Savali a le Au Peresitene Sili
Ia Tasi
O le Faaola o le lalolagi, o Iesu Keriso, na fetalai mai e uiga ia i latou o le a avea o se vaega o Lana Ekalesia: “Ia tasi; ma afai e le tasi outou e le a au outou” (MFF 38:27). Ma i le foafoaga o le tane ma le fafine, o le lotogatasi mo i laua i le faaipoipoga sa lei tuuina atu o se faamoemoe; a o se poloaiga! “O le mea lea e tuua ai e le tane lona tama ma lona tina, ae faatasi ma lana ava: ona avea ai lea o i laua ma tino e tasi” (Kenese 2:24). E finagalo lo tatou Tama Faalelagi ia tasi o tatou loto. O lena faatasiga i le alofa e le na o se manatu. O se mea e tatau ona i ai.
O le manaoga ina ia tasi i tatou e le mo na o le olaga nei. E le tatau ona i ai se mutaaga. O le faaipoipoga muamua na faia e le Atua i le faatoaga ae lei mafai ona oo le oti ia Atamu ma Eva. Sa ia tuuina i alii ma tamaiti i le amataga se manaoga ina ia faatasia o se tane ma se ava e faavavau e nonofo ai i ni aiga i se faatasiga atoatoa ma le amiotonu. Sa ia tuuina i ana fanau se manaoga ina ia ola i le filemu ma i latou uma o loo siomia ai i latou.
Peitai ona o le Pau na manino mai ai o le ola i se olaga lotogatasi o le a le faigofie. Na vave oo mai mala. Na fasiotia e Kaino lona uso o Apelu. Sa feagai le fanau a Atamu ma Eva ma faaosoosoga a Satani. Faatasi ai ma ona tomai, lotovale, ma le faitogafiti na tuliloaina ai e Satani lana sini. O le faafeagai lea o le faamoemoe o lo tatou Tama Faalelagi ma le Faaola. E mafai ona la tuuina mai ia te i tatou se faatasiga atoatoa ma le fiafia e faavavau. O Satani, lo Laua fili ma lo tatou fili, na ia iloaina le ata o le faaolataga a o lei faia le Foafoaga. Na ia iloa e na o le ola e faavavau lava e mafai ai ona faatumauina na mafutaga paia ma le fiafiaga faaleaiga. E manao Satani e aveesea i tatou mai i e ua pele ia i tatou ma faamalaia i tatou. Ma o ia lava lea na totoina le fatu o le feitagai i loto o tagata ona o le faamoemoe ia mafai ai ona fevaevaeai ma tuueseese i tatou.
O i tatou uma lava ua iloa se mea e uiga i le lotogatasi ma le loto eseese. I nisi taimi i totonu o aiga ma atonu foi i nisi tulaga ua tatou vaaia i le olaga, pe a faamuamua e le tasi tagata mea e fiafia i ai le isi tagata nai lo mea e fiafia i ai o ia lava, i le alofa ma le ositaulaga. Ma o tatou uma lava ua iloa se mea e uiga i le faanoanoa ma le lagona o le tuua toatasi ma le nofo toatasi. Tatou te le manaomia le ta’u mai e se tasi o le mea e tatau ona tatou filifilia. Ua tatou iloa. Peitai tatou te manaomia le faamoemoe ina ia mafai ona tatou maua le lotogatasi i lenei olaga ma agavaa ai e maua lena lotogatasi i le faavavau i le lalolagi a sau. Ma tatou te fia iloa foi le ala o le a oo mai ai lena faamanuiaga sili ina ia tatou iloa le mea e ao ona tatou faia.
