaau, lea e tausi ai e lona tama fugalaau e faatau atu ona e ese le mananaia.
E tumu ia api a Omar i ana tusitusiga mananaia. Ma e masani foi ona maua atu Nathaly o valivali ata i ona autafa.
Aoao Ia Amiolelei
O le fealofani ma le faifaimea faatasi e fesoasoani e faamalosi ai le aiga o Omar. Ma e faapena foi i le o i le lotu ma le faitauina faatasi o tusitusiga paia.
“E tele mea na ou aoaoina i le Peraimeri,” o le tala lea a Omar. “E ese le lelei o ou faiaoga.”
I le Peraimeri, e aoao ai Omar e uiga ia Iesu, ma fai mai o ia, o le aoao e uiga ia Iesu, ua fesoasoani ia te ia e iloa ai le ala e fesoasoani ai i ona matua ma avea ma se atalii lelei.
E faapitoa le fiafia o Omar e faitau i tala mai le Tusi a Mamona. “Ou te fiafia lava ia Nifae,” na fai mai ai. O le tala e sili ona ou fiafia i ai e uiga i le ai uamea ma le fauina e Nifae o le vaa. O Nifae o se atalii lelei, o le na taumafai i taimi uma e faamalosi lona aiga.
“Sa usiusitai Nifae,” o le tala lea a Omar a o faauma lona fafagaina o moa. Na te tuueseina le meaai a moa ma faatalitali mo se minute e vaai pe i ai se isi mea e mafai ona ia faia a o lei tamoe ese e taalo i le tuli. “Ou te taumafai foi e usiusitai.”