O Le Upu ma le Upu
Mataio 5:14–16
I le Lauga i luga o le Mauga, na aoao mai ai e le Faaola ia i tatou le taua o le faasusulu atu o le malamalama o le talalelei i o tatou olaga.
Malamalama o le Lalolagi
“E finagalo Iesu ia i tatou taitoatasi ia iloa o ia ona o le mana liua o lena malamalama faapea foi ma le olioli le mafaamatalaina lena na te aumaia i o tatou olaga. A o le aafiaga o le talalelei e tatau lava ona oo atu i tagata taitoatasi. O le avea lea ma malamalama lena e aveesea le pogisa mai olaga o i latou o siomia i tatou. E leai se tasi e faaolaina na o ia ma mo ia lava, e pei foi ona leai o se lamepa e tutuina mo lona lava manuia ma le lelei.”
Elder Joseph B. Wirthlin o le Korama a Aposetolo e Toasefululua, “Fau Ia Sa’o,” Liahona, Nov. 1990, 47.
Aai i luga o le Mauga
O aai o anamua sa masani ona faatutu i luga o mauga ina ia maua ai se puipuiga ma se saogalemu sili atu. E mafai ona iloa mamao mai e tagata ma iloa le mea e sosola i ai pe a oo mai puapuaga. E faapefea ona faatusa le avea ma se soo o Keriso i se aai i luga o le mauga?
Mea e Fua ai Saito
O le upu lenei e afua mai i le iunite faaEleni anamua o le fuataga o meaai mamago (e tusa ma le 8.7 lita) ma e faatatau foi i le koneteina e faaaoga mo le fuaina o lenei iunite. Vaai faalemafaufau i le ufiina o se moligao i se koneteina e pei o se pakete.
Ia Faapea Ona Pupula Atu lo Outou Malamalama
“O le lamepa sa faamumuina e le Alii i lenei augatupulaga e mafai ona avea ma sulu i le lalolagi atoa, ma o le vaai o isi i a tatou galuega lelei o le a mafai ona taitaiina ai i latou e vivii atu i lo tatou Tama oi le Lagi, ma faia e i latou i o latou lava olaga faataitaiga sa latou vaai o tatou faia.
“O le amata atu ia te oe ma au o le a mafai ai e le nuu atoa, o e ala atu ia latou amioga lelei i o tatou olaga i o tatou aiga, i a tatou galuega, faapea ma a tatou faafiafiaga, ona avea ma aai i luga o le mauga e mafai e tagata ona vaavaai atu i ai ma aoao, ma avea ma tagavai i malo e mafai e tagata o le lalolagi ona maua ai se malosi.”
Peresitene Gordon B. Hinckley (1910–2008), “O Se Aai e Faatuina i Luga o le Mauga, Liahona, Nov. 1990, 8.
Galuega Lelei
Faitau upu o le viiga “Ua Ou Faia Ea se Lelei?” (Viiga, nu. 136). Tusi i lalo nai mea e mafai ona e faia e fesoasoani ai pe siitia ai se tasi, ma fuafua ni taimi e faia ai. Tuu lau lisi i se mea e faigofie ona e iloa atu ai.
Faamatalaga a le faatonu: O le itulau lenei e le o faamoemoe e avea o se faamatalaga atoatoa o le fuaiupu o le mau filifilia, ae ua na o se amataga mo au lava suesuega.