E Mafai Ona Suia o Tatou Uiga
Na fetalai mai le Faaola o le lalolagi e uiga i lena lotogatasi ma le ala o le a tatou suia ai o tatou uiga ina ia maua ai lena lotogatasi. Na ia aoaoina manino mai lena mea i le tatalo na Ia faia i Lana faatasiga mulimuli ma Ona au Aposetolo a o lei maliu o Ia. O lena tatalo maoae matagofie o loo tusia i le tusi a Ioane. Ina ua lata ona feagai o Ia ma le taulaga matautia mo i tatou uma ina ia mafai ai ona maua le ola e faavavau. Ua lata ona tuua e Ia le au Aposetolo o e na Ia faauuina, o e na Ia alofa i ai, ma e o le a Ia tuuina atu i ai ki e taitai ai Lana Ekalesia. Ma sa Ia tatalo atu ai i Lona Tama, le Atalii ua atoatoa i le Matua atoatoa. Ua tatou iloa i Ana fetalaiga le ala e mafai ai ona tasi aiga, e pei ona o le a i ai i fanau uma a lo tatou Tama Faalelagi o e mulimuli i le Faaola ma Ana auauna:
“E faapei ona e auina mai au i le lalolagi, ua faapea foi au ona auina atu o i latou i le lalolagi.
“Ou te faapaia foi au e sui ai i latou, ina ia faapaiaina i latou i le upumoni.
“E le faapitoa lau tatalo mo i latou nei, a o i latou foi e faatuatua ia te au ona o la latou upu;
“Ina ia tasi i latou uma; faapei o oe le Tama o i totonu ia te au, o au foi o i totonu ia te oe, ina ia tasi i latou i totonu ia te i taua, ina ia talitonu le lalolagi na e auina mai au” (Ioane 17:18–21).
I na lava upu itiiti na Ia faamanino mai ai le ala e mafai ai e le Talalelei a Iesu Keriso ona tatalaina loto ina ia tasi. O i latou o e talitonu i le upumoni e mafai ona latou talia sauniga ma feagaiga ua ofoina mai e Ana auauna tofia. Ona mafai ai lea, ona suia o latou uiga e ala i le usitai i na sauniga ma feagaiga. O le Togiola a le Faaola, ua mafai ai ona faapaiaina i tatou. Ona mafai ai lea ona tatou ola i le lotogatasi, e pei ona tatau ai, ina ia maua ai e i tatou le filemu i lenei olaga ma mau ai faatasi ma le Tama ma Lona Alo i le faavavau.
O le galuega a Aposetolo ma perofeta i lena taimi, e pei lava o le taimi nei, o le aumaia lea o fanau a Atamu ma Eva ia tasi i le faatuatua ia Iesu Keriso. O le faamoemoega sili o mea na latou aoao atu, ma mea ua tatou aoao atu, o le faatasia lea o aiga: o tane, ava, fanau, fanau a fanau, augatama, ma le mea mulimuli o le aiga atoa o Atamu ma Eva o e o le a filifilia le ala o le lotogatasi.
Tou te manatua na tatalo le Faaola, “E sui ai i latou”—sa fetalai e uiga i Aposetolo—“ua faapaiaina ai au lava, ina ia mafai ai foi ona faapaiaina i latou e ala i le upumoni” (Ioane 17:19). O le Agaga Paia o le na te faapaiaina. E mafai ona tatou maua le Agaga Paia e avea ma a tatou soa aua na toefuataiina mai le Perisitua Mekisateko e le Alii e ala i le Perofeta o Iosefa Samita. O ki o lena perisitua ua i ai i le lalolagi i ona po nei. E ala mai i lona mana ua mafai ai ona tatou osia feagaiga lea e mafai ai ona tatou maua e le aunoa le Agaga Paia.
O le mea e i ai tagata ua latou mauaina lena Agaga, e mafai ona tatou faamoemoe e i ai le lotogatasi. E tuuina mai e le Agaga le molimau o le moni i o tatou loto lea e maua ai le lotogatasi e i latou o e maua lena molimau. O le Agaga o le Atua e le mafai ona faatupuina se finauga (tagai 3 Nifae 11:29). E le mafai ona faatupuina ni lagona o le eseesega i le va ma tagata lea e taitaiina atu ai i le faatuiese.1 O le Agaga o le Atua e maua ai le filemu ma se lagona o le tasi ma isi. E faalotogatasi ai tagata. O se aiga lotogatasi, se Ekalesia lotogatasi, ma se lalolagi filemu e faalagolago lena i tagata ua lotogatasi.
