O Le Mana e Suia Ai
Na saunia e Peresitene Faust lenei tusiga i masina a o lei maliu o ia i le aso 10 o Aokuso, 2007.
O le mana e suia ai e moni, ma o se meaalofa sili faaleagaga lea mai le Atua.
Ua tuuina mai i tagata uma taitoatasi le mana e suia ai lona olaga. O se vaega o le fuafuaga tele o le fiafia a le Alii, ua tofu ai i tatou ma le saolotoga e faia ai faaiuga. E mafai ona fuafua ia faia ia sili atu ma ia sili atu ona lelei. I nisi o auala e moomia ai e i tatou uma ona suia; o lona uiga o lena mea, e moomia e nisi o i tatou ona faateleina ona agalelei atu i totonu o le aiga, ia faaitiitia le manatu faapito, avea ma tagata faalogo lelei, ma ia magafagafa i le auala tatou te tausia ai isi. O nisi o i tatou e i ai amioga e moomia ona suia, o amioga e afaina ai i tatou ma isi o loo siomia i tatou. O nisi taimi tatou te moomia ai se faamanatu malosi ina ia faatelevaveina ai lo tatou suia.
Na oo se suiga tele ia Saulo a o aga atu o ia i le ala i Tamaseko. Sa “mapugatamai pea Saulo i le faamatau ma le fasioti i le au soo o le Alii” (Galuega 9:1). A o aga atu o ia i le ala i Tamaseko, sa pupula atu se malamalama mai le lagi ia te ia.
“Ona pau lea o ia i lalo i le eleele, ua faalogo atu i le siufofoga, o loo faapea mai ia te ia, Saulo, Saulo e, se a le mea ua saua mai ai ia te au?
“Ona fai atu lea o Ia, Le Alii e, o ai ea oe? Ona fetalai mai lea o le Alii, O A’u o Iesu ua e saua mai i ai” (Galuega 9:4–5).
Atonu sa faamaluluina le loto o Saulo ina ua ave e tagata leaga ia Setefano i tua o le aai ma fetogi ia te ia i maa ma tuu o latou ofu i vae o Saulo. Ae sa leai se masalosalo o Paulo i le ala i Tamaseko ina ua ia faalogo i le siufofoga o le Alii, lea na ia fetalai atu ai, “O A’u o Iesu ua e saua mai i ai.”
“Ua gatete ia, ma ua mata’u, ua faapea atu, le Alii e, se a le mea e te finagalo i ai ou te faia? Ona fetalai mai lea o le Alii ia te ia, Tu ia oe i luga, ina alu ia i le aai, ona tauina atu lea ia te oe o le mea e tusa ona e faia” (Galuega 9:6). Sa tauaso Saulo ina ua ia tulai i luga ma aveina atu i Tamaseko, lea sa toe faapupulaina ai o ia ma sa papatiso ai. Sa amata loa lava ona ia talai atu “ i Sunako le Keriso, o ia lava o le Alo o le Atua” (Galuega 9:20). O Saulo, lea na avea mulimuli ane ma Paulo, na oo i se suiga sa matuai atoatoa, mautinoa, ma le mausali seia oo lava i lona oti.
Suia e ala i le Liuaina
E mautinoa lava e lei tupu se mea faapena ia te oe, e faapena foi ia te au! O le liuaina mo le toatele o i tatou o se mea e faalematautia tele ae tatau ona faatosina ma aoga. O tagata fou liliu mai i le Ekalesia e masani ona oo i ai se faalogona faaleagaga i le taimi o lo latou papatisoga. Na faamatalaina e se tasi faapenei: “O le a le galo lava ia te au le lagona sa i totonu o lo’u agaga; ina ia mama, ia amata i se amataga fou o se atalii o le Atua… . O se lagona faapitoa ma taua!”1
O le liua moni e suia ai olaga. Na tusia e se tasi tamaitai talavou le le fiafia sa i ai lo latou aiga a o laitiiti o ia. Sa ia tusia, “Sa ou matua lagona le loto ootia ina ua matuai mafatia lou tina ma ou tuagane ma o’u uso laiti ona o le ita matua matautia o se tama onā.” Ina ua 14 ona tausaga, sa ta’u atu e se tasi ia te ia e faapea o se tasi o poloaiga a le Atua o le ava lea i ona matua. I le mafaufau atu i ai pe mafai faapefea ona ia faia lenei mea, sa uunaia o ia ina ia suesue, ia avea ma se tagata aoga sili ona lelei, ma avea ma se afafine sili ona lelei i totonu o le nuu.
