Mai Lea Tupulaga i Lea Tupulaga
O le a sau mea a fai i le poto faaleagaga ua ofoina atu ia te oe?
Afai ua e faitauina le fuaiupu muamua o le Tusi a Mamona, ua e iloa la se mea e uiga i le alii e 17-tausaga o Juan Ordoñez ma lona tuafafine e 15-tausaga o Mayra, o le Uarota a Pachitol, Siteki a Patzicía Kuatemala.
O Juan, Mayra, ma o la uso ma tuafafine matutua e toafitu na “fanaua e matua lelei,” o e na tuufaasoloina atu ni tomai na manaomia e le aiga ina ia ola ai, e pei o aga masani a le aiga i le faiga o faatoaga ma totia [tortilla], faapea foi ma le gagana a o latou tuaa, Cakchiquel.
Ae e le na o le pau lena o itu ua pei ai lo latou aiga o le aiga o Nifae. O Juan ma Mayra ua i ai ni o la matua e malamalama e tutusa le taua o le tuufaasolo atu o se “poto sili o le agalelei ma mea lilo a le Atua” (1 Nifae 1:1) e pei o le tuufaasoloina atu o tomai e ola ai.
E ui o le toatele o le tupulaga e leai ni matua e pei o Liae ma Sarai e tuufaasolo atu i ai le talalelei (tagai faamatalaga i le itu i le itulau 47), ae mo Juan, Mayra, ma isi e i ai [ni matua faapena], o le fesili: Pe o le a tatou aoao la e pei o Nifae, e faalogo, ola i upumoni o le talalelei, ma tuufaasolo atu foi [ia tomai]? Pe o le a tatou pei o Lamana ma Lemuelu, o e na faalogo i lea lava faamatalaga e tasi ae na le mananao e saili le upumoni mo i la’ua lava ma na le mafai ona la tuufaasoloina atu?
E Faapefea Ona Tuufaasolo Atu?
E le manatua e Juan pe o le a lona matua i le taimi na amata ai ona la galulue ma lona tama i o latou fanua. “E amata lava ona matou o ma tamaiti a o laiti,” o le tala mai lea a le tama o Juan, o Joel. “Latou te aoaoina e ala i le vaavaai ona fai lea o mea e mafai ona latou faia, e faalagolago i lo latou malosi ma le gafatia.”
Na aoao foi e Mayra le faiga o totia i le ala lava lea, o le tilotilo i lona tina ma ona uso seia oo ina lava lona matua na te faia ai ma fesoasoani atu.
Ae o le suaina, totoina, ma le faia o totia e le na o le pau lena o mea ua tuufaasoloina atu mai le tasi tupulaga i le isi. A o miliina e le tina o Mayra o Carmela, ma faasiepi ia totia, sa ia faasiepiina foi uiga o lana tama teine. A o saunia, totoina, ma faaleleia le eleele e le uso o Ordonez, sa ia faia foi lena mea e tasi i le loto o Juan.
O le taimi atoa a o nonofo faatasi le aiga, sa mafai ona iloa e tamaiti e le gata i le ala na galulue ai o latou matua, ae o le ala foi na latou ola ai. Ma pe a tulai mai se avanoa, e faaaoga e o latou matua le talalelei o se autu o le talanoaga a o latou galulue.
Ae o le matauina—e oo foi i le faia—e le lava lea mo taimi uma. I totonu o le aiga muamua o le Tusi a Mamona, na faalogo foi Lamana ma Lemuelu i mea na faalogo foi i ai Nifae mai lo latou tama, ma sa la o foi ma fai le mea na fai atu ai lo laua tama. Ae na la misia se mea taua, o se mea o loo i ai ia Juan ma Mayra—o se manao e aoao.
O Le a le Tele o Lou Manao i Ai?
O Juan ma Mayra e nonofo i Patzicía, o se nuu Cakchiquel na o ni nai itula le mamao mai le Taulaga o Kuatemala. Ona o le toatele o i latou o e faatauina a latou totia ma sailia la latou tautua o le suaina o le eleele, e le tautatala i le faaSipaniolo, o lea sa taua ai ia Juan ma Mayra le aoaoina o le gagana Cakchiquel.
Ae e le o tagata uma e i ai lena lagona. E le o aoaoina le gagana Cakchiquel i aoga. O le gagana na tuufaasolo mai lea tupulaga i lea tupulaga mo le fia selau o tausaga. Ae ui i lea, o le oo lava i lea tupulaga, e toatele lava i latou o e e le mananao e aoaoina pe manatu foi latou te le manaomia le gagana.
O le naunau e iloa e taua atu nai lo le na o le aoaoina o se gagana. Na manao Liae ia iloa e lona aiga mo i latou lava e moni le talalelei, ae e le o lona aiga atoa na mananao e iloa (tagai 1 Nifae 8:12, 17–18). E faaopoopo atu i le faalogo atu i lona tama ma le faia o le mea na ia fai mai ai, sa fia iloa foi e Nifae mo ia lava (tagai 1 Nifae 10:17). O Lamana ma Lemuelu, e ui lava ina sa la usitai i lo la tama, sa la faia ma le musua (tagai 1 Nifae 2:11–12). Sa le fiafia i laua e taumafai ia iloa e i laua lava, i le faapea mai, “E le faailoa mai e le Atua se mea faapena ia te i matou” (tagai 1 Nifae 15:8–9).
Aua le Motusia le Filifili
A o tuputupu ae le la fanau, sa masani lava ona mafaufau Brother ma Sister Ordoñez pe o le a faalogo le la fanau. Mata o le a latou usiusitai? Mata o le a latou mananao e iloa, e pei o Nifae? Mata o le a latou tuufaasoloina atu le talalelei i a latou fanau?
Atonu ua fai si vave mo le iloaina. Ae ua i ai ia Uso ma Tuafafine Ordoñez le mafuaaga e faamoemoe ai.
Ua amata ona tuufaasolo atu e le la fanau matutua ia upumoni o le talalelei. Ma ua iloa foi e le fanau laiti ifo le taua o le tuufaasolo atu o le talalelei. “O nisi taimi e faigata ai ona talia fautuaga mai ou matua,” o le tala lea a Juan. “Ae ou te faafetai lava mo la laua fesoasoani.”
“E le faapea sa na o le kukaina o pi ma le faiga o totia sa la aoaoina mai ia te au,” o le tala lea a Mayra. “Ua la aoaoina au i le ala sao—ia mulimuli i le Atua.”