Mafutaga a le Agaga Paia
E oo lava i se tamaitiiti e malamalama i le mea e tatau ona fai e maua ai le mafutaga ma le Agaga Paia. Ua tau mai ia i tatou e le tatalo o le faamanatuga. Tatou te faalogo i ai i vaiaso taitasi a o tatou auai ia tatou sauniga faamanatuga. I na taimi paia, tatou te faafouina ai feagaiga na tatou osia i le papatisoga. Ma ua faamanatu mai ai e le Alii ia i tatou le folafolaga na tatou maua ao faamauina i tatou o ni tagata o le Ekalesia—o le folafolaga ina ia tatou maua le Agaga Paia. O upu nei o le tatalo o le faamanatuga: “Latou te loto ina ave i o latou luga le suafa o lou Alo, ma manatua pea o ia ma tausi i ana poloaiga ua ia tuuina mai ia te i latou; ina ia latou maua pea lona Agaga e faatasi ma i latou” (MFF 20:77).
E mafai ona tatou maua Lona Agaga i le tausia o lena feagaiga. Muamua, ua tatou folafola atu e ave i o tatou luga Lona suafa. O lona uiga e ao ona tatou vaai ia i tatou lava o ni Ona soo. O le a tatou faamuamua o Ia i o tatou olaga. O le a tatou mananao i mea e finagalo ai o Ia nai lo mea tatou te mananao ai po o mea ua aoao mai le lalolagi ia tatou mananao i ai. O lo tatou faamuamua o mea o le lalolagi, o le a le mafai lava ona tatou maua ai le filemu. O le faamuamua e se aiga po o se malo o mea o le lalolagi e iu lava ina taapeape ai i latou.2 O le mataupu faavae o le faia e le tasi i le isi o le mea e finagalo le Alii tatou te faia, lea e afua mai i le tauaveina o Lona suafa i o tatou luga, e mafai ai ona avatu i tatou i se tulaga faaleagaga, o se vaega o le lagi i le lalolagi.
Lua, ua tatou folafola atu e manatua pea o Ia. Tatou te faia lena mea i taimi uma tatou te tatalo ai i Lona suafa. Ae maise lava pe a tatou ole atu mo le faamagaloga, e pei ona tatau ona tatou faia soo, tatou te manatua ai o Ia. I lena taimi, tatou te manatua ai Lana taulaga ua mafai ai ona i ai le salamo ma le faamagaloga. Pe a tatou ole atu, tatou te manatua o Ia o lo tatou fautua i le Tama. Pe a oo mai lagona o le faamagaloga ma le filemu, tatou te manatua ai Lona onosai ma Lona alofa e le uma. O lena manatua, e faatumuina ai o tatou loto i le alofa
Tatou te tausia foi la tatou folafolaga e manatua o Ia pe a tatou tatalo faatasi o se aiga ma pe a tatou faitauina tusitusiga paia. I tatalo faaleaiga i se taumafataga i le laulau, e mafai e se tasi tamaitiiti ona tatalo mo le isi ina ia faamanuiaina ina ia sologa lelei mea uma i se suega po o se faafiafiaga. Pe a oo mai le faamanuiaga, o le a manatua e le tamaitiiti na faamanuiaina le alofa o le taeao ma le agalelei o le Fautua, o le ona le suafa na faia ai le tatalo. O le a fusia faatasi ai loto i le alofa.
Tatou te tausia la tatou folafolaga e manatua o Ia i taimi uma tatou te faapotopotoina ai o tatou aiga e faitau tusitusiga paia. O loo molimau tusitusiga paia i le Alii o Iesu Keriso, aua o le savali lena a perofeta i taimi uma. E tusa lava pe le manatuaina e fanau upu, ae o le a latou manatua le tusitala moni o Iesu Keriso lea.
Tolu, ua tatou folafola atu, a o tatou taumamafa i le faamanatuga, e tausi i Ana poloaiga, [poloaiga] uma lava. O Peresitene J. Reuben Clark Jr. (1871–1961), o se fesoasoani i le Au Peresitene Sili, a o ia talosaga atu mo le lotogatasi i sana saunoaga i le konafesi aoao—ma sa ia faia lea talosaga i le tele o taimi—na lapataia i tatou e tetee atu i le filifilia o mea o le a tatou usiusitai i ai. Sa ia saunoa mai: “E leai se mea na tuuina mai e le Alii ia i tatou e le aoga pe le tatau foi. Na Ia faatumuina Tusitusiga Paia i mea e tatau ona tatou faia ina ia tatou maua ai le faaolataga.”
