Aisea ua Avea ai i Tatou ma Tagata o le Ekalesia Moni e Tasi?
O le mana aupito taua e mafai ona tatou umia o le oa lea o se molimau patino i lo tatou Alii o Iesu Keriso ma Lona mana togiola.
Aisea ua avea ai i tatou ma tagata o le Ekalesia moni e tasi? E ui lava ina le mafai ona ou taliina lenei fesili mo le 13 miliona o tagata o le Ekalesia, ae ou te fia faailoa atu mai lo’u loto ni nai tali atonu o le a fetaui tonu foi ma a outou tali.
O Oa o le Faavavau
“Faauta, o le maua le olaga faavavau ua mauoa o ia.” (MFF 6:7)
Sa lei avea oa ma se vaega o lo’u olaga faatamaitiiti. E toalima lo matou aiga: o lo’u tama ma nai o’u tei e toafa—na maliu lo’u tina i le lima o o’u tausaga. E utiuti le totogi o lo’u tama sa faaaoga e faatau ai a matou meaai; o le faatauga o ni lavalava sa tolotolo lava i tua mo se taimi umi.
I se tasi aso, sa ou atugalu ai, na ou alu ai i lo’u tama ma fai atu, “Tama, aisea e te le faatauina ai ni o’u seevae? Vaai i nei seevae; ua masaesae, ma ua aliali atu lo’u vaematua i le pu o le seevae.”
“Aumai sei fai,” na ia tali mai ai, ma, sa tago o ia i se vali seevae lanuuliuli ma polesi ai o’u seevae. E lei leva ae fai mai, “Atalii, ua uma ona fai.”
“E leai,” sa ou tali atu ai, “o lea lava e mafai ona e iloa mai lo’u vaematua.”
“E mafai foi ona fai le mea lena,” na ia fai mai ai. Na toe tago foi o ia i le vali seevae, ma tuu i lo’u vaematua, ma e lei umi ae iila foi lo’u vaematua ua pei o o’u seevae. O le taimi lena o le olaga na ou aoaoina ai o le fiafia e le faalagolago i ni tupe.
A o gasolo aso, sa aoaoina i matou e se soa faifeautalai i oa o le talalelei toefuataiina, o le aoaoga faavae o le ata o le faaolataga, ma aiga faavavau. Sa papatisoina i matou, ma ina ua amata le tofiga o lo’u tama o se peresitene o le itu, o lona faamoemoega muamua lava o le malaga i le malumalu ma le mauaina o faamanuiaga e maua ona o lena osigataulaga. O se malaga e 15 aso, e sopoia ai le 4,800 maila (7,725 km)—o se malaga e tumu i faigata ma toatuga, o alatanu lauleaga, o pasi e le lelei, e le iloa foi le mea e ui ai i le malumalu, ae sa matou malaga ma le faamoemoega tele i sauniga o le a matou auai ai.
Ina ua matou taunuu i le aai o Mesa, Arisona, sa matou agai atu loa i se magaala sa mafai ona matou iloa atu ai le maota o le Alii, o susulu ma matagofie mai. Ou te manatua le olioli na faatumulia ai o matou loto; sa matou taufai pepese ma vivii, ma sa maligi ifo loimata o le toatele o isi Au Paia.
Mulimuli ane i le malumalu, sa matou tootutuli o se aiga a o faalogologo i folafolaga matagofie e uiga i se aiga faavavau, faatasi ma le mautinoaina o lo matou tina, e ui ina e le o i ai, a ua avea nei ma o matou tina e faavavau, ma sa matou lagonaina le filemu ona o le iloa o i matou o se aiga faavavau.
O le folafolaga o le ola faavavau na matou maua ai oa o le faavavau! “Faauta, o le maua le olaga faavavau ua mauoa o ia” (MFF 6:7).
O Le Perisitua Toefuataiina
O le Ekalesia a Iesu Keriso o se ekalesia o ositaulaga “o tupu ma ositaulaga, o se nuu paia” (1 Peteru 2:9).
O le Ekalesia toefuataiina e tuu atu ai i aiga taitasi se e umia le Perisitua o loo i ai faatasi ma le mana o le Atua e faamanuia ai isi. Ua faafia ona mafai ona ou faalogoina se leo malu, ma le manaia o se tamaitiiti i le fale o fai mai, “Tama, pe mafai ona e faia so’u faamanuiaga?” ma tuu atu o’u lima i luga o lona ulu i taimi o mafatiaga ma faigata, ma tuu atu faamanuiaga o le faamafanafanaga ma le faamalologa, ma vaaia le mana o le perisitua ua tino mai lona aafiaga, ma faalogo atu ai i le aso e sosoo ai o faapea mai lena leo itiiti, “Faafetai lava Tama, sa ou moe lelei lava anapo.” Tatou te le tau o i se isi mea e saili mai ai “se isi” o i ai lena mana—o lea e ia i tatou! O se faamanuiaga le mafai ona aoao atu lenei mataupu faavae i a tatou fanau! E na o le pau lenei o le ekalesia i luga o le fogaeleele e ofoina atu ai lea faamanuiaga i aiga.