E le’i tele se suiga i le fale, ae sa ia lagona pea lona tumau ai i ona faamoemoega ma o le 18 o ona tausaga sa ia tuua loa le aiga ina ia faaauau nisi o suesuega faapitoa. I le tolu vaiaso mulimuli ane sa ia toe foi atu ai e asiasi i le aiga, sa ia toe faamatalaina:
“Sa faafeiloai au e lo’u tina i loimata. Sa ou manatu e i ai se mea matautia na tupu, ae sa ia fusi atu au ma faapea mai, ‘Talu lava ona e alu ese mo au suesuega, e le’i toe inu lava lou tama i se ava malosi.’
“… Fai mai lo’u tina o le po lava na ou malaga ese ai, na oo atu ai nisi o faifeautalai Mamona… .
“Sa pei lo’u tamā o se tamaitiiti. Sa mafai ona ou iloa atu le salamo ma le lotomaualalo i ona mata. Sa matuai suia atoatoa o ia. Sa le toe ulaula pe inupia, ma sa taumafai e tausia poloaiga na aoao atu e faifeautalai ia te ia. Sa fai mai e ia ia te au ni faiga e pei o se tupu tamaitai, ma sa faia foi e ia ni faiga i lo’u tina ma o’u tuagane ma o’u uso e pei o ni tamalii.
“… Sa papatisoina uma lo matou aiga… . Sa avea lo’u tama, i le 40 o tausaga, ma tama sili ona lelei i le lalolagi.”2
E moni lava e mafai e le mana o le talalelei ona suia o tatou olaga ma aveina atu i tatou mai le faanoanoa ma le lotovaivai i le fiafia ma le olioli.
Suia e ala i le Salamo
O le solitulafono e oo mai ai le tiga ma le faanoanoa. Ae o loo i ai se auala e alu ese ai mai le “au oona ma noanoaga o le amioletonu” (Mosaea 27:29). Afai o le a tatou liliu atu i le Alii ma talitonu i Lona suafa, e mafai ona suia i tatou. O le a Ia tuuina mai ia i tatou le mana e suia ai o tatou olaga, le mana e tuuese ai mafaufauga ma lagona leaga mai o tatou loto. E mafai ona aveeseina i tatou mai le “vanu aupito uliuli” i le “malamalama ofoofogia o le Atua” (Mosaea 27:29). E mafai ona faamagaloina i tatou. E mafai ona tatou maua le filemu.
I nai tausaga ua mavae na toe faamatalaina ia e Elder Marion D. Hanks, ua avea nei ma Pulega Aoao ua malolo aloaia, se mea na tupu i se alii na salamo ma suia lona olaga i se taimi vave:
“Sa alu o ia e ave lona atalii i le fale o se aiga e nofo ai a o auai atu o ia i se taamilosaga peisipolo. Sa foliga mai e musu le alii talavou e o ma lona tama i le fale o le aiga lea, ma sa amata ona tau masalosalo le tama pe o lelei le tausiga o lona atalii e nei tagata. Sa tau lafilafi atu le tamaitiiti i tua o lona tama a o la tuitui i le faitotoa. Ae peitai, o le taimi lava na la oo ai i totonu, sa faafeiloai lelei lona atalii e le aiga, ma sa iloga mai lava lona alofa tele ia i latou.