Sa toe saunoa mai Peresitene Clark: “Pe a tatou taumamafa i le faamanatuga, ua tatou osifeagaiga e usiusitai ma tausi i ana poloaiga. E leai lava se mea e sisi’o i ai. E leai foi ni tulaga e ese ai po o ni eseesega.”3 Sa aoao mai Peresitene Clark , e pei lava ona tatou salamo i agasala uma, ae le o se agasala e tasi, e faapena foi ona tatou folafola atu e tausia poloaiga uma. E ui ina faigata i le faalogo, ae e faigofie. Pau lava o lo tatou gauai atu i le pule a le Faaola ma folafola atu e usiusitai i soo se mea Na te poloai mai ai (tagai Mosaea 3:19). O lo tatou gauai atu lea i le pule a Iesu Keriso lea o le a faatagaina ai i tatou e fusia faatasi o ni aiga, o se Ekalesia, ma o ni fanau a lo tatou Tama Faalelagi.
Ua tuuina mai e le Alii lena pule e ala i Lana perofeta i ana auauna lotomaulalo. Ona mafai lea ona liua e le faatuatua lo tatou valaauga o se faiaoga o aiga po o se faiaoga asiasi i se feau mai le Alii. Tatou te o atu mo Ia, i Lana poloaiga. O se alii masani ma sana soa laitiiti talavou i aiga ma le faamoemoe o le a fesoasoani ia mana o le lagi ia i laua e mautinoa ai ua lotogatasi aiga ma ia leai se feitagai, pepelo, faatuaupua, po o le tautala leaga (tagai MFF 20:54). O le faatuatua ua valaauina e le Alii ia auauna, o le a fesoasoani ia i tatou e le amanaia ai o latou le atoatoa pe a latou aoaiina i tatou, aua latou te aoaiina i tatou. O le a sili ona tatou iloa o latou faamoemoega lelei nai lo o latou le atoatoa. O le a le oo ai ia te i tatou se lagona tetee ae o le a lagona ai foi le faafetai i le Matai, o le na valaauina i latou.
Pa Pupuni i le Lotogatasi
O loo i ai nisi poloaiga, afai e solia, e faaumatia ai le lotogatasi. O nisi e faatatau i upu tatou te fai atu ma nisi e ala mai i o tatou uiga faaalia i faamatalaga a isi tagata e fai mai. E le tatau ona tatou tautala leaga e uiga i se tasi. E tatau ona tatou vaai i itu lelei o isi tagata ma tautala lelei e uiga i isi tagata i soo se taimi lava.4
I lea lava taimi, i soo se taimi foi, e tatau ona tatou tutu e tetee atu i e tautala faaamuamu i mea paia, aua o le taunuuga mautinoa o lena mea o le tetee atu i le Agaga ma faatupuina ai finauga ma le fenumiai. Na faaali mai e Peresitene Spencer W. Kimball (1895–1985) le ala e tali atu ai e aunoa ma le finauvale a o taoto o ia i se moega toso a le falemai ma sa ia fai atu i le na tosoina le moega, o lē, i se taimi o lona le fiafia, na ia ta’u ai fua le suafa o le Alii:
“‘Faamolemole! Faamolemole! O le suafa lena o lo’u Alii ua e upuleagaina.’
“Sa matuai sāō mea uma, ona musumusu mai lea o se leo malu, ‘Ou te faamalie atu.’ ”5 O se aoaiga musuia ma le alofa, e mafai ona avea o se valaaulia ia lotogatasi. O le le tuuina atu [o se aoaiga] pe a uunaia ai e le Agaga Paia, o le a oo atu ai i le feeseeseai.
Afai tatou te fia maua le lotogatasi, o loo i ai poloaiga e ao ona tatou tausia e uiga i o tatou lagona. E ao ona tatou faamagalo atu ma ia le toe ita i e na sese mai ia i tatou. Na faia e le Faaola le faataitaiga sili i luga o le satauro: “Le Tama e, ia e faamagalo atu ia te i latou; aua latou te le iloa le mea ua latou faia” (Luka 23:34). Tatou te le iloa loto o e na faia ni sese ia i tatou. Tatou te le iloa foi pogai uma o lo tatou lava ita ma le tiga. Na tau mai e le Aposetolo o Paulo le ala tatou te alolofa atu ai i se lalolagi e le atoatoa ona tagata, e aofia ai ma i tatou lava, ina ua ia fai mai, “E onosai le alofa, e agamalu; e le losilosi le alofa; e le mitamitavale le alofa, e le faafefeteina, e le amio mataga, e le saili e ia ana lava mea, e le faaitaitagofie, e le mafaufau i se mea leaga” (1 Korinito 13:4–5). Ona ia tuuina mai lea o se lapataiga malosi e uiga i sese o isi ma galo ai o tatou lava sese ina ua ia tusia, “aua o ona po nei tatou te vaai atu ai faanenefu i le faata; a o ia ona po tatou te fesagai ai: o nei ona po ou te iloa ai faaleatoa; a o ia ona po ou te iloatino ai, e pei ona iloatino o au” (1 Korinito 13:12).
O le tatalo o le faamanatuga e mafai ona faamanatu mai ai ia i tatou i vaiaso taitasi le ala e oo mai ai le meaalofa o le lotogatasi e ala i le usiusitai i tulafono ma sauniga o le talalelei a Iesu Keriso. Pe a tatou tausia a tatou feagaiga o le tauaveina o Lona suafa i o tatou luga, ia manatua pea o Ia, ma tausi i Ana poloaiga uma, o le a tatou maua le mafutaga a Lona Agaga. O lena mea o le a faamaluluina ai o tatou loto ma faalotogatasia ai i tatou. Peitai o loo i ai ni lapataiga se lua lea e o mai faatasi ma lena folafolaga.
Muamua, e tumau le Agaga Paia ia i tatou pe afai tatou te ola mama ma ia aunoa i tatou ma le naunau i mea o le lalolagi. O le filifili i le ola le mama o le a tuliesea ai le Agaga Paia. Na pau lava i latou e mafuta ai le Agaga o i latou ia o e filifilia ala o le Alii nai lo le lalolagi. “Ia mama outou” (3 Nifae 20:41; MFF 38:42) ma ia alofa atu i le Atua ma lou “loto atoa, … manatu, mafaufau, ma le malosi atoa” (MFF 59:5) e le o ni fautuaga a o poloaiga. Ma e aoga nei poloaiga i le mafutaga a le Agaga, a aunoa ma ia mea e le mafai ona tasi i tatou.
O le isi lapataiga o le, ia faaeteete i le faamaualuga. O le lotogatasi lea e oo atu i se aiga po o se nuu e faamaluluina e le Agaga o le a aumaia ai le mana tele. Faatasi ma lena mana o le a oo mai ai le manatulia mai le lalolagi. Po o lena manatulia e aumaia ai viiga po o le mataua, e mafai ona taitai atu ai i tatou i le f aamaualuga. O lena mea o le a le fiafia ai le Agaga. Ae o loo i ai se puipuiga e tetee atu ai i le faamaualuga, lena pogai mautinoa o le fetoa’i. O le vaai atu lea i faamanuiaga ua liligi mai e le Atua i o tatou luga e le gata o se faailoga o Lona agalelei, ae o se avanoa foi e auai faatasi ma i latou ua siomia i tatou i se galuega e sili atu. E aoao e se tane ma lana ava le lotogatasi i le faaaogaina lea o o laua uiga e tutusa ina ia malamalama ai le tasi i le isi ae o o laua eseesega e faamalo ai le tasi i le isi i le auauna atu o le tasi i le isi faapea ma i latou o siomia i laua. O le ala lava foi lea, e mafai ai ona tatou lotogatasi ma i latou o e e le taliaina a tatou aoaoga faavae ae o loo i ai foi le naunautaiga ina ia faamanuiaina fanau a lo tatou Tama Faalelagi.
E mafai ona avea i matou ma e faatupuina le filemu, e tatau ai ona taua o e faamanuiaina ma o ni fanau a le Atua (tagai Mataio 5:9).
O loo soifua le Atua lo tatou Tama. O Lona Alo pele o Iesu Keriso, o le ao o lenei Ekalesia, ma ua Ia ofoina mai i tagata uma o e o le a talia le talalelei o le tagavai o le filemu. Talosia ia tatou ola agavaa uma mo lena tagavai.