O le mana lenei, sa mafai ai ona ou faauuina o’u atalii taitoatasi i le perisitua ma o lea na latou maua ai le mana o le Atua e fai ai Ana sauniga.
O lea la, o se tasi foi lenei o mafuaaga ua avea ai au ma se tasi o lenei Ekalesia: aua ua toe i ai le mana o le perisitua i le fogaeleele ma oo mai ai i totonu o o tatou fale.
O A Tatou Molimau Faaletagata
O le mana aupito taua e mafai ona tatou umia o le oa lea o se molimau patino i lo tatou Alii o Iesu Keriso ma Lona mana togiola.
E oo mai se molimau ia te i tatou pe a tatou ola i se olaga agavaa ma saili i le tatalo. “O le a tuuina atu foi le Agaga ia te outou i le tatalo i le faatuatua” (MFF 42:14), o le apoapoaiga lea a lo tatou Alii e ala mai i le Perofeta o Iosefa.
Ina ua ono tausaga le matua o lo’u atalii o Tanielu, sa vaai mai i lo’u popole ona sa tatau ona ou auai i se konafesi faalesiteki. Sa ou le mautinoa pe o le a le mea o le a aoao atu i le Au Paia. Sa sau o ia ia te au ma faapea mai, “Tama, e matua faigofie tele lena mea.” O le vaaiga lena a tamaiti i mea uma lava.
“Ia se’i ta vaai la i ai atalii,” sa ou fai atu ai. “Talu ai la e faigofie, ta’u mai po o le a le mea e mafai ona ou talanoa atu ai ia i latou.”
“Talanoa atu ia i latou e uiga i le tatalo,” na ia ta’u mai ai ia te au.
“O se mataupu lelei lena,” sa ou fai atu ai ia te ia, “ae ua pasia foi le faalogo i le tatalo; o le a se mea fou e mafai ona ou talanoa atu ai ia i latou?”
“E faigofie tele lena mea, Tama. Muamua, ta’u atu ia i latou, ‘Ae e te lei amata ona talanoa atu i le Tama Faalelagi, mafaufau i mea e te manao e ta’u atu ia te Ia.’”
“E foliga mai o se manatu manaia tele lena,” sa ou tali atu ai. “Ona a lea?”
“Ia, a uma loa ona e mafaufau i ai, ta’u atu loa ia te Ia! A uma, ona e faatali lea sei vaai pe i ai se mea Na te ta’u mai ia te oe.”
O lea, o a tatou tatalo, e talanoa mai ai le Agaga i o tatou agaga ma molimau mai ia i tatou i le moni o lo tatou Faaola.
Ua ou matua maofa lava i le alofa o lo’u Faaola o Iesu Keriso na faaalia i le afio ifo mai le afioaga i le lagi i se lalolagi na teena ai e le toatele Lana savali, ma e ui lava ina sa le i ai ia i latou le mana e faaumatia ai Lona soifua, ae sa latou faasalaina lava o Ia i le oti. Sa totogi e Keriso le tau mo a’u agasala, o o’u ma’i, o puapuaga, ma faanoanoaga. O ona tiga sa le mafaamatalaina; sa na ona ta’ua e Luka “o lona afu foi ua pei o ‘alu’alu toto” (Luka 22:44).
E sili atu i lo isi mea uma, o le mafuaaga lenei o lo’u auai i le Ekalesia: aua sa tuia e le Agaga Paia lo’u loto ma faailoa mai ia te au o loo soifua Keriso, o Ia o lo’u Faaola, sa Ia totogiina le tau mo a’u agasala, ma ua uma ona Ia saunia le ala lea afai ou te ola e tusa ai ma Ana mataupu, e mafai ai ona ou olioli i isi faamanuiaga uma ua folafola mai.
I ni nai vaiaso talu ai, na maliu ai foi lo’u tama, ma ua matua sili atu i lo se isi lava taimi ona ou faafetai i lo’u Atua ona o le oa ma le matagofie o Lana aoaoga faavae.
Aua e mafai ona faaauau le olaga faaleaiga i talaatu o le oti. Aua ua toefuatai mai i le fogaeleele le perisitua tautupu. Ma talu ai sa talanoa mai le Agaga i lo’u agaga, ma aumaia ai ia te au se molimau o loo soifua lo’u Faaola o Iesu Keriso ma e ala i Lana puluvaga o le a mafai ai ona ou mafuta faatasi ma Ia e tusa ai ma lo’u faamaoni. Ona o nei mafuaaga faatasi ai ma isi mafuaaga, ua avea ai au ma se tasi o le Ekalesia moni e tasi i luga o le fogaeleele, ma o le a faavavau lo’u faafetai ona o lenei mea. I le suafa o Iesu Keriso, amene.