Taimi o Fetufaaiga

Le Tama e, O E i Ai Iina?

SAUNIA E Linda Christensen

“O le mea lea ou te fai atu ai ia te outou, o mea uma lava tou te ole mai ai i a outou tatalo, ina faatuatua ia o le a maua e outou, ona faia lava lea mo outou” (Mareko 11:24).

A o soifua Iesu i le lalolagi, e toatele tagata na o atu e faalogologo i Ana upu. Sa latou aumaia a latou fanau ina ia mafai ona faamanuiaina i latou e Iesu, ae na fai atu i ai le au soo e o ese. Na fetalai atu Iesu, “Ina tuu mai ia o tama iti e o mai ia te au, aua le vavao ia te i latou: aua e faapei o i latou nei o e o i le malo o le Atua” (Mareko 10:14). Sa alofa Iesu i tamaiti ma faamanuia i latou.

O le pese a le Peraimeri “O Le Tatalo A Le Tamaitiiti” e faamanatu mai ai ia i tatou lena tala faatusi paia ma aoao mai ia i tatou e uiga i le tatalo.

Le Tama e, o e i ai iina?
Pe o lagona mai tatalo uma?
Fai mai e mamao le lagi,
Ae ou te lagona le lata mai pe a tatalo.
Le Tama e, ou te manatua 
Se fetalaiga a Iesu anamua:
“Aua le vavao i tamaiti.”
Le Tama e, ua ou sau ai nei.

E alofa le Tama Faalelagi ia te oe. O oe o Lona atalii/afafine. E finagalo o Ia ina ia e tatalo atu e le aunoa ia te Ia—i soo se taimi, i soo se mea. O le fuaiupu e sosoo ai o lenei pese e faamanatu atu ai ia te oe e te tatalo.

Ole, ia te Ia;
Na te faafofoga.
Oe lona atalii;
E alofa ia oe.
Na te faafofoga;
I au tatalo.
E pei o le malo,
Le malo o le lagi.

(Tusipese a Tamaiti, 6–7)

Gaoioiga

E mafai ona e faaaogaina le api o tatalo o loo i le itulau U4 e faamanatu atu ai ia te oe e te tatalo. Aveese le itulau, ma tuu i talaane o lou moega po o totonu o au tusitusiga paia. Vali le ata, ma tusi ni mea e te manao e te faafetai atu ai i le Tama Faalelagi pe a e tatalo. E alofa o Ia ia te oe ma e faafofoga mai i tatalo uma lava. Na te faamanuiaina oe i mea e te moomia.

Manatu mo Taimi o Fetufaaiga

A o lei oo i le taimi o le fetufaaiga, fai ni faailoga faigofie se tolu e uu e tamaiti: Ole, Saili, Tuitui. Amata le taimi o fetufaaiga e ala i le fesoasoani atu i tamaiti e sue le Mataio 7:7, ma ia faitau faatasi. Tuu i luga ia faailoga, ma faamanatu faatasi ma tamaiti ia upu. Tauloto faatasi le mau. Molimau atu e faapea, tatou te aoao e uiga i le tatalo mai tusitusiga paia. Faaali atu le Pusa Ata o le Talalelei 305 (Enosa o loo Tatalo) ma le 403 (O Le Uluai Faaaliga). Faamatala atu ni tala o le tusi paia e uiga i le tatalo (tagai Enosa 1:1–18; Talafaasolopito—Iosefa Samita 2:14–20). Tuu se taimi i tamaiti e faasoa mai ai aafiaga na latou maua e uiga i le tatalo. Ia faaiu i le usuina o se pese po o se viiga e uiga i le tatalo, ma molimau atu e uiga i le mana o le tatalo.
Faaali atu le ata 3-53 mai le taga ata Peraimeri 3, ma faamatala atu le tala e uiga i le tatalo a Karolina (Peraimeri 3, lesona 26, i. 138–39). Toe fai le mataupu faavae o le talalelei mo le vaiaso: “E finagalo le Tama Faalelagi ina ia ou tatalo atu ia te Ia e le aunoa—i soo se taimi, i soo se mea.” Faafefiloi ia upu o fasifuaitau nei e lua: “valaau atu i lona suafa paia” ma le “ole atu ia te ia.” Tusi ia upu faafefiloi i luga o le laupapa sioka, ma fai atu i tamaiti e galulue faatasi o ni vasega e faatulaga sao ia fasifuaitau (tagai “Faafeleilogai,” O Le Aoao Atu, E Leai Se Isi Valaauga e Sili Ai [1999], 194). Fai i ai e sue i le Alema 34:17–18 e fesoasoani ai ia i latou i le sueina o le tali. Ia faamatala atu o nei fasifuaitau e lua o auala ia e faamatalaina ai le tatalo. Filifili ia upu autu (“laautoto,” “fanua,” “fale,” “aiga,” ma isi lava) mai le Alema 34:17–27 o loo taua mai ai nisi o mea tatou te tatalo e uiga i ai. Tusi i luga o le laupapa sioka. Tuu atu i tamaiti e sue upu i le mau, ma ia talanoaina pe faapefea ona faatatau lenei vaega o le mau i o latou olaga. Molimau atu e uiga i le mana o le tatalo i lou olaga.