Tausia i le Afioga Lelei a le Atua
E taua lo tatou tausia o i latou o e tatou te aoaoina ma taitaia e ala lea i le taulai atu i aoaoga faavae, mataupu faavae, ma faatatauga o loo faamamafa mai i tusitusiga paia ma afioga a o tatou perofeta o aso e gata ai.
A o avea au ma se alii talavou sa matou galulue faatasi ma lo’u tama ma o’u uso i le tausiga o povi ma solofanua i le matou pa manu i le itu i saute o Iuta ma Arisona i matu. Sa aoaoina i matou e lo’u tama e faapea, afai matou te mananao e pu’e se tasi o a matou solofanua e tietie ai, e na o le pau lava le mea matou te faia o le luluu o fatu laau ma tuu i se pakete ma lulu mo ni nai sekone. E le afaina po o totonu o le pa po o le lotoa e i ai solofanua; e taufetuli uma mai lava e aai i fatu laau. Ona mafai lea ona matou faamauluina malie se faagutu i luga o o latou ulu a o loo aai. E masani ona ou maofa i se auala faigofie faapea sa matuai aoga lava.
I nisi o taimi, afai matou te le mananao e faaalu le taimi e la’u mai ai fatu laau mai le fale e teu ai, na ona matou tuuina lava o palapala i totonu o se pakete ma lulu, e taumafai e faavalea ai solofanua ina ia faapea o loo ia i matou ni fatu laau mo latou e aai ai. Ina ua latou iloaina lo matou taufaasese, o nisi solofanua sa nonofo pea, ae o isi sa taufetuli ese ma e toetoe lava a le mafai ona tapue. Na masani lava e tele ni aso o toe taumafai ina ia latou talitonuina i matou. Na vave ona matou aoaoina faapea o le faaalu o le taimi e fafaga ai pea a matou solofanua i fatu laau e faafaigofie ai ona taulimaina i latou ma tuuina atu ai ia i latou le tausiga faateleina ma le malosi sili atu.
E ui lava ua tele tausaga ua tuanai atu talu aso sa ou i ai i le faatoaga, ae o le aafiaga sa ou oo i ai lea na faatoa faamatalaina atu sa fesoasoani ia te au a o ou mafaufau i fesili nei: O a ni mea e mafai ona tatou faia o ni faiaoga ma ni taitai o le Ekalesia e tuuina atu ai le tausiga faateleina faaleaoaoga faavae ma le faaleagaga mo i latou o e tatou te tautuaina?
Sa aoao mai Elder Jeffrey R. Holland: “O le toatele o tagata e le o mai i le lotu e saili na o nai mea moni o le talalelei, pe o mai e vaai ni uo ua leva, e ui lava e taua na mea uma e lua. Latou te o mai e saili se aafiaga faaleagaga. Latou te fia maua le filemu. Latou te mananao ia faamalolosia lo latou faatuatua ma faafouina lo latou faamoemoe. Latou te mananao, pe a faapuupuu, ia tausia i le afioga lelei a le Atua, ina ia faamalolosia e mana o le lagi. O i tatou o e tofia e lauga pe faiaoga pe taitai ua i ai se matafaioi e fesoasoani e saunia lena mea, i le lelei sili e mafai ona tatou faia ai.”1
Sa le gata ina aoao atu e le Faaola ma Ana auauna le taua o le fesoasoani i isi ina ia “tausia i le afioga lelei a le Atua” (Moronae 6:4); ae sa latou tuuina atu foi le taitaiga musuia i le auala sili e mafai ona faataunuuina ai le aoaoga ma le taitaiga. O le vaega e 50 o le Mataupu Faavae ma Feagaiga o se tasi o le tele o mau faamaonia o loo tuuina mai ai se fautuaga taua faapena. Ina ua uma ona faailoa atu ia atugaluga sa i ai i nisi o uluai paranesi o le Ekalesia, sa aoaoina loa e le Faaola se vaega o taitai e faatatau i le fofo o faafitauli sa latou feagai. O Ana aoaoga sa amataina i le tuuina atu lea o se fesili taua: “O le mea lea, o a’u le Alii ou te fesili atu ia te outou lenei fesili—pe na faauuina ea outou i se a?” (MFF 50:13). O le tali masani a le Alii o loo sosoo ai i le fuaiupu e 14: “Ina ia talai atu la’u talalelei i le Agaga, o le Fesoasoani lava lea na auina atu e aoao atu le upumoni.”
O tali i faafitauli sa feagai ma le Au Paia i le 1831 e tutusa lava mo luitau o loo tatou feagai i aso nei—e ao ona tatou aoao atu le talalelei a Iesu Keriso e ala i le mana o le Agaga Paia.
O le vaega e 50 o loo aofia ai ni ki taua i le tuuina atu o le tausiga mo i latou tatou te aoaoina ma i latou tatou te taitaia. O le ki muamua o loo maua lea i le apoapoaiga a le Faaola ina ia “talai atu la’u talalelei” (MFF 50:14, faamamafa faaopoopo). O loo manino ona aoao mai e tusitusiga paia e faapea o le talalelei e ao ona tatou folafolaina atu e le o le ”poto o le lalolagi” (Mosaea 24:7) ae o le “mataupu a Keriso” (2 Nifae 31:21). E ui o le talalelei a Iesu Keriso o loo fusia ai upumoni uma, ae le o upumoni uma e tutusa le taua.2 Na manino ona aoao mai e le Faaola e faapea o Lana talalelei, e muamua ma faasilisiliina, o Lana taulaga togiola. O Lana talalelei o se valaaulia foi ina ia maua faamanuiaga o le Togiola e ala i le faatuatua ia Keriso, salamo, papatisoga, mauaina le Agaga Paia, ma le tumau faamaoni e oo i le iuga.3
E pei lava ona sa ou aoaoina a o o’u talavou e faapea, e sili atu ona faatosina i a matou solofanua ia fatu laau nai lo se pakete e faatumu i palapala, sa ou aoaoina ai foi e sili atu le tausiga e maua mai le fatu laau nai lo le vaovao, ma e sili atu le tausiga e maua mai le vaovao nai lo le fasiofe, ma sa mafai ona fafaga se solofanua, e aunoa ma le tausia o ia. I le avea ai ma faiaoga ma taitai, e taua lo tatou tausia o i latou o e tatou te aoaoina ma taitaia e ala lea i le taulai atu i aoaoga faavae, mataupu faavae, ma faatatauga o loo faamamafa mai i tusitusiga paia ma afioga a o tatou perofeta o aso e gata ai nai lo le faaaluina o le taimi taua i mataupu ma punaoa e faaleai se taua.
I le avea ai ma se faiaoga sa ou aoaoina ai o se talatalanoaga a le vasega e taulai atu i le Togiola a Iesu Keriso e matuai sili atu le taua nai lo le talanoaina o ni autu e pei o le nofoaga tonu o le nuu o Saraemila i faafanua o ona po nei. I le avea ai ma se taitai sa ou aoaoina ai o fonotaga faaleautaitai e sili atu ona anoa pe afai o le tatou faamuamua pito i maualuga o se taumafaiga e faaaofia ai tagata uma ina ia fausia le faatuatua ia Keriso ma faamalolosia ia aiga, ae le na ona faatulagaina e tagata uma o le kalena.
O afioga a le Alii i le vaega e 50 o loo aofia ai se lapataiga e faapea afai tatou te aoao atu “i se isi ala,” nai lo le auala ua faatonuina e le Alii, “e le mai le Atua ia” (MFF 50:18). Sa aoaoina e le Alii i tatou o e auauna i totonu o le Ekalesia ina ia “aua ne’i [aoao] atu nisi mea tau lava o mea ua tusia e perofeta ma aposetolo, ma mea e aoaoina ai i latou e le Fesoasoani i le tatalo faatuatua” (MFF 52:9). Pe o lona uiga ea la o lenei mea o le mulimuli i le apoapoaiga a le Faaola ina ia “talai atu la’u talalelei” e moomia ai i vasega uma tatou te aoaoina po o fonotaga tatou te taitaia le faatapulaaina i le aoaoina atu o le faatuatua ma le salamo?
Na tali atu Peresitene Henry B. Eyring i se fesili faapea: “E leai. Ae o lona uiga, o le faiaoga ma i latou o e auai, e tatau ona naunau i taimi uma e aumai le Agaga o le Alii i totonu o loto o tagata e i ai i le potu, ina ia maua ai le faatuatua ma se naunautaiga e salamo ma ia mama.”4
O se ki lona lua i le faamautinoaina lea o loo taitaia ma “tausia i le afioga lelei a le Atua” (Moronae 6:4) i latou o e tatou te aoaoina ma taitaia o loo maua foi i le poloaiga a le Faaola “ina ia talai atu la’u talalelei i le Agaga, o le Fesoasoani lava lea, na auina atu e aoao atu le upumoni” (MFF 50:14, faamamafa faaopoopo). E le gata o loo poloaiina i tatou e afioga a le Faaola ina ia mulimuli i le taitaiga a le Agaga a o tatou saunia ma a o tatou aoao atu, ae o loo Ia aoaoina foi i tatou e faapea o le Agaga o le faiaoga sili lena i soo se tulaga.
Na aoao mai Peresitene Iosefa Filitia Samita: “O le Agaga o le Atua pe a talanoa atu i le agaga o le tagata, o loo i ai le mana e faailoa atu ai le upumoni faatasi ai ma se aafiaga ma se malamalamaaga sili nai lo le upumoni e mafai ona faaalia i fesootaiga faaletagata e oo lava i tagata i le lagi.”5
I nai masina ua tuanai sa ou auai atu ai i se fonotaga faaleaoaoga lea sa saunoa ai le toatele o le Au Pulega Aoao. Ina ua maea ona faamalo i le maoae tele o aoaoga na tuuina mai, ona fesili mai lea o Elder David A. Bednar i le fesili lenei: “O a mea ua tatou aoaoina e lei tautalagia?” Ona ia faamatala mai lea faapea e faaopoopo atu i le mauaina o fautuaga na tuuina mai e i latou o e ua maea ona saunoa ma i latou o le a saunoa mai, e tatau foi ona tatou faalogo atu ma le totoa ma ia tusia uunaiga e le leoa e tuuina mai e le Agaga Paia.
O le saunoaga lenei mai lo tatou perofeta pele o Peresitene Gordon B. Hinckley, o loo tuuina mai ai se fautuaga faaopoopo e faatatau i le aoao atu e ala i le Agaga: “E tatau ona … tatou uunai a tatou faiaoga ina ia tautatala mai o latou loto [ae le o] a latou tusi, ia faamatala mai lo latou alofa mo le Alii ma lenei galuega taua, ma o le a faatupuina ai se afi i loto o i latou o e latou te aoaoina.”6
O afioga a le Alii i le vaega e 50 o le Mataupu Faavae ma Feagaiga o loo tuuina mai ai foi se faatulagaga musuia lea e mafai e i tatou taitoatasi ona iloiloina le aoga i la tatou aoao atu, taitaiga, ma le aoaoina mai. I le fuaiupu e 22 tatou te faitau i ai, “O lea, o lē talai atu atoa ma lē talia mai, e malamalama le tasi i le tasi, e faamanuiaina ma olioli faatasi i laua uma.”
O’u uso e ma tuafafine pele, ou te tatalo ma lo’u loto atoa ina ia matuai tausia faalelei e i tatou uma taitoatasi i latou o e tatou te aoaoina ma i latou o e tatou te taitaia e ala lea i le faamalolosia o i latou i le areto o le ola ma le vai ola o loo maua i totonu o le talalelei toefuataiina, i le suafa o Iesu Keriso, amene.