O Le Poloaiga Sili

Elder Joseph B. Wirthlin

O Le Korama a Aposetolo e Toasefululua

Pe a tatou aapa atu e fesoasoani i se aupito itiiti o le fanau a le Tama Faalelagi, o Ia lava lea ua tatou faia i ai.

Ata

Uso e ma tuafafine, ou te fia fesili atu i le fesili aupito taua e tasi. O le a se uiga e sili ona lelei le faamatalaina ai o i tatou o ni tagata O Le Ekalesia a Iesu Keriso o le Au Paia o Aso e Gata Ai?

O le aso, ou te fia tautala ai i le tali o lenei fesili.

I le seneturi muamua o le T. A., sa naunau lava tagata o le Ekalesia tuputupu ae i Korinito e uiga i le talalelei. Na toetoe lava o i latou uma na faatoa liliu mai i le Ekalesia. O le toatele na tosina atu i ai e ala i le talaiga a le Aposetolo o Paulo ma isi.

Ae peitai, sa faapea foi ona feitagai le Au Paia i Korinito. Sa fefinauai i latou lava. O nisi na manatu ua sili atu [i latou] nai lo isi. Sa molia e le tasi le isi i le faamasinoga.

Ina ua faalogo Paulo i lenei mea, ma lagona ai le le fiafia, sa ia tusi atu ia te i latou ma augani atu ina ia faateleina lo latou lotogatasi. Sa ia taliina le tele o fesili sa latou fefinauai ai. Ma, i le taulalata i le faaiuga, sa ia tau atu ai ia i latou na te fia faaali atu ia i latou “le ala e silisili lava.”¹

Tou te manatua upu o loo sosoo ai na ia tusia?

“Afai ou te tautala i gagana a tagata atoa ma agelu, a e leai sou alofa,” na ia tau atu ia i latou, “ua avea au ma apa memea taalili, po o se sumepalo tagitagi.”²

O le savali a Paulo i lenei faapotopotoga fou o le Au Paia sa faigofie ma tuusao: E leai se eseesega tele o se mea tou te faia pe afai e le ia te outou le alofa. E mafai ona e tautala i gagana eseese, i ai le meaalofa e perofeta ane ai, ma le iloa o mea lilo uma ma le poto uma lava; e tusa foi pe i ai lou faatuatua e ave ese ai mauga, ae leai se alofa, e le aoga lava.³

“A o le alofa moni o le alofa mama lea o Keriso.”⁴ Na faaali mai e le Faaola lena alofa ma aoao mai e ui ina sa faasalaina ai o Ia e i latou na inoino ma feita ia te Ia.

Sa i ai se taimi sa taumafai ai le au Faresaio e maileia Iesu e ala i le fesiligia o Ia i se fesili e foliga faigata: “Le aoao e,” sa latou fesili ai, “o le fea poloaiga o i le tulafono ua sili?”⁵

Ua leva ona talanoa le au Faresaio i lenei fesili ma na maua ai le sili i le 600 o poloaiga.⁶ Afai o le faatulagaina o ia poloaiga i le poloaiga e sili sa avea o se galuega faigata i le au atamamai, e mautinoa foi, sa latou manatu, o le a le mafai foi ona taliina e le atalii lenei o le tufuga mai Kalilaia.

Ae ina ua faalogo le au Faresaio i Lana tali, masalo sa atuatuvale i latou, aua na faasino tonu lava i lo latou vaivaiga sili. Na tali o Ia:

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi le lona lua, E te alofa atu i le lua te tuaoi, ia pei o oe lava ia te oe.

“O na poloaiga e lua ua autu ai le tulafono uma ma le au perofeta.”⁷

Talu mai lena aso, ua ta’ua faafia ai lenei folafolaga musuia i le tele o augatupulaga. Ae mo i tatou, o le fua o lo tatou alofa, o le fua lea o le telē o o tatou loto.

O loo tau mai e tusitusiga paia ia i tatou e faapea: “A e afai e alofa atu se tasi i le Atua, ua silafia lena tagata e ia.”⁸ E maeu le matagofie o le folafolaga—o le silafia e Ia. E faagaeetia ai le agaga, i le mafaufau atu e mafai e le Foafoa o le lagi ma le lalolagi ona silafia i tatou ma alofa ia i tatou i se alofa e mama ma faavavau.

I le 1840, na auina atu ai e le Perofeta o Iosefa se tusi i le Toasefululua lea sa ia aoao atu ai e faapea, “o le alofa o se tasi lea o uiga sili o le Atua, ma e tatau ona faaalia e i latou o e naunau e avea ma atalii o le Atua. O se tagata e tumu i le alofa o le Atua e le malie i le faamanuiaina na o lona lava aiga, ae oo atu i le lalolagi atoa, e naunau e faamanuia le aiga atoa o tagata.”⁹

A o tatou aapa atu i le alofa ia i latou o loo siomia ai i tatou, ua tatou faataunuu ai le isi afa o le poloaiga sili ia “e alofa atu i le lua te tuaoi ia pei o oe lava ia te oe.”¹⁰

Ua tatau ai lava ia poloaiga uma e lua aua, a o tatou tausoaina avega a le tasi ma le isi, ua tatou faataunuuina le tulafono a Keriso.¹¹

O le alofa o le amataga, o le ogatotonu, ma le faaiuga o le auala o le avea ma soo. Na te faamafanafana, fautua, foia, ma faalaeiau. E taitaiina i tatou mai vanu pogisa ma le ata o le oti. I le iuga, o le alofa e taitaiina atu i tatou i le mamalu ma le maoae o le ola e faavavau.

O lo’u manatu, o le Perofeta o Iosefa Samita na faaalia i taimi uma le alofa mama o Keriso. E toatele na fesili pe aisea ua matua toatele ai i latou e mulimuli ia te ia ma lagolagoina o ia. O lana tali, “Ona o loo ia te au le mataupu faavae o le alofa.“¹²

Na faamatalaina se tala e faapea, o se tamaitiiti e 14 tausaga le matua na sau i Navu e sue lona uso sa nofo latalata iina. Sa taunuu mai le alii talavou i le taumalulu na leai se tupe ma e leai foi ni uo. Ina ua fesilisili o ia e uiga i lona uso, sa aveina atu le tama i se fale tele na foliga o se faletalimalo. O iina, sa feiloai ai i se alii o le na faapea atu, “Sau i totonu atalii, o le a matou tausia oe.”

Na talia e le tamaitiiti, ma na aumai i totonu o le fale ma fafagaina ai, faamafanafana, ma tuuina atu i ai se moega e moe ai.

O le aso na sosoo ai, sa maatiati le malulu ae, e ui lava i lena tulaga, sa sauni lava le tamaitiiti e savali i le valu maila i le mea na nofo ai lona uso.

Ina ua silafia e le alii e ona ia le maota, sa fai atu o ia i le alii talavou e toe nofo mo ni nai aso. Fai mai o ia, o le a i ai se vaega e le o toe umi ae taunuu mai ma e mafai ona latou malaga faatasi.

Ina ua tetee atu le tamaitiiti, ma fai atu e leai sana tupe, na tau atu e le tamaloa ia te ia e aua le popole i lena tulaga, o le a latou tausia o ia.

Mulimuli ane, na iloa e le tamaitiiti o le alii o le maota, e le o se isi lava ae o Iosefa Samita, le Perofeta Mamona. Na manatua e lenei tamaitiiti lenei aga o le alofa i le taimi atoa na totoe o lona olaga.¹³

I se savali lata mai nei a le Aufaipese a le Tapeneko “O Musika ma Afioga Tulei,” na faamatalaina ai se tala e uiga i se toeaina ma se olomatua na faaipoipoina mo le tele o tausaga. Talu ai ona sa faifaimalie lava ona le toe mafai ona pupula le olomatua, sa le mafai ai ona ia tausia o ia lava e pei ona sa i ai i le tele o tausaga. E aunoa ma le tau fai atu i ai, sa amata ona valivali e le toeaina atigilima o le olomatua.

“Sa ia iloaina e mafai ona iloa [e lona toalua] ona atigilima pe a faalatalata atu i ona mata, i le itu sa’o, ma e ataata ai o ia. ”Na fiafia le toeaina e vaai o fiafia le olomatua, o lea na faaauau ai ona ia valiina ona atigilima i le silia ma le lima tausaga a o lei maliu le olomatua.”¹⁴

O se faataitaiga lena o le alofa mama o Keriso. O nisi taimi, e le maua ai le alofa sili i vaaiga tulaga ese ia e tusi faatatau i ai ia tusisolo ma tusitala. E masani lava, o le faaalia sili o le alofa o galuega faatauvaa o le agalelei ma le alofa lea tatou te faasafua atu i isi tatou te feiloai i le olaga.

O le alofa moni e tumau e faavavau. O le onosai e faavavau ma le faamagalo atu. E talitonu, faamoemoe, ma onosai i mea uma. O le alofa lena o loo i ai i lo tatou Tama Faalelagi mo i tatou.

Tatou te moomoo uma ina ia tatou maua le alofa faapenei. E tusa lava pe tatou te faia ni mea sese, tatou te faamoemoe e alofa isi tagata ia i tatou e ui lava i o tatou le atoatoa—e tusa lava pe tatou te le agavaa mo lea alofa.

Oka, e ese le matagofie o le iloa e alofa lo tatou Tama Faalelagi ia i tatou—e ui lava i o tatou faaletonu uma! O Lona alofa e faapena, e tusa lava pe tatou te lafoaiina i tatou lava, o le a Ia le tuua lava [i tatou].

Tatou te vaaia i tatou lava i tulaga o ni tagata na tatou i ai i le taimi ua tuanai ma le taimi nei. E silasila lo tatou Tama Faalelagi ia i tatou i tulaga o le faavavau. E ui lava atonu tatou te malilie i le tulaga ua tatou i ai, e le faapena le Tama Faalelagi, aua e silasila mai o Ia o i tatou o ni tagata maoae i tulaga e mafai ona avea ai i tatou.

O le talalelei a Iesu Keriso o se talalelei o le liuaina. Na te ave i tatou o alii ma tamaitai o le lalolagi ma faaleleia i tatou o ni alii ma ni tamaiti mo le faavavau.

O le auala o lenei faaleleia, o lo tatou alolofa e faapei o Keriso. E leai se tiga e le mafai e le alofa ona faamāmāina, e leai se mafatia e le mafai e le alofa ona aveesea, po o se ita e le mafai e le alofa ona suia. Na tusia e le tusi tala pupuu Eleni o Sophocles: “E tasi le upu e faasaolotoina i tatou uma mai avega ma tiga o le olaga. O le upu alofa.”¹⁵

O taimi aupito sili ona faapelepele ma paia o o tatou olaga, o taimi na e faatumulia i le agaga o le alofa. O le tele lava o le fua o lo tatou alofa, o le tele foi lena o lo tatou olioli. I le faaiuga, o le atiina ae o se alofa faapena o le fua moni lena o le faamanuiaina i le olaga.

E te alofa i le Alii?

Faaalu se taimi e te lua mafuta ai ma Ia. Mafaufau loloto i Ana afioga. Ia amo Lana amo i ou luga. Saili ia malamalama ma usitai, “aua o lenei lava le alofa i le Atua, ia tatou tausi i ana poloaiga.”¹⁶ A tatou alolofa i le Alii, ona le avea lea o le usiusitai ma se avega. E avea le usiusitai ma se mea fiafia. A tatou alolofa i le Alii e faaitiitia lo tatou saili mo mea tatou te manuia ai ae liliu atu o tatou loto i mea o le a faamanuiaina ma siitia ai isi.

A o faateleina le loloto o lo tatou alofa mo le Alii, e faamamaina o tatou mafaufau ma loto. Tatou te oo i se “faaliliuina … o matou loto, ua le toe ai so matou manatu e fai amio leaga, a e fia fai pea lava le amio lelei.”¹⁷

Uso e ma tuafafine, a o outou mafaufau ma le agaga tatalo i mea e mafai ona outou faia e faateleina ai le lotogatasi, faaleagaga, ma fausia ai le malo o le Atua, ia mafaufau i lou tiute paia o le aoao atu o isi ia alofa i le Atua ma o latou uso a tagata. O le autu lena o lo tatou i ai iinei. A aunoa ma le alofa—po o le alofa mama o Keriso—po o a lava isi mea tatou te ausia, e itiiti sona taua. Faatasi ai [ma le alofa] o isi mea uma e iu ina malosi ma olaola.

Pe a tatou musuiaina ma aoaoina isi e faatumu o latou loto i le alofa, e tafe mai le usiusitai mai totonu agai i fafo i galuega ofo fua o le ositaulaga o le tagata lava ia ma le auauna atu. Ioe, o i latou o e faia asiasiga i aiga ona o se tiute, mo se faataitaiga, e mafai ona faataunuuina o latou matafaioi. Ae o i latou o e asiasi i aiga ona o le alofa moni i le Alii ma o latou uso a tagata, e mafai ona taulimaina lena galuega ma se uiga faaalia e matuai ese lava.

E toe foi atu i lau fesili muamua, “O le a se uiga e sili ona lelei le faamatalaina ai o i tatou o ni tagata O Le Ekalesia a Iesu Keriso o le Au Paia o Aso e Gata Ai? O lau tali: o i tatou o ni tagata e alolofa i le Alii ma o tatou loto atoa, agaga atoa, ma mafaufau atoa ma e tatou te alolofa foi i o tatou tuaoi e pei o i tatou lava.

O lo tatou uiga tulaga ese lena i le avea ai o ni tagata [o le Ekalesia]. E pei o se faailo i le lalolagi e faailoa ai lē o loo avea ai i tatou ma soo.¹⁸

I le aso mulimuli, o le a le fesili mai le Faaola e uiga i valaauga na tatou umia. O le a le fesili mai o Ia i mea faalelalolagi na tatou maua po o tulaga lauiloa. O le a fesili mai o Ia pe na tatou asiasi atu i e mamai, fafaga ma faainu i e fia aai ma fia feinu, asiasi i e o loo i falepuipui, pe fesoasoani i e vaivai.¹⁹ Pe a tatou aapa atu e fesoasoani i se aupito itiiti o le fanau a le Tama Faalelagi, o Ia lava lea ua tatou faia i ai.²⁰ O le fatu lena o le talalelei a Iesu Keriso.

Afai tatou te mananao e iloa moni pe faapefea ona alofa atu, na pau le mea e tatau ona tatou faia o le mafaufau i le soifuaga o lo tatou Faaola. Pe a tatou fetagofi atu i faatusa o le faamanatuga, e faamanatu mai ai ia i tatou ia faataitaiga sili o le alofa i le talafaasolopito atoa o le lalolagi. “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi.”²¹

O le alofa o le Faaola mo i tatou e matua maoae lava, o lea na “faagateteina ai au lava, o le Atua, le silisili ese i mea uma ona o le tiga, ma na maligi ai le toto mai pu laiti uma lava o le tino.”²²

Ona sa tuuina mai e le Faaola Lona soifua mo i tatou,²³ ua tatou maua se faamoemoe atoatoa lelei, o se lototele ma le mautinoa a tatou tea atu ma lenei olaga i le lalolagi, o le a tatou toe mafuta faatasi ma Ia. E ala i le Togiola a Iesu Keriso, e mafai ai ona faamamaina i tatou mai agasala ma tutu o ni tagata e maua le meaalofa a lo tatou Tama Silisili ese. Ma o le a tatou iloa ai le mamalu “ua saunia e le [Atua] mo i latou o e alofa ia te ia.”²⁴

O le mana liuaina lenei o le alofa.

Ina ua tuuina atu e Iesu i Ona soo se poloaiga fou “Ia outou fealofani, faapei ona ou alofa atu ia te outou,”²⁵ Na Ia tuuina atu ia te i latou le ki maoae o le fiafia i lenei olaga ma le mamalu i le olaga a sau.

O le alofa o le poloaiga sili lea i poloaiga uma—e faavae ai isi poloaiga uma. O la tatou taulaiga lea i le avea ai o ni soo o le Keriso soifua. O le auala e tasi lea, afai, e atiina ae, o le a sili ona alualu ai i luma o tatou olaga.

Ou te molimau atu o loo soifua le Atua. O Lona alofa e le gata ma e faavavau. E oo atu i Ana fanau uma. Ona o Lona alofa mo i tatou, ua Ia saunia ai perofeta ma aposetolo e taitaiina i tatou i o tatou taimi. Ua Ia tuuina mai ia i tatou le Agaga Paia e aoao, faamafanafana, ma musuia [i tatou].

Ua Ia tuuina mai ia i tatou Ana tusitusiga paia. Ma e le mafai ona faamatalaina lo’u agaga faafetai i Lona tuuina mai ia i tatou taitoatasi o se loto e mafai ona iloa le alofa mama o Keriso.

Ou te tatalo ia mafai ona faatumuina o tatou loto i le alofa ma ia mafai ona tatou aapa atu i lo tatou Tama Faalelagi ma isi ma se vaaiga fou ma se faatuatua fou. Ou te molimau atu afai tatou te faia ia mea, o le a tatou oo i se faatamaoaigaina tele i le olaga, i le suafa paia o Iesu Keriso, amene.