Manatunatuga i Talafaasolopito o Aiga
I le taumafanafana o le 1979, na ou tei ai lava i lou iloa o nisi o tusi ma pepa a lou tina na teu i le tamaifale i tuafale o tagata o le uarota o le matou nuu i Lonetona, Onetario. I le aumaiga o mea na mafai ona ou maua mai nisi o atigipusa ua pala, na ou tau ai i ni siata o talafaamaumau o le vaega faaleaiga e lei uma ona faatumuina o lou aiga, faapea ni pepa o le faasologa o gafa, ma ni nai faamatalaga o sailiiliga. O le oa moni lava o se talafaasolopito patino e fa itulau na tusia e lou tina, o le na maliu i le 11 o ou tausaga. O lenei talafaasolopito matagofie na tusilimaina o loo faamatalaina ai lona olaga a o laitiiti i Egelani i le vaitau o le 1930 ma lona olaga e oo mai i le Taua Lona Lua a le Lalolagi. O le mauaina o nei faamaumauga na faaosofia ai le amataga o lou fiafia i talafaasolopito o aiga ma na liliu atu ai lou loto i ou augatama.
Na toetoe atoa le lua tausaga mulimuli ane, ia Aperila 1981, na maliu faafuasei ai lou tama. I ana meatotino na ou maua ai se mama na i ai mataitusi amata o lona igoa, CMY, ae ou te le manatuaina pe na ou vaai i ai i lona lima. Atonu sa ia faia lenei mama a o talavou a o tautua ai i le Neivi a Kanata o se tagata e sueina ma aveeseina maina i le taimi o le taua.
Ae o lenei, ina ua maliu o ia, sa na o au lava le tagata ola na faaalia i luga o le itulau e tasi o lau talafaamaumau o le vaega faaleaiga, o lea na ou faalagolago ai i ou aiga lautele e aumai ai nisi faamatalaga. O se tasi o nei aiga lautele o Betty, o se tuafafine faaletulafono o lou tamamatua, na nofo lava i le fale o lo matou aiga i Bexleyheath, Kent, Egelani. O taimi uma lava sa ou faamoemoe ai ou te asiasi ma aoao atili e uiga i le aiga o lou tina, ae i le avea ai o se tagata nofofua e aoga i le kolisi, sa le lava ni au tupe ou te asiasi atu ai. O lenei, faatasi ai ma sina seleni faatauvaa na tuua mo au ina ua maliu lou tama, na mafai ai ona totogi lau malaga e sopoia vasa e asiasi [i lou aiga].
O le aso na ou asiasi atu ai ia Aunt Betty mo le taimi muamua lava, sa ou lagona le fefe. Mata o le a malamalama o ia i lou naunau tele e iloa atili e uiga i tupulaga na muamua atu? Sa ou tilotilo ifo i le mama a lou tama, ua i ai nei i lou lima taumatau, na lafoia lona ataata i le faamalama o le pasi fogafale lua na ou tietie ai. Na aumaia ia te au le mafanafana, e pei na tuu lona lima i luga o lou tulivae e lagolagoina lau savali.
Sa talia fiafia au e Aunt Betty ma faailoa mai le tele o mea fou ma faamatalaga aoga e uiga i lou aiga, e aofia ai le mea moni e faapea, o le tama, o le tama, o lou tamamatua na fauina le fale o loo nofo ai o ia. O lena lava po, na faapea ona ou moe ai i le potumoe o lou tamamatua a o laitiiti. Ou te lei feiloai lava ia te ia, ae mai ata na ia fetufaai mai, na ou iloa ai ou te foliga uma lava ia te ia. Sa ia aumaia ma le agalelei ia te au nisi o nei ata tuai o le aiga, o tusi ma se Tusi Paia a le aiga na tusia ai igoa atoa, aso fanau, ma nuu na fananau ai ia tupulaga e lua o ou augatama e amata mai i le vaitaimi o le 1830.
Ua silia nei ma le 25 tausaga talu ona mavae lena aoauli timuga o Setema i Egelani, ina ua aveina atu ai e au laa lē mautonu mai le fale faatali pasi i se faafeiloaiga lē mautinoa i le fale o ou augatama. Talu mai lena aso, ua ou maua ai se vaega tele o faamatalaga mai tagata o lou aiga lautele e uiga i augatama i itu uma e lua o Atalani, ua mafai ai ona ou mautinoa ua faia o latou sauniga o le malumalu.
O le a ou manatua pea lou savali atu i le faitotoa pito i luma o le fale i le 32 Oaklands Road ma vaaia ai lou lava ataata i le tioata. Ua ou iloa nei, o le foliga masani na atagia mai ia te au sa le ese mai foliga talavou o lou tamamatua ua faafeiloaiina au.