“Mulimuli ane ina ua alu atu e toe aumai lona atalii, sa fai atu lenei tama le mautonu i lona atalii sei faamatala atu lana amio fou lea ua i ai… . O le tali a lona atalii [sa i ai]:
“‘Sa ou fefe ina ne’i galo ia te oe ma e palauvale i le latou fale, Tamā. Latou te le palalauvale i lo latou fale; o i latou o ni tagata lelei tele. E lelei a latou talanoaga e fai ma e talie soo, ma latou te tatalo i taimi uma latou te aai ai faapea ma taeao ma afiafi, ma latou te faatagaina au matou te tatalo faatasi.’
“Fai mai le tamā, ‘E le faapea o le matamuli o le tamaitiiti i lona tama; ona o lona alofa tele ia te au na le manao ai ia leaga so’u uiga e faaalia.’
“O lenei tamā, sa teenaina le toatele o tagata faamaoni o e sa taumafai e fesoasoani atu ia te ia ia sailia se ala sili atu ona lelei o le olaga, sa ootia i le agaga malu o lona lava atalii.”3
O le mana e suia ai na matuai faateleina le malosi lea na le gata na toe toaga ai lenei tama i le Ekalesia ae na avea foi ma se taitai o le siteki.
Suia e ala i le Toe Manuia mai Mausa
O le isi ituaiga suiga ou te fia talanoaina o le toe manuia lea mai mausa e faapologaina ai. E aofia ai ma’i e o faatasi ma le ava malosi, fualaau faasaina, tapaa, tausami, taalo tupe, uiga le mama o feusuaiga, ma le matamata i ata mataga. Ou te aumaia upu mai se tusi e lei leva ona lolomiina e faatatau i mausa e faavaivaia ai: “O le faaaogaina sese o mea e faaaogaina o le mafuaaga lea o ma’i e le mafai ona togafitia ma le maliu i totonu o le Iunaite Setete. O le faaaogaina sese o fualaau faasaina e faaleagaina ai aiga, e faitau piliona tupe e maumau ai i le gaosiga, e afaina ai le tausiga o le soifua maloloina, ma faamutaina ai soifua.”4 O se mala i le lalolagi.
E tele ituaiga mausa, ma e faigata i se isi o loo i ai se tasi o nei mausa matuia ona suia aua o nisi o ia mausa e suia ai manatu ma lagona. O se tusiga talu ai nei e faatatau i mausa o loo faapea mai, “I totonu o faiai o tagata ua fai ma mausa, ua tuuitiitia ai gaoioiga i le afuafu pito i luma lea e mafai ai e mafaufauga atamai ona puleaina ia amioga faafuaseia.”5 O nisi o mausa e mafai ona pulea i tatou i le tulaga latou te aveeseina ai lo tatou saolotoga na aumai mai le Atua. O se tasi o auupega sili a Satani o le sailia lea o auala e pulea ai i tatou. O lea la, e tatau ona tatou aloese mai soo se mea o le a taofiofia ai i tatou mai le faataunuuina o faamoemoega o le Alii mo i tatou, lea e ono afaina ai faamanuiaga o le faavavau. O loo tatou i ai i lenei olaga mo le agaga ina ia puleaina le tino nai lo le puleaina o le agaga e le tino.
Soo se ituaiga mausa e moomia ai se tau tele o le tiga ma le mafatia, ma e mafai ona aafia ai foi i tatou i le faaleagaga. Ae peitai, o loo i ai le faamoemoe aua o le tele lava o mausa e mafai ona faatoilaloina pe a lava se taimi. E mafai ona tatou suia, ae o le a faigata.
Tatou te amata i le faia o se faaiuga ina ia suia. E moomia ai le lototele ma le lotomaualalo ia tautino atu ai tatou te moomia le fesoasoani, ae toalaiti lava nisi, pe afai e i ai nisi o i tatou, e mafai ona tatou faia na o tatou lava. O loo i ai se polokalama a le Ekalesia e fofoina ai le aafia i mausa lea na fatuina mai uluai Laasaga e Sefululua o Inu Ava e le Mailoa i se faavaa o aoaoga faavae ma talitonuga o le Ekalesia. O nei laasaga e 12 o loo maua i le A Guide to Addiction Recovery and Healing [O Se Taiala i le Fofoina ma le Faamaloloina mai Mausa], lea o loo avanoa mo taitai perisitua ma isi tagata o le Ekalesia.
