Ou te Le’i Fiu
E tasi le tausaga talu ona uma ona ou papatiso i le 1963 i Atenitina, na valaauina ai au e auauna atu o se failautusi o le paranesi. I se tasi aso, na ou tau ai i ni pepa e lei faatumuina o faasologa o gafa ma talafaamaumau o le vaega faaleaiga. E aunoa ma ni aoaoga faamasani, sa amata ai loa ona ou faatumuina ia pepa faatasi ai ma le fesoasoani mai a lou tina. Sa ia manatuaina igoa o ona tuaa faapea ma tuaa o lou tama, faapea foi ma aso taua o o latou olaga, e tau lava i tua i tupulaga e fa. Sa ia manatua foi nisi o tagata o le tupulaga lona lima ma se tagata se toatasi o le tupulaga lona ono.
Sa ou lagona le naunautai e saga saili atili, ma sa ou galue loa e faamaonia ia faamatalaga na tuuina mai e lou tina ia te au. Ina ua ou iloa le faamoemoega o galuega o talafaasolopito o aiga, na vave lava ona ou tuuina atu i le malumalu igoa o nai ou aiga pele ua maliliu.
E ui ina sa faamanuiaina au i le itu o lou tina, sa fai si faigata o le itu o lou tama. E ui lava i au taumafaiga, ae ua lata i le 25 tausaga, na le mafai lava ona ou faamaonia le aso fanau o le tamamatua o lou tama. O loo i luga o lona pepa faaipoipo e faapea, na fanau o ia i Udine, Italia, o lea na ou tusia ai pe a ma le 30 ni tusi i lena nuu ma nuu lata ane. E leai se tali na faamaonia ai faamatalaga na ou sailia.
I le 1988 na tatalaina ai se lala o le faletusi o talafaasolopito o aiga i Rosario, ma na tofia ai au ou te faigaluega ai o se tagata e vaaia le faletusi. Na pei lava ua ou oo atu i le lagi, i le faigofie ona ou maua o na faamatalaga uma. Sa ou faaaluina le tele o itula i le faitauina, ma na ou okaina mai ni faamaumauga o ata mataninii mai le tele o aai. I le International Genealogical Index (IGI), na ou mauaina ai ia igoa tonu lava o lou tamamatua ma le tama o tamamatua. Sa ou tusi atu i le taulaga i Italia lea na fananau ai nei alii e toalua ma talosagaina o laua pepa fanau. Na faapea ona auina mai e le faifeau o le aulotu ia pepa fanau ia te au, ae na faamaonia mai e faamaumauga, o nei alii e toalua matou te le aiga.
Sa ou toe tusi atu foi i ai—o le taimi la lenei, sa ou fesili atu i le faifeau pe o ia te ia ni faamaumauga e uiga i lou tamamatua. Na ia faasino mai ia te au le faletele o le aai, o lea na ou tusi atu ai iina. Na matuai fiafia lou loto ina ua ou maua se pepa o loo i ai igoa ma aso taua e faatatau i ou matua matutua, matua o matua matutua, ma isi matua o matua matutua, ma le tele o isi tagata o lou aiga. Na faailoa mai foi i lea pepa o le igoa o lou tamamatua na suia ina ua taunuu atu i Atenitina o le mafuaaga lea o le faigata ona maua ona faamatalaga.
Sa ou toe tusi atu i le taulaga ma talosagaina e auina mai le pepa e muamua atu i le pepa na latou auina mai muamua. Sa latou faia lava faapea, ma na aofia ai igoa o isi tagata e 27. Sa ou faataunuuina sauniga o le malumalu mo nei tagata uma o le aiga, ma sa faamaonia e moni lava o i latou o ou augatuaa.
Ona o aafiaga matagofie faapenei, ua ou lagona ai le tauia lelei o au ona o au taumafaiga e saili ia talafaasolopito o aiga. E ui lava ina sa i ai taimi na lagona ai si le fiafia, ae ou te lei fiu lava. Na mafai ona ou iloa sa taitaiina lava au e le Tama Faalelagi i lau sailiga.
Ou te iloa o le a saunia e lo tatou Tama Faalelagi se avanoa mo i tatou uma o Lana fanau e maua ai sauniga o le malumalu, a le o le taimi nei o le Meleniuma. Ae ua ou iloa foi o o tatou tuaa o e ua taliaina le talalelei i le lalolagi o agaga, ua leva ona faatalitali mai mo i tatou e fai o tatou galuega o talafaasolopito o aiga. Afai tatou te tuuina atu a tatou taumafaiga sili i le Alii, o le a Ia saunia se ala.