Ua Fesoasoani le Tusi Lesona Fou a le Vasega Pepe ina ia Faateleina le Taulai atu i le Aoao Atu ma le Aoaoina Mai
O le a vave ona oo atu se tusi lesona fou i potu o vasega pepe i le Ekalesia atoa.
O le tusi lesona, Vaai ia i o Outou Tamaiti, o loo aofia ai ni lesona se 30 o loo taulai atu i aoaoga faavae o le talalelei ma na patino lava le mamanuina mo vasega pepe.
I le taimi muamua, sa faatonuina ai faiaoga o vasega pepe ina ia fetuunai ia lesona mai le tusi lesona o le Peraimeri 1 lea sa faaaogaina mo le vasega a le Peraimeri mo tamaiti e taitolu tausaga. O lenei punaoa fou ua mafai ai e faiaoga ona tuuina atu se lesona e fetaui lelei mo tamaiti mai le 18 masina e oo i le 3 tausaga le matutua.
O lesona taitasi o loo aofia ai se ata lanu e faapea foi i se ata faigofie lea e mafai ona kopiina ina ia fesoasoani ai e faamalosia ia mataupu faavae sa aoaoina i le lesona. O fautuaga mo fesoasoaniga vaaia, manatu mo aoaoga, ma gaoioiga e filifili mai ai o loo aofia ai i lesona uma taitasi.
Sa fuafuaina ma le fetuutuunai, ua ofoina atu ai e lenei punaoa le avanoa mo faiaoga e tuuina atu ai ni lesona i soo se faatulagaga po o le faaaoga o vaiaso sosoo ina ia faamamafa atu ai se mataupu faavae e le o faigofie ona malamalama i ai lenei vaitausaga.
Faatasi ai ma autu e pei o le “E Mafai Ona Ou Tatalo i le Tama Faalelagi” po o le “E Mafai Ona Faatasia Lo’u Aiga e Faavavau,” e mafai e nei lesona ona fesoasoani e fausia se faavae o le malamalama i soo se faatulagaga ma e mafai foi ona faaaoga e matua e avea o se meafaigaluega mo aoaoga i totonu o le aiga.
“Ua matou fiafia i le i ai o lenei tusi lesona fou a le vasega pepe,” na saunoa ai Cheryl C. Lant, le peresitene aoao o le Peraimeri. “Na fatuina mo fanau, mo lo latou atinaega faaleagaga, ma lo latou malamalama faalauaitele. O le a tutusa le taua i lima o taitai o vasega pepe faapea ma matua.”
O le a maua le Vaai ia i o Outou Tamaiti i gagana e 27 i le faaiuga o le 2008 ma o le a tufatufaina atu i taitai perisitua o iunite. O le a maua foi i faletusi o le Ekalesia i le ldscatalog.com.