E ono moomia ai se suiga atoa i le ituaiga olaga e ola ai. E tatau ona tatou mananao ma o tatou loto, mafaufau, ma le malosi atoa ina ia faatoilaloina nei mausa leaga. E tatau ona tatou saunia e lafoaia atoatoa lo tatou auai i soo se tasi o nei faiga po o mea leaga ua fai ma mausa.
E toatele tagata ua mafai ona latou suia o latou mausa o fualaau faasaina. O se tina e toatolu le fanau, o Susana, sa faaaogaina ia fualaau faasaina na o faaiuga o vaiaso i se taumafaiga e nana lona faafitauli mai lana fanau. Ae sa maua e le fanau ma aioi atu loa ia te ia ina ia tuu. Ina ua mavae le tolu tausaga, faatasi ai ma se fesoasoaniga faapitoa ma le lagolago a lana fanau, aemaise lava i lana tama tama e fitu tausaga le matua, sa ia tuu ai loa. I le toe tepa i tua sa ia iloaina ai o le Tama Faalelagi sa fesoasoani ia te ia i lenei mea ma saunia o ia e faalogo atu i le talalelei. Fai mai o ia:
“O le talalelei na suia ai lo’u loto, o o’u foliga vaaia, o la’u amio, ma o’u lagona. Ma sa ou aoao e tatalo. Soo se taimi e i ai so’u faafitauli, ou te alu atu i le Tama Faalelagi ma faapea atu i ai, ‘Fesoasoani mai ia te au.’ Ma na te silafia mai au… . O le taimi nei afai ou te savali, ou te savali ma le fiafia aua ua ou iloa sa i ai le Tama Faalelagi i o’u tafatafa i laasaga uma o le ala… .
“Oi, o se aso fou. E tele au mea na aveesea ona o lo’u manao e faaaoga fualaau faasaina—na aveese lo’u fale, na toetoe a oti la’u tama i se afi, na faaleagaina la’u faaipoipoga, na ou matuai le toe mauaina le fiafia. Ae ua ou toe mauaina. Na toe tuu mai e le Tama Faalelagi ia te au se avanoa e toe amata ai. Ua fou nei a’u—ua matuai fou atoatoa i totonu ma fafo.”6
O aso fou uma lava e amataina e mafai ona avea ma se aso fou mo i tatou e amata ai ona suia. E mafai ona tatou suia lo tatou siosiomaga. E mafai ona tatou suia o tatou olaga e ala lea i le suia o ni amioga tuai i ni amioga fou. E mafai ona tatou liliuina o tatou tagata ma le lumanai e ala lea i ni mafaufauga ma ni gaoioiga mama. Ae pei ona faaupuina e se tasi, “O le tulaga e mafai ona suia ai o loo i ai pea iina, faatasi ai ma lona folafolaga natia o le filemu, fiafia, ma se auala lelei o le olaga.”7
O mausa e faatautee i le Agaga. E ui o nisi mausa e moomia ona o se fesoasoaniga faafomai, ae aua ne’i o tatou faagaloina le fesoasoaniga faaleagaga lea e avanoa mo i tatou e ala i faamanuiaga faaperisitua ma le tatalo. Ua folafola mai e le Alii, “Ua lava lo’u alofa tunoa i tagata uma o e faamaulaloina i latou lava i o’u luma, ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27). Ia tatou manatua o le mana e suia ai e matuai moni lava, ma o se meaalofa sili faaleagaga mai le Atua.
Ou te molimau atu o le salamo faapea ma le amiotonu e sosoo mai ai ma le mana o lo tatou Alii o Iesu Keriso, e mafai ai ona oo mai le suiga sili i o tatou tino ina “ia faia ia faatatau i lona tino matagofie, e tusa ma le mana na te mafaia ai ona faatoilaloina o mea uma ia te ia lava” (Filipi